FATMIRE DURAKU
S’je më
( Kushtuar grave të vrara apo të dhunuara,
fenomen që nuk duhej të ishte i pranishëm mes nesh )
- triolete
Hija jote shfaqet në errësirë
Ulet në cep në të njëjtin gur
Digjet nga pikë e gjakut të lirë
Hija jote shfaqet në errësirë
Ende pik e zgjohet në pasqyrë
E zemra rikthehet e bëhet urë
Hija jote shfaqet në errësirë
Ulet në cep në të njëjtin gur
II
E zemra troket ja dhe rrëshqet
Mbi të i njëjti yll e njëjta degë
Tashmë pa dritë pa asnjë vullnet
E zemra troket ja dhe rrëshqet
Nga vetmia dhembja bëhet det
Shikon qan në mall hije në rregë
E zemra troket ja dhe rrëshqet
Mbi të i njëjti yll e njëjta degë
III
Çdo gjë sillet në pamje mashtrimi
Mbetur peng shpirtit të pa trajtë
Hija përherë ngelur peng kujtimi
Çdo gjë sillet në pamje mashtrimi
Gurëzon në cep në gur trishtimi
Tërë në ankthi të asaj nate të vajit
Çdo gjë sillet në pamje mashtrimi
E mbetur peng shpirtit të pa trajtë
