Nga Bill Gates | 9 nëntor 2023 – E plotë në anglisht: AI Agents – Përktheu Arben Çokaj
Pesë vjet nga tani, nuk do t’ju duhet të përdorni aplikacione të ndryshme për detyra të ndryshme. Ju thjesht do t’i tregoni pajisjes tuaj, në gjuhën e përditshme, atë që dëshironi të bëni—qoftë nëse është hartimi i një dokumenti, krijimi i një fletëllogaritëse, planifikimi i një takimi, analizimi i të dhënave, dërgimi i një emaili apo edhe blerja e biletave të filmit. Në varësi të sasisë së informacionit që zgjidhni të ndani me të, softueri do të jetë në gjendje të përgjigjet personalisht, sepse do të ketë një kuptim të pasur të jetës suaj.
Në të ardhmen e afërt, kushdo që është në internet do të jetë në gjendje të ketë një asistent, të mundësuar nga inteligjenca artificiale, që është shumë përtej çdo gjëje që mund të merrni sot.
Ky lloj softueri – diçka që i përgjigjet gjuhës natyrore dhe mund të kryejë shumë detyra të ndryshme, bazuar në njohuritë e tij për përdoruesit – quhet agjent. Unë kam menduar për agjentët për gati 30 vjet dhe kam shkruar për ta në librin tim të vitit 1995 Rruga përpara, por ato janë bërë praktike vetëm kohët e fundit, për shkak të përparimeve në AI.
Agjentët jo vetëm që do të ndryshojnë mënyrën se si të gjithë bashkëveprojnë me kompjuterët. Ata gjithashtu do të përmbysin industrinë e softuerit, duke sjellë revolucionin më të madh në informatikë, që kur kaluam nga shtypja e komandave në prekjen e ikonave.
Në postimin tim të fundit në blog, unë zhytem thellë për të shpjeguar këta agjentë: çfarë janë ata, pse do të ndryshojnë në mënyrë drastike nga asistentët e mëparshëm dixhitalë si Clippy i Microsoft Office, si do të përmirësojnë produktivitetin (dhe do të ndryshojnë mënyrën se si e kalojmë kohën tonë joproduktive), dhe cilat industri dhe profesione do të ndryshojnë përgjithmonë. Unë gjithashtu diskutoj një sërë pyetjesh, sfidash dhe shqetësimesh—teknike por edhe ato që trajtojnë paragjykimet, privatësinë dhe lidhjen njeri me njeriun—të cilave ne ende duhet t’u përgjigjemi.
Ju mund ta lexoni postimin e plotë në Gates Notes tani. (Dhe nëse ju kanë humbur mendimet e mia të mëparshme për AI, mund të arrini këtu dhe këtu.)
