Dhjetë vite përkushtim, sakrificë dhe dashuri për Lurën tonë

Në dhjetë vjetorin e shoqatës “Lura jonë” dhe gazetës “Lura”

Nga Gëzim Loka Lura

Dhjetë vite më parë, me dashurinë e madhe për vendlindjen, me besimin se Lura meriton më shumë dhe me dëshirën për ta bërë zërin e saj të dëgjohet kudo, nisëm një rrugëtim që do të kërkonte përkushtim, durim, sakrifica dhe këmbëngulje. Kështu lindi dhe u konsolidua rrugëtimi i Shoqatës “Lura Jonë” dhe gazetës “Lura”, dy nisma që kanë në themel një qëllim të përbashkët: t’i shërbejnë Lurës, ta promovojnë atë dhe të mbrojnë vlerat, historinë, kulturën dhe të ardhmen e saj.

Në këtë 10-vjetor, kthejmë kokën pas me emocion dhe krenari për gjithçka kemi arritur, por edhe me vetëdijen se rruga jonë nuk ka qenë e lehtë. Kemi hasur shumë vështirësi, jemi përballur me pengesa, me mungesë mbështetjeje dhe me sfida të shumta. Shumë veprimtari i kam përballuar me financat e mia modeste. Megjithatë, nuk u ndalëm, se na mbajti gjallë dashuria për Lurën, besimi te puna jonë dhe bindja se vendlindja nuk duhet harruar, por duhet promovuar, zhvilluar dhe lënë si trashëgimi e çmuar për brezat që vijnë.

Gjatë këtyre dhjetë viteve, Shoqata “Lura Jonë” dhe gazeta “Lura” janë përpjekur të jenë një zë i vazhdueshëm i komunitetit lurian, një urë komunikimi mes banorëve, emigrantëve, intelektualëve, studiuesve dhe institucioneve. Kemi synuar të bashkojmë njerëzit rreth një ideali të përbashkët: Lura jonë ka vlera të jashtëzakonshme dhe meriton një të ardhme më të mirë.

Një nga drejtimet tona kryesore ka qenë promovimi dhe zgjimi i Lurës turistike. Kemi besuar dhe vazhdojmë të besojmë se natyra e rrallë e Lurës, liqenet e saj, pyjet, peizazhet mahnitëse, traditat, mikpritja dhe trashëgimia kulturore përbëjnë një pasuri të jashtëzakonshme. Kjo pasuri duhet të njihet më shumë, të vlerësohet dhe të kthehet në një mundësi reale zhvillimi për banorët e zonës. Përmes shkrimeve, botimeve dhe veprimtarive tona, jemi përpjekur ta nxjerrim Lurën nga heshtja, ta bëjmë më të pranishme në vëmendjen publike dhe të sensibilizojmë institucionet për potencialet e saj.

Një kontribut të veçantë kemi dhënë në dokumentimin dhe promovimin e historisë e të identitetit të Lurës.
Kemi realizuar sesione të vecanta shkencore për Dom Nikoll Kaçorrin, për Gjokë Doçin, sesion jubilar për betejen e Lanë Lurës, sesion jubilar për martirët e Nemces, sesion shkencor për Rrugën e Lurës, për 1 vjetorin e shoqatës dhe gazetës, tetë herë, çdo të diel të fundit të shtatorit, jemi mbledhur dhe kemi festuar Ditën e Lurës.

Përmes botimit të librave kushtuar Lurës, kemi synuar të ruajmë kujtesën historike, të evidentojmë personalitetet dhe vlerat e saj, të pasqyrojmë traditat dhe të përcjellim te brezat e rinj dashurinë për vendlindjen. Sepse një krahinë që njeh dhe dokumenton historinë e vet, ruan më mirë identitetin dhe ndërton me më shumë siguri të ardhmen.

Në bashkëpunim me lurasit kemi promovuar librat e mi “Lura, perla turistike e Evropés”, “Ujëvarë shpirti’ poezi, “Pafajsia e pranverez” tregime, “Skamnoret”- novelë, “Meteor lirie”, monografi kushtuar Heroit të Popullit Gjokë Doçi, “Katër luftetar Botërore dhe Shqipëria”, “Ju falem ju o bukuri hyjnore” poemé, “Një kandidat për hero”, “Dom Nikoll Kaçorri meshtari i Pavaresisé”, “Kushtetuta e Dheut të Lures”, “Historiku i shoqatës Lura jonë dhe gazetës Lura”, “Dita e Lurës’, “Viti zero” dhe në bashkeaitorësi me mkun e Lurës të ndjerin prof. Skënder Farka kemi promovuar mes komunitetit Luras librin “Shetitje turistike në fshatrat e Lurës”.

Gjatë këtij rrugëtimi, siç thamë, kemi organizuar simpoziume, sesione jubilare dhe veprimtari të tjera përkujtimore e kulturore, duke krijuar hapësira për diskutim, reflektim dhe vlerësim të trashëgimisë sonë. Këto veprimtari kanë shërbyer për të sjellë së bashku njerëz të dijes, studiues, intelektualë, personalitete dhe dashamirës të Lurës, me bindjen se vlerat e një vendi ruhen e zhvillohen kur për to flitet, shkruhet, studiohet dhe punohet së bashku.

Një ndër çështjet më të rëndësishme ku kemi përqendruar përpjekjet tona ka qenë ndërtimi i rrugës së Lurës. Kemi qenë ndër nismëtarët e komunikimit dhe të sensibilizimit të pushtetit qendror për domosdoshmërinë e kësaj vepre jetike për zonën. Përmes shkrimeve, thirrjeve publike dhe kontakteve me institucionet, kemi ngritur vazhdimisht zërin për një kërkesë që nuk lidhet vetëm me lehtësimin e lëvizjes, por edhe me zhvillimin ekonomik, turizmin, mirëqenien e banorëve dhe ndalimin e izolimit të Lurës.

Për ne, rruga e Lurës nuk është thjesht një projekt infrastrukture. Ajo është rruga e zhvillimit, e shpresës dhe e së ardhmes. Është lidhja e Lurës me pjesën tjetër të vendit, mundësia për të tërhequr vizitorë, për të nxitur sipërmarrjen dhe për t’u dhënë banorëve më shumë mundësi për të jetuar e punuar në vendlindjen e tyre. Prandaj, kjo çështje ka qenë dhe mbetet një nga angazhimet tona më të rëndësishme qytetare.

Gazeta “Lura”, nga ana e saj, ka qenë një dritare komunikimi, një hapësirë ku janë pasqyruar problematikat, vlerat, shqetësimet dhe aspiratat e komunitetit. Ajo ka synuar të informojë, të ndërgjegjësojë dhe të mbajë gjallë lidhjen shpirtërore të lurianëve me vendlindjen, kudo ku ata jetojnë. Çdo shkrim, çdo botim dhe çdo nismë ka qenë pjesë e përpjekjes për ta bërë Lurën më të njohur dhe për t’i dhënë asaj vendin që meriton në vëmendjen publike.

Në këtë dhjetëvjetor, mirënjohja jonë shkon për të gjithë ata që na kanë mbështetur, që kanë kontribuar me shkrime, ide, botime, pjesëmarrje dhe ndihmë konkrete. Falënderojmë bashkëpunëtorët, autorët, studiuesit, intelektualët, miqtë e shoqatës, lexuesit e gazetës dhe të gjithë ata që e kanë ndier Lurën si pjesë të pandarë të jetës së tyre. Një falënderim të veçantë meritojnë edhe ata që, pavarësisht vështirësive, kanë qëndruar pranë nesh dhe kanë besuar se puna për vendlindjen ka vlerë.

Falenderoj posaçërisht dhe me dorë në zemer, z. Dali Gjoçi, kryetari i shoqates Lura jonë, që ka qenë gjithmonë i përkushtuar, aktiv dhe pasionant në çdo hap dhe veprimtari.

Dua të veçoj kontributin modest si të interesuar për shoqaten dhe gazeten, biznesmenet Kadri Haldeda dhe Ali Kalia. Falenderoj veçanërisht biznesmenin e suksesshém Dodë Doçi per spondorizimin e dy librave të mi “Kushtetuta e Dheut të Lurës,” dhe “Meteor lirie”, kushtuar Heroit të Popullit Gjokë Doçit.

Dhjetë vjet janë një moment për të festuar, por edhe për të reflektuar. Kemi bërë shumë, por e dimë se ka ende shumë për të bërë. Lura ka nevojë për më shumë vëmendje institucionale, për infrastrukturë të përshtatshme, për zhvillim të qëndrueshëm turistik, për ruajtjen e mjedisit, për promovimin e trashëgimisë kulturore dhe për krijimin e mundësive që brezat e rinj të mos e braktisin vendlindjen.

Ne do të vazhdojmë të jemi pjesë e këtij misioni. Do të vazhdojmë të shkruajmë, të botojmë, të promovojmë, të organizojmë veprimtari dhe të kërkojmë vëmendjen e institucioneve për çështjet që shqetësojnë Lurën dhe banorët e saj. Sepse dashuria për vendlindjen nuk matet me fjalë, por me punë, këmbëngulje dhe përkushtim të vazhdueshëm.

Le të jetë ky përvjetor një pikënisje e re, me më shumë energji, bashkëpunim dhe besim. Le të bashkohemi të gjithë rreth Lurës, sepse ajo është pasuria jonë e përbashkët, kujtesa jonë, krenaria jonë dhe përgjegjësia jonë për të ardhmen.