[ Libra NëLinjë ]
Në një atmosferë të mbushur me emocion, krenari dhe vendosmëri kombëtare, qindra studentë nga Shqipëria, Kosova dhe Maqedonia e Veriut u mblodhën në Tiranë në mbështetje të studentëve shqiptarë në RMV, duke ngritur zërin për të drejtën legjitime të zhvillimit të provimit të jurisprudencës në gjuhën shqipe. Protesta, e zhvilluar pranë ambasadës së Maqedonisë së Veriut, u shndërrua në një manifestim të fuqishëm të solidaritetit mbarë shqiptar dhe të mbrojtjes së identitetit kombëtar.
Studentët deklaruan me vendosmëri se nuk do të ndalen derisa kërkesat e tyre të realizohen plotësisht. Për ta, kjo nuk është thjesht një çështje administrative apo akademike, por një betejë për dinjitetin, gjuhën dhe të drejtat themelore të shqiptarëve në Maqedoninë e Veriut.
Në fjalimet e mbajtura gjatë protestës u theksua se shqiptarët nuk janë të vetëm dhe se mbështetja nga Shqipëria dhe Kosova është një dëshmi e unitetit kombëtar. Një nga studentët kujtoi me shqetësim presionin psikologjik që kishin përjetuar studentët shqiptarë gjatë udhëtimit të tyre në Maqedoninë e Veriut, duke dënuar heshtjen dhe indiferencën e atyre që, sipas tij, për interesa pushteti harruan kauzën kombëtare.
“Një Shqipëri e tërë i ka sytë dhe zemrën te studentët shqiptarë në RMV”, u shpreh ai, duke theksuar se çdo padrejtësi ndaj shqiptarëve prek ndërgjegjen kombëtare të gjithë shqiptarëve kudo që ndodhen.
Në protestë u dëgjua fuqishëm edhe zëri i të rinjve që kërkuan angazhim dhe përgjegjësi nga brezi i tyre. Një studente u shpreh se heshtja dhe indiferenca janë rrezik për kombin, ndërsa rinia duhet të jetë forca që mbron gjuhën dhe identitetin shqiptar.
“Kombi mbahet gjallë nga ata që nuk heqin dorë prej tij”, deklaroi ajo mes duartrokitjeve të pjesëmarrësve.
Atmosfera mori edhe më shumë emocion me pjesëmarrjen e gazetarit të njohur Marin Mema, i cili mbajti një fjalim të zjarrtë për bashkimin kombëtar. Ai theksoi se interesat politike nuk mund të jenë mbi interesin kombëtar dhe se të rinjtë shqiptarë duhet të jenë gardianët e identitetit dhe historisë së tyre.
“Kombi është mbi çdo parti. Ngjyrat kuqezi janë mbi çdo ngjyrë tjetër”, u shpreh ai, duke shtuar se shqiptarët do të luftojnë çdo ditë për Shqipërinë dhe për çdo pëllëmbë të trojeve shqiptare.
Mes flamujve kuqezi dhe thirrjeve për drejtësi, studentët përcollën një mesazh të qartë: gjuha shqipe nuk është vetëm mjet komunikimi, por trashëgimi, histori dhe amanet brezash. Ata deklaruan se nuk kërkojnë mëshirë, por respekt dhe barazi për studentët shqiptarë dhe për identitetin e tyre kombëtar.
Kjo protestë dëshmoi edhe një herë se kur preket gjuha dhe dinjiteti kombëtar, shqiptarët dinë të bashkohen përtej kufijve dhe ndasive politike, duke e kthyer zërin e tyre në një forcë që nuk mund të injorohet.
Nexhmije Mehmetaj
Gjenevë, 26.05 2026
