JANINA

0
17
Sabile Basha

Sabile Keçmezi-Basha

JANINA

Janina nuk është grua
Por asaj shumë i ngjan
Është e bukur edhe sot
Si një ëndërr e pa ëndërruar

Janina
Ka vite që nuk flet shqip
Ama me qerpik të lodhur
Të uron mirëseardhjen

Ali Pash Tepelena nga kalaja
Të zgjatë dorën ashtërore
Dhe të tregon hartën e grisur
Të Pashallëkut të harruar
Dhe pandërprerë të fletë
Për rrugën me shumë pikëpyetje

Sonte, liqeni i Janinës është i qetuar
Për të shkuar deri te ishulli “Kastros”
E kodra menjëherë mëtan
Kërkon derman për plagët që kullojnë dhembje

Në kala ende shkruhen fermanët
Për kthimin e kohës
Me myhyr të pashait
Në trupin e pa kokë
Kërkohen sytë tek Porta e Silirvisë

Janina nuk është grua…
Grua nuk është Janina…
Por në çdo nëntë muaj
Ka dhembje për lindje
Po edhe tani rënkon nga dhembja
Që korbat i shkërmoqën trupin

Janina nuk fal
– as sot
– as nesër
– as një ditë tjetër
Kurrë nuk të falë Janina
Për plagët që nuk mbyllën
Në trupin e prangosur

Janinë, 27 qershor 2024

K O M E N T E

Ju lutem, shkruaJ komentin tuaj!
Ju lutem, shkruaJ emrin tuaj këtu

Kjo uebfaqe përdor Akismet, për të ulur spam. Mëso se si procesohen të dhënat e komentit tuaj.