[ Libra NëLinjë ]
Autore:
Elife LUZHA
GJEOGRAFIA E ZEMRËS
Nata përqafoi qiellin e purpurt
Tek syri gjysmë i hapur
I yllit në zgjim
Polet në faqen e tokës shtrirë
Ua dëgjoj frymëmarrjen
Erërave
Deri në zemër
Syri mat e çmat
Horizonte të shkrumbuara
Me ajër të akullt
Matematikë e gabuar
Me gjakun e zemrës sime
Vijëzon kufijtë
E atdheut të tkurrur
DALLGËT E JETËS
Në qiellin gri fryn veriu
Ngricë e egër shtrihet akullnajë
Dallgë të ethta drithëruese
Në trupin tim lanë gjurmë
Që nga belbëzimi im i parë
PËR TY
Sa shumë më mori malli
E qava me dënesë
Ti kurrë s’ke për ta ditur
Kështu duhet të mbes
KUR AFËR MEJE JE
Në qepalla agimesh të blerta zgjohem
Si ylber gëzimi ditët m’i ngjyron
Nektar ëmbëlsirë mjaltore fjala jote
Lumturi parajse prajshëm më dhuron
Kur afër meje je
Shkundullimë trallisëse zemrën ma pushton
Shikimi yt i trëndafiltë eliksir shpirti më bëhet
Ndjenjë përvëlore poreve të kurmit tim
Shkëlqim farfuritës rrezëllon
