[ Libra NëLinjë ]
Milazim Zeqiraj
Më 10 qershor 1878,
në Prizren,
fjala u mboll.
Ajo lëshoi rrënjë.
Tridhjetë e katër vjet më vonë,
më 28 Nëntor 1912,
në Vlorë,
nga duart tona
u ngrit flamuri kuqezi,
zemër për të gjithë.
Më 10 qershor 1999,
pas një shekulli e dy dekadash,
në Kumanovë,
stuhia që përgjaku tokën
u dorëzua.
Iku nga kishte ardhur.
Te ne mbetën
plagët,
dhimbja,
kujtesa
dhe emrat që nuk harrohen.
Agimi zbardhi
me lirinë e shumëpritur.
Në pragun e shtëpive të djegura,
jehona kishte vetëm një emër:
Liri
Më 10 qershor 2007,
në Tiranë,
Presidenti Bush,
me një fjali të vetme,
e kthjelloi qiellin:
“ Kosova do të jetë e pavarur.”
Më 17 shkurt 2008,
në Prishtinë
ajo fjalë u bë realitet.
Kosova u shpall shtet i pavarur.
Emra.
Vende.
Rrënjë.
Stuhi.
Frymë.
Liri.
Pavarësi.
10 Qershori:
një datë,
tri kujtesa,
një rrugëtim,
një komb.
Në pritje
të një 10 Qershori
që na bashkon.
Nëse harrojmë të kaluarën,
humbim edhe të ardhmen.
