VETËM TI JE DET
rreth e rreth teje
tokës i del përpara
dhe njerëzve
të mos shkojnë më tej
sepse vetëm ti je Det
me të njëjtën fytyrë
me kripën e pasosur
për jetën tonë pa mbarim
deti im
tymnajës e baltës përmbi tokë
këmbët më lidhen shpesh
e ti qiell më bëhesh o det
mbi krahë varkash fluturoj
përtej përtej
sa herë erdha Det të gjeta,
deti im i mirë me një fytyrë
GJINJTË DHE LËKURA
në t’u paçin shterur
e shtjerrë deri në brinjë
të dy gjinjtë
ti ke edhe një lëkurë
që bën shtrenjtë
i paskan thënë asaj
më tha ajo në besë
një lëkurë
që nën diell
e zeshk
e thek
e rreshk
i paskan thënë asaj
më tha ajo në besë
METODOLOGJIA E LANGONJVE
dimrit të tyre të cafullimit
caf caf caf
ndjekin lepuj
lart në mal
e poshtë në qytet
njerëz
caf caf caf
dimrit të tyre të cafullimit
NËSE SHEH PËRTEJ FASADËS
nëse sheh përtej fasadës
t’i nxjerrin rrezet iks nga sytë
e ikin prej nesh të bukurit zogj ikin
posa ta ndezë bishtukun e zbehtë agimi
