Shkruan: Florim Zeqa, 20.01.2024
Thirrje për reagim të faktorëve kompetent
Ideja e këtij shkrimi më lindi nga denoncimi publik në rrjetin social Facebook nga ana e një qytetari për rastin e hedhjes së mbeturinave afër Urës mbi lumin Lumbardh në hyrje të fshatit Dugajevë (Komuna e Klinës).
Njoftim për vetëdijësim
Postimi i plotë me pesë foto në Facebook: “Nga dita e djeshme, disa kamiona (një prej tyre pa tabela të regjistrimit), po bartin mbeturina nga ndonjë kompani dhe po i shkarkojnë buzë Lumbardhit të Pejës (Bishtricës), krejt afër vendbanimit të Dugajevës. Nuk bëhët fjalë për një zbarkim individual – ilegal, por mënyrë e organizuar e bartjes, në përmasa të mëdha (tonelata).
Qytetarët janë shumë të shqetësuar më këtë rast edhe për shkak përmbajtjës se atyre mbeturinave, të cilat mund të infektojnë lumin (ujin), ajrin dhe tokën. Mënyra e depozitimit së këtyre mbetjeve duke anashkaluar qytetarët dhe duke rrezikuar shëndetin e tyre është shqetësim me vete.
Sot janë njoftuar edhe organët Komunale dhe policia. Janë duke u njoftuar edhe mediat, në mënyrë që opinioni të sensibilizohet për këtë rrezik që po i kanoset popullatës së kësaj treve.
Të shpresojmë që do të ndërmirrën masa dhe të ndërpritet grumbullimi dhe depozitimi i këtyre mbeturinave. Në të kundërten, do të këtë veprime qyterare për të penguar këtë veprim të dëmshem në afërsi të lumit dhe vendbanimit”. (Nikollë Gojani)
Dukuria e hudhjes së mbeturinave, rutinë e zakonshme e njerëzve të pandërgjegjshëm
Dukuria e hedhjes së mbeturinave apo e krijimit të “Deponive” ilegale nuk është risi dhe as befasi në ditët e sotme! Për shkak, se nga paslufta e këndej, nga njerëz të pandërgjegjshëm dhe kompani famoze të oligarkëve të fuqishëm ekonomik gjithandej Kosovës i shfrytëzojnë brigjet e fshehta të lumenjëve dhe zonat rurale (fshatrat malore) për hudhjen e mbetjeve të prodhimeve të tyre apo mbetje tjera inerte të materialit ndërtimor!
Por, nuk janë vetëm prodhuesit dhe oligarkët ekonomik ata që i hudhin mbeturinat në vende të largëta nëpër zonat rurale, janë edhe qytetarët e papërgjegjshëm ata që po e ndotin dhe shëmtojnë ambientin e pastër të Republikës së Kosovës.
Si pasojë e papërgjegjësisë dhe kulturës së ulët qytetare, ndotje të ambientit me mbeturina kemi edhe nëpër lagjet e qyteteve të Kosovës, ku në çdo kënd apo kthinë të qyteteve kundërmon erë e mbeturinave.
Zgjidhja ekziston në bashkëpunimin e qytetarëve me organet e rendit
Rasti i fundit në fshatin Dugajevë të Komunës së Klinës e dëshmon mungesën e bashkëpunimit me organet e rendit. Si ka mundësdi që për ditë e netë të tëra të hudhen mbeturina me kamion dhe mos të fotografohet asnjë kamion me ose pa targa!
Mungesa e guximit qytetar e vështirëson identifikimin e keqpërdoruesve, në këtë rast të ndotësve më të mëdhenj të ambientit në Kosovë.
Ndotësit më të mëdhenj të ambientit, potencialisht janë bartës të kompanive të oligarkëve ekonomik apo njerëzve të afërt me të fortët e politikës. Ndryshe, nuk ka si të mos zbulohen ndotësit e mëdhenj që hudhin mbeturina ditën dhe natën në afërsi të vendbanimeve dhe brigjeve të lumenjëve!
Përmbajtja e mbeturinave çon në identifikimin e origjinës së mbeturinave, gjegjësisht pronarit i cili ka urdhëruar hudhjen e tyre në vendin e caktuar!
Brenda pak muajve, pas Bokshiqit u përdor edhe territori i Dugajevës në Komunën e Klinës për hudhjen e mbeturinave nga vende më të largëta nga komunat e tjera fqinjë!
Veprimet qytetare për të penguar dhe kundërshtuar këtë veprim të dëmshëm dhe të shëmtuar në afërsi të lumit Lumbardh dhe vendbanimit (Dugajevë) duhet të jenë imediate, sikurse që duhet të jenë imediate veprimet e organeve kompetente të Komunës së Klinës në trajtimin me urgjencë të këtij rasti tashmë të deponuar tek organet komunale.
Ndërgjegja e pastër është më e madhe sesa vlera e parasë dhe e posteve politike në Kosovën e sotme. Sa më shumë që të thellohet bashkëpunimi me organet e rendit dhe ligjit, aq më i vogël do të jetë numri i abuzimeve me mbeturina dhe ndotje të ambientit të pastër në Kosovë.
Pushtetarët e nivelit komunal dhe ata të nivelit qendror, tashmë janë në dijeni për gjendjen alarmante të ndotjes së lumenjëve dhe zonave rurale nga hedhja e mbeturinave. Por, si duket askush nuk e ka guximin t’ua prishë gjumin oligarkëve ekonomik për shkaktimin e kaosit higjienik në vendet më të pastra dhe më të bukura të Kosovës sonë.
Shpresoj që ky reagim imi t’i thërret ndërgjegjes së pushtetarëve komunal dhe atyre qendror në drejtim të ndërmarrjes së hapave urgjent për pastrimin e Lumbardhit dhe anekseve rrugore në zonat rurale të Komunës së Klinës dhe mbarë Kosovës!
