Postova para dy-tre ditësh mendimin e Jusuf Gërvallës për simulimet që kanë bërë agjenturat sekrete jugosllave, duke formuar organizata e parti “ilegale”, si preventivë taktike për t’i luftuar armiqtë e pushtetit monist titist.
Fatkeqësisht viktimat nuk po reflektojnë! PSE? Vazhdojmë me qenë të traumatizuar nga pasojat që na janë shkaktuar?
Deri tani, bazuar në indicie e dëshmi, kam identifikuar katër organizime “ilegale”, të formuara me iniciativë apo me urdhër të kundrove të agjenturave jugosllave:
1. Partinë Komuniste Marksiste-Leniniste Shqiptare në Jugosllav (PKMLSHJ / “kryetar” Abdullah Prapashtica).
2. Lëvizjen Nacional-Çlirimtare e Kosovës dhe Viseve Shqiptare në Jugosllavi (LNÇKVSHJ / “kryetar” Sabri Novosella).
3. Grupi Komunist Zëri i Kosovës (GKZK / “kryetar” Riza Salihu).
4. Fronti i Kuq Popullor (FKP / pa kryetar, i formuar me insistim të UDBashit Xhevat Ramabaja).
Tashmë e kam fut në observim edhe OMLK-në e dytë, kryetar i së cilës duhet të ketë qenë Xhabir Morina. Fatkeqësisht asnjë kuadër i saj, nuk po jep informacion konkret, kur dhe kush e ka formuar atë organizatë. Tipik është (dez)informimi i Xhavit Halitit, i bërë në një intervistë televizive: “në fund të vitit 1984 Skendër Luzha dhe Elife Luzha më kanë njohur me Xhabir Morinën dhe Hilmi Reçicën. Ata më kanë kooptuar në Komitet të OMLK-së”. [perifrazim]. Edhe Skenderi dhe Elifja po refuzojë të informojnë, kur e si e kanë njohur Xhavitin dhe a ka thënë të vërtetën ai. As Xhabiri nuk përgjigjet në pyetjet që ia kam bërë…
Edhe me Lëvizjen (LPK) kemi telashe. Tashmë manifestojmë dy “bashkime”: BASHKIMI i LNÇKVSHJ-së, OMLK-së dhe FKP-së, i ndodhur më 17 janar 1982, nga Jusuf Gërvalla, Kadri Zeka e Ibrahim Kelmendi, dhe “bashkimi” LNÇKVSHJ-së e PKMLSHJ-së, i ndodhur më 16 janar apo më 17 shkurt 1982, nga kryetarët Sabri Novosella dhe Abdullah Prapashtica, dhe bashkangjitja e OMLK-së (inekzistente), e ndodhur nga “përfaqësuesi” Xhafer Shatri, më 15 maj 1982. “Bashkimet” e 16 janarit, 17 shkurtit dhe 15 majit 1982, të teatralizuar nga marionetat komplotiste Sabri Novosella, Abdullah Prapashtica e Xhafer Shatri, po e përkrahin tifozët përkatës dhe ca dekadentë të karrabythët…
Mjerues është fakti, se viktimat e UDB-së, të cilët e kanë pësuar rëndë edhe me burgje shumëvjeçare, nuk po kanë kurajë të reflektojnë për mashtrimet dhe manipulimet që ua kanë bërë “kryetarët” e “organizatave ilegale”, të formuara nga UDB-ja. Përjashtim bën vetëm Ramadan Pllana, i cili ka rrëfye për shpërdorimet e komplotet që i ka bërë Sabri Novosella, si kryetar i LNÇKVSHJ-së.
Osman Osmani po shfaq zell për ta mbrojt PKMLSHJ-në, duke simuluar se nuk e dinë që “themeluesi” i saj, Abdullah Prapashtica, në vitin 1975 kur e ka themeluar “partinë” e tij, ishte kadet, ndoshta maturant, në akademinë që prodhonte kuadro profesionistë për agjentura sekrete jugosllave, e vetmja akademi në Jugosllavi e atij lloji në Novi Sad. Që i bie, mund që Abdullahu duhet ta ketë pas temë diplome formimin e “partisë ilegale”.
Karakteristik është rasti i Baci Hasan Ukhaxhaj. Ai në monografinë “Komiteti i Deçanit / LNÇKVSHJ”, botuar në vitin 2022 në Prishtinë, në aneksin “treguesi i emrave”, nën germën S në faqen 242, nuk e ka evidentuar fare emrin e Sabri Novosellës, “kryetarit” të përhershëm të LNÇKVSHJ-së. Nuk e ka evidentuar as Selatin Novosellën, edhe pse Selatinin e ka përmend në fusnotën 144, si “burim historik” për Statutin e Lëvizjes Nacional-Çlirimtare të Kosovës / LNÇKVSHJ-së. Pra, shkruan monografi për formim të “komiteteve” në kuadër të LNÇKVSHJ-së, pa prezantuar të dhëna, kur dhe kush e ka formuar atë organizatë dhe cili ishte “kryetar” i përhershëm i saj.
Meqë Komiteti i Deçanit është formuar me udhëzime të Jusuf Gërvallës në vitin 1980, çka nëse Jusufi në vitin 1981, pas 14 prillit 1981, kur ka filluar komunikimin e ndërprerë më 14 dhjetor 1979, i ka raportuar kryetarit të tij, Sabri Novosellës, për formim të Komitetit të Deçanit dhe për anëtarët e tij, e Sabriu, si UDB-ash që ishte, t’ia ketë përcjell ato informata UDB-së në Kosovë?! Fatkeqësisht Jusufi e ka besua e respektua Sabriun deri në idhullim!!
Për ata që nuk e dinë, më shumë se njëherë kam informuar për rolin kryesor që ka pas UDBashi Xhevat Ramabaja (“xhaviti”), në formimin e FKP-së në vitin 1978, por brenda pak muajsh ai është përjashtua e izolua. Megjithatë pasojat e komplotit të tij ishin të mëdha, sidomos për mua si individ, sepse qysh në vitin 1979 institucionet gjermane janë informuar për atë angazhim dhe ma kanë trus dosjen si “ekstremist”, duke ma ndaluar të drejtën për të qenë përkthyes në institucione hetimore e gjyqësore gjermane, edhe pse atëherë kishte deficit të madh për përkthyes gjermanisht-shqip [vetëm në raste kur nuk gjenin përkthyes, më angazhonin.]
***
Sabri Novosella, Abdullah Prapashtica, Riza Salihu, Xhevat Ramabaja & Co në shtetit jugosllav kishin përgjegjësi politike më të ultë, se ta zëmë Mahmut Bakalli, Ukshin Hoti, Ibrahim Rugova… Ata nuk kanë praktiku veprimtari kundërligjore kur kanë pranuar me udhëheq “organizata legale” të formuara nga agjenturat jugosllave. Por, të kundërligjshme kanë qenë mashtrimet që ua kanë bërë viktimave të tyre, duke i josh për anëtarësim dhe pastaj i kanë spiunuar, për t’u treguar të suksesshëm para eprorëve të tyre, se kanë “peshkuar” shumë “armiq të shtetit”.
Uroj, edhe të tjera viktima të reflektojnë, siç kemi vepruar Ramadan Pllana dhe unë, për ta konkretizuar edhe KAPJEN e UÇK-së nga marionetat kriminale e komplotiste Xhavit Haliti & Co, të cilët nuk do të mund të kishin aq shumë sukses në komplotet e tyre, nëse nuk do ta kishin përkrahjen e Kryesisë së LPK-së, gjegjësisht të Emrush Xhemajlit, Ali Ahmetit dhe Gafurr Elshanit, të cilët e kishin kap Kryesinë [ish-kuadro të OMLK-së së Xhabir Morinës].
Asnjëri nga këta nuk japin llogari, pse të gjitha mjetet financiare të Fondit “vendlindja thërret”, nga dhjetori 1993 deri në mars 1998, ia kanë dorëzuar vetëm Xhavit Halitit, e ai as 10 % të tyre nuk ia ka përcjell “koordinatorit” Nait Hasani. As Naiti nuk jep informacion, sa mjete i ka pranua nga Xhaviti dhe sa e si ua ka shpërnda grupeve guerile të UÇK-së në Kosovë.
Këto sabotime e komplote kanë bërë që Epopeja në Prekaz në mars 1998 ta gjejë UÇK-në pothuajse të zhbërë, për tu ngritë pastaj si feniks përmes vetorganizimit, duke sfiduar Serbinë dhe BKK (Bandën kriminale e komplotiste), në krye me Xhavit Halitin, Azem Sylën, Hashim Thaçin, Rexhep Selimin.
(ibrahim kelmendi)
