FJALË QË MUGULLOJNË
paska fjalë që mugullojnë si bima
farë që s’prishet është kujtimi
farë prej gjaku është dhimbja
paska fjalë
që mugullojnë si syth i bukur bime
mbi borën e çdo stine
TREG
lisat lirë
purtekat shtrenjtë
treg
mielli lirë
krundet shtrenjtë
treg
burgjet e varret e atdheut lirë
teserat shtrenjtë
treg
Naimi lirë
bejtexhinjtë shtrenjtë
treg
MIRAZHET E MARSIT
bënë fotografi shumë
nën breshërinë e blicave
në Lezhë në Korçë në Prekaz
bënë fotografi shumë
e hije të veta nuk panë
në Lezhë në Korçë në Prekaz
