Isak Ejupi, analog me ish-reprezentuesin me origjinë shqiptare në kombëtaren zvicerane Milaim Rama, karrierën prej futbollisti e nis vetëm me përvojën e bërë në lëndinën (savak-un) e axhës Rasim Ejupi në Vendenis të Besianës.
Nga loja me moshatarët e fshatit Isaku kah mesi i viteve të 80-ta,shkon në KF” Kristali” të Pejës, anëtar i Ligës së Parë Futbollistike të Kosovës.
Forca e bollshme fizike me pak avancime në teknikë Isakun e bëjnë njërin prej sulmueseve më të mirë të kësaj skuadre.
Ai gjatë kësaj periudhe e kryen edhe detyrën e policit të komunikacionit rrugor në Stacionin Rajonal të Pejës.
Meqë dy-tri vite më herët kishte studiuar në Shkollën e Lartë Komerciale të këtij qyteti, ai ishte njohur edhe me shumë sportistë të tjerë të dalluar nga Deçani dhe Burimi.
Në fillim të viteve të 90-ta,Isakun së bashku me kolegët e tij, regjimi diktatorial i Millosheviqit do t’i përjashtojë nga puna.
Ai këtë periudhë e konsideron nga më të rëndën, sepse një vit më herët me tanke e kërbaçë Serbia, kishte suprimuar edhe Autonominë e Kosovës, si paralajmërim që shqiptarët do t’i zhveshë edhe nga e drejta për të jetuar.
Ajo duke u munduar të zhbëjë çdo gjë shqiptare aplikon masa të dhunshme edhe në sport.
Pas këtij akti fashist dhe të pashembullt të gjithë futbollistët shqiptarë aktivitetin e tyre e vazhdojnë në livadhe e ara të Kosovës.
Krijimi i sistemit paralel të garave ishte mënyra e vetme për ta bindur armikun që shqiptarët nuk gjunjëzohen kurrë përpara tij.
Isaku në mungesë mjetesh materiale detyrohet të kthehet nga Peja në Vendenis të Besianës, ku edhe është i lindur.
Duke e konsideruar Lidhjen Demokratike të Kosovës si Lëvizje mbarëkombëtare angazhohet në radhët e saj.
Ai së bashku me karateistët e njohur Xhevat Makolli, Ymer e Nezir Rama, vëllezërit Zeqir e Fatmir Sopi, Fehmi Hoxha etj,gjatë viteve të 90-ta, do të angazhohen në ekipin për mbrojtjen dhe sigurinë e Presidendit Rugova, dhe vrojtimin e objektit të LDK-së, në Prishtinë.
Pikërisht në këtë objekt të ndërtuar nga pllaka iver nisin themelet e shtetësisë së Kosovës.
LDK-së u bë promotore e të gjitha aktiviteteve brenda vendit dhe jashtë tij. Deri me krijimin e LDK-së, shqiptarët u njohën fare pak në qarqet diplomatike të botës.
Imazhin dhe luftën e tyre të drejtë për liri e pavarësi e përbalte agjencia jugosllave e lajmeve Tanjug.
Ky fakt mund të vërtetohet fare lehtë edhe nga humumtimet në arkivat e Vjenës, Brukselit dhe Gjenevës.
Të gjitha ngjarjet e arkivuara mbi Kosovën i referohen Tanjugut, dhe si të tilla fillim e mbarim janë të pavërteta.
Dr. Ibrahim Rugova, kryetar i kësaj Partie të parë post-komuniste dhe President i vendit çdo të premte mbante mbledhje të rregullta.
Ai në këto mbledhje nëpërmjet kryetarëve të Degëve të Lidhjes Demoktatike të Kosovës e njoftonte popullin e tij mbi situtën e përgjithshme në Kosovë dhe rajon.
Dr. Rugova vijimisht shprehej optimist dhe ishte i sigurt që SHBA-të, do të jenë forcë çliruese e Kosovës,së robëruar nga Serbia.
Andaj, gjithë kapacitetin e tij intelektual dhe politikë e kishte orientuar me kohë në drejtim të SHBA-së.
Kur parashikimet e tij dolën të sakëta Isaku e shtoi edhe më tepër dashurinë dhe respektin ndaj Dr.Rugovës,të cilin edhe sot e ka idol.
Pas çlirimit të Kosovës nga Serbia, z. Isak Ejupi i kthehet profesionit të tij të dikurshëm.
Ai një kohë punon si Komandant i Stacionit Policor në Dardani e Kodër të Trimave në komunën e Prishtinës.
Punën e tij e përshkon guximi dhe maturia. Edhe pse armiku kishte plaçkitur dhe rrënuar gjithçka z. Ejupi nuk dorëzohet. Ai dhe ekipi i tij i konsolidojnë shpejt radhët.
Ata në krye të aksioneve vendosin djem të shkathët,të cilët me gjakëftohësi dhe profesionalizëm i parandalojnë tentativat për krim dhe vjedhje,të bandave të ndryshme kriminale,në këtë pjesë të kryeqytetit të Kosovës.
Detyrën prej udhëheqësi të lartë policor z. Isak Ejupi do ta vazhdojë në dy-tri mandate edhe në Stacionin Policor të komunës së Besianës.
Ai për sukseset e treguara në punë nga Policia e Republikës së Kosovës ngritet në gradën e Majorit.
Suksesin e z. Ejupi në rujtje rendi dhe qetësie e pati vlersëuar lartë edhe z. Agim Veliu ish-kryetar shumëvjeçar i komunës së Besianës.
Ai pati organizuar për të gjithë të suksesshmit një Akademi solemne, ku për meritat në normalizimin e gjendjes dhe të sigurisë në komunën e Besianës,z. Ejupi dhe ekipin e tij,i pati shpërblyer me medalje dhe mirënjohje.
z. Isak Ejupi edhe pse i ka kaluar të 60-tat, pasion e ka futbollin. Ai mbi një dekadë e ka kryer detyrën e Arbitërit kryesor dhe Delegatit në Superligën e Futbollit të Republikës së Kosovës.
Isak Ejupi në cilësinë e mbikqyrësit të referimit duke u konsultuar me arbitërin e futbollit Ilir Shuleta
Ndarja e drejtësisë me korrektësi në fushat e futbollit të Republikës së Kosovës,dhe paanshmëria kanë bërë që Isaku,nga njohësit e vërtetë të futbollit të cilësohet edhe si Arbitër i rangut evropianë.
Dashurinë për ndarje drejtësie në ndeshje futbolli Isaku e mbolli edhe tek i biri, Alban Ejupi.
Albani sikur dikur babai i tij me mjaft sukses po e kryen detyrën e gjyqtarit anësor të futbollit në Superligën e Republikës së Kosovës.
Isak Ejupi duke qënë gjithnjë në hap me kohën më 2009, me disa shokë të tij themelojnë “Fedaratën Sportive të Punëtorëve të Republikës së Kosovës” Atij si njërit nga nismëtarët i besohet detyra e zëvendëskryetarit të saj.
Një muaj më vonë po me iniciativën e z. Ejupi në komunën e Besianës,krijohet “Shoqata e Sporteve Marciale të Llapit.
Isaku me një përvojë të gjatë në organizim të ngjarjeve sportive edhe në këtë institucion të rinj të sportit llapjanë e jep kontributin e tij.
Sot, z. Ejupi e kryen funksionin e anëtarit të Komisionit të Garave pranë Fedaratës së Futbollit të Republikës së Kosovës.
Nga e djathta Isak Ejupi, Abdyl Bellopoja dhe Agim Kastrati
Një jetë në mbrojtje të rendit dhe të qetësisë,si dhe ajo pak kohë e lirë e shpenzuar në zhvillim dhe masovizim të sportit të Republikës së Kosovës,bëjnë që edhe z.Isak Ejupi të jetë pjesë e listës së emrave të paharruar!
ARIF EJUPI
