Fjalët që mbjellin shpresë të autorit Ruzhdi Gashi

Zymer Mehani

Ruzhdi Gashi, një autor i përkushtuar ndaj zhvillimit personal dhe fuqizimit të mendjes, ka sjellë për lexuesit dy libra frymëzues: “Sot jam më mirë se dje, nesër do të jem më mirë se sot” dhe “Ti je fituesi”. Përmes një stili të ngrohtë dhe motivues, Gashi fton lexuesin në një udhëtim vetëreflektimi, rritjeje dhe besimi në potencialin e tij të brendshëm. Këto vepra nuk janë thjesht fjalë në letër, por udhëzime për të kapërcyer sfidat e përditshme dhe për të ndërtuar një jetë më të mirë, një ditë pas tjetrës.

1.
Ka momente në jetë kur gjithçka rreth teje hesht

– jo sepse është paqja, por sepse bota pret me padurim të rrëzohesh. Të gjithë ata që dikur qeshën me ty, që të panë me mosbesim, tani janë në pritje. Në heshtje. Në hijet e vetëbesimit të tyre të rremë, ata ndihen të sigurt që rrëzimi yt është i pashmangshëm. E ti – në mes të kësaj pritjeje të ftohtë, në një betejë të heshtur mes qëndresës dhe lodhjes – ke vetëm një zgjedhje të vërtetë: të vazhdosh rrugën tënde.

Ky libër është lindur nga një udhëtim që nuk ka qenë as i lehtë, as i drejtë, por gjithmonë i vërtetë. Nuk është rezultat i teorive, por i përplasjes me realitetin. Është zëri i një njeriu që ka parë se si njerëzit largohen kur ke më shumë nevojë, që ka ndier peshën e paragjykimeve, dhe që ka kuptuar se jeta të jep më shumë mësime kur nuk i kërkon.

Fjalët që gjenden në këto faqe nuk janë të menduara për t’u dukur bukur. Janë të thjeshta, ndoshta edhe të dhimbshme, por të ndershme. Ato janë shenja rrugësh që autori Ruzhdi Gashi ka kaluar vetë – në heshtje, në vetmi, në reflektim – dhe që tani don t’i ndajë me ne, jo për të na udhëhequr, por për të na kujtuar se edhe ne e kemi fuqinë për të qëndruar në këmbë kur bota na do të rrëzuar.

Ky libër është për të pathyeshmit e qetë; për ata që zgjedhin të mos bëjnë zhurmë me dhimbjet e tyre, por të ecin përpara me dinjitet; për ata që, ndonëse janë goditur fort nga jeta, nuk e kanë humbur as besimin, as shpirtin e mire; për ata që nuk kërkojnë lavdërime, por kuptim; për ata që kanë mësuar se rruga më e vështirë është ajo që të formon më shumë.

Në çdo kapitull do të gjejmë një copëz zemër, një grusht mendimesh, një pasqyrë për të parë veten. Disa fjali do të na prekin si plagë që ende nuk janë mbyllur. Disa të tjera do të na japin një ndjesi qetësie që nuk e kemi ndjerë prej kohësh. E mbi të gjitha, do të ndjejmë se nuk jemi të vetëm.

“Sot jam më mirë se dje, nesër do të jem më m i r ë se s o t” nuk është vetëm një thirrje për guxim,

por është një ftesë për të jetuar me përulësi, por prore me force; për të heshtur kur duhet, por edhe për të folur kur zëri ynë ka peshën e së vërtetës; për të pranuar veten me gjithë plagët dhe gabimet, dhe për të mos harruar kurrë se drita më e pastër lind pas errësirës më të thellë.

Lexojeni këtë libër ngadalë. Merrni kohë për çdo fjalë, sepse mund të jetë edhe i juaji. Dhe nëse në fund të leximit ndiheni më i qetë, më të fortë, më të vërtetë – dijeni se keni filluar të ecni me guxim në rrugën tuaj… dhe kjo është fitore më vete.

2.
Jeta është një udhëtim i ndërlikuar, i mbushur me sfida, vendime të vështira, përballje me vetveten dhe botën përreth. Në këtë udhëtim nuk ka një hartë universale, por ekziston një busull e brendshme që na udhëzon — ndërgjegjja, vetëdija, besimi dhe dashuria. Ky libër nuk është thjesht një përmbledhje thëniesh apo mesazhesh motivuese; është një thirrje për të zgjuar forcat që kemi brenda nesh, për të ndriçuar vetë jetën tonë me dritën që shpesh herë e kërkojmë jashtë.

“Ti je fituesi” është një udhëtim përmes vetëdijes, vetëbesimit, qëndrueshmërisë dhe pjekurisë shpirtërore. Çdo kapitull është një stacion reflektimi, ku lexuesi ndalet për të dëgjuar zërin e brendshëm, për të kuptuar rrugëtimin e vet dhe për të gjetur motivimin për të ecur përpara, pa u dorëzuar.

Ky libër është për ata që janë lodhur nga paragjykimet, për ata që janë rrëzuar por kanë vendosur të ngrihen, për ata që kërkojnë kuptim në një botë që shpesh ngjan e zhurmshme dhe e zbrazët. Në një kohë kur shumëkush shikon jashtë për të gjetur përgjigje, ky libër ju fton të shikoni brenda vetes, atje ku fshihet forca më e madhe: bindja se je vetë drejtuesi i jetës sate.

Nëse ke menduar ndonjëherë se nuk je mjaftueshëm i fortë, i mençur apo i vlefshëm — kjo vepër është për ty. Jo për të të joshur me fjalë të bukura, por për të të zgjuar nga gjumi i dyshimit dhe për të të kujtuar: fitorja më e madhe fillon me një hap të vogël drejt vetvetes.

Me këtë libër, autori Ruzhdi Gashi të fton në një bashkëbisedim të heshtur me shpirtin tënd. Lexoje me zemër hapur, sepse, ndoshta, diku në këto faqe, do të gjesh pjesën që të ka munguar për të besuar sërish te vetja.

Kur faqja e fundit mbyllet, një udhëtim i brendshëm sapo ka nisur.
Ky libër nuk pretendon të ketë dhënë të gjitha përgjigjet. Ai është thjesht një pasqyrë, ku secili prej nesh mund të shohë veten — në momentet e dobësisë, të forcës, të dashurisë, të vetmisë, të rënies dhe ngritjes. Çdo mendim i përfshirë në këto faqe ka lindur nga përvoja njerëzore, nga dhimbja dhe shpresa, nga realiteti dhe ëndrra, nga përballjet me jetën që nuk kursehet ndaj askujt.

Nëse nga ky libër ke marrë vetëm një mesazh që të ka bërë të ndalesh për pak të reflektosh — që të ka bërë të kthesh sytë nga brenda — atëherë ai ka përmbushur qëllimin e tij.

“Ti je fituesi” nuk është një përfundim, por një fillim i ri. Një ftesë që, pas çdo stuhie, të mos ndalosh së besuari se dielli do të lindë përsëri. Një kujtesë se, edhe nëse rruga është e pjerrët dhe vetmia troket, ti ke fuqinë të mbijetosh, të ndryshosh dhe të lulëzosh, sepse e vërteta është kjo: fuqia më e madhe që do të kesh ndonjëherë, është besimi që mbart brenda vetes.

Faleminderit që e more këtë udhëtim me këtë libër. E ardhmja është para teje — dhe ajo pret që ta formësosh, jo me frikë, por me guxim dhe me vetëdijen që fituesi jeton brenda teje.