Llapashticë e Poshtme – Podujevë, Ali Murat Murati, fotografuar më 11 shkurt 1994 nga z. Sylejman Blaku.
NGA ARIF EJUPI
Sqarim për opinionin dhe z. Shkëlzen Gashi.
Një fotografi e të ndjerit Ali Murat Murati nga fshati Llapashticë e Poshtme e komunës së Podujevës, keqtrajtuar nga Policia serbe më 11 shkurt të vitit 1994 nën pretekstin e armëmbajtjes pa leje e publikuar nga publicisti Shkëlzen Gashi në rrjetin social Facbook, që pas pak minutave i vërshoi gazeta e portale na shtyri të sqarojmë me sa vijon:
Në periudhën kur është keqtrajtuar z. Ali Murat Murati në komunën e Podujevës kanë vepruar Lidhja Demokratike e Kosovës-dega në Podujevë dhe Këshilli për Mbrojtjen e të Drejtave dhe Lirive të Njeriut me Nënkëshillin e tij në këtë qytet.
Aktivistë të KMDLNJ-së dhe të Komisionit për Informim që vepronte në kuadër të LDK-së, në të gjitha qytetet e Kosovës, kanë evidencuar keqtrajtimet, burgosjet dhe vrasjet që i bënte Serbia mbi shqiptarët duarthatë dhe të pambrojtur.
Kushtet e punës ishin tepër të rënda e po ashtu ekzistonte rreziku i përhershëm për t’u kapur çdo çast nga policia serbe dhe shërbimet sekrete të saj.
Përkundër kësaj në vendngjarje pas largimit të ekspeditave policore në Llapashticë të Poshtme, patën shkuar Dr. Selman Hoxha dhe Sylejman Blaku, anëtarë të KMDLNJ-Nënkëshilli në Podujevë.
Aliu që në dokumente zyrtare datëlindje e kishte 11 shkurtin e vitit 1904, e që në fakt ishte i lindur më 11 shkurt 1913,ndihmën e parë në ditën kritike do ta marrë nga Dr. Selman Hoxha, kurse fotografitë me pamje nga rrahja çnjerëzore do t’i bëjë z. Sylejman Blaku.
Në mënyrë që cilësia e fotografive të jetë sa më e mirë Ibrahimi dhe Ganiu, djem të Aluit e sjellin atë në studion “Konica” të vëllezërve Sabit e Naim Kqiku, të cilët me origjinë ishin nga komuna e Gjilanit, por veprimtarinë e tyre e zhvillonin në Podujevë, në lokalin e marrë me qira nga z. Faik Maçastena.
Fotografët Sabit e Naim Kqiku dhe Lulzim Agush Blakçori patën shprehur gatishmërinë që çdo rast keqtrajtimi ta fotografonin pa kompensim, por të keqtrajtuarit duhej të silleshin fshehtas në studiot e tyre, ngase druanin që aktiviteti i tyre mund të zbulohet nga policia serbe.
Një pjesë të madhe të fotografimeve në terren e kryenin edhe anëtarët e KMDLNJ-së, Sylejman Blaku Dr. Selman Hoxha, Nexhmi Balaj dhe Fehmi Rrahman Blakçori.
Të shumtën e rasteve i shoqëruar nga anëtari i KMDLNJ-së-Nënkëshilli në Podujevë z. Arif Ejupi të keqtrajtuarit në shtëpitë e tyre apo ilegalitet i fotografonte Lulzim Agush Blakçori, atëherë vetëm 19 vjeç.
Ai më 28 gusht të vitit 1993 pasmesnatës pati shkuar në familjen Dudi të Llaushës së Podujevës, ku i pati fotografuar të keqtrajtuarit rëndë Liman Ajet Dudi, Bedri Liman Dudi, Nexhmi Liman Dudi dhe Hilmi Ilaz Dudi.
Kurse ndihmë mjekësore të lënduarave u ofronin mjekët : Selman Hoxha, Ali Lahu, Bardhyl Abrashi dhe Muharrem Avdiu.
Ndërkaq, rastet e rënda me çrregullime kardiake dhe komplikime të frymëmarrjes i trajtonte prof.dr.Abdylatif Fusha, mësimdhënës i lëndës së sëmundjeve të brendshme në Fakultetin e Mjekësisë të Universitetit të Kosovës, që së bashku me kolegun e tij prof.dr. Shaban Geci e mbanin një Ordinancë private në Prishtinë.
Fotografët, Kqiku dhe Blakçori çdoherë një kopje të fotografive ua jepnin personave të autorizuar nga KMDLNJ- Nënkëshilli në Podujevë.
Pas mbajtjes së mbledhjeve të rregullta të shumtën e herëve në Mini-marketin “Vlora”të pronarit Behxhet Shala-Bajgora e herë-herë edhe në ambientet e xhamisë “Met Podujeva” fotografive u bashkëngjitej teksti mbi ngjarjen dhe një dokument identiteti.
Pastaj dosjet e kompletuara përcilleshin në selinë e KMDLNJ-së dhe në Qendrën për Informim të Kosovës, në Prishtinë.
Pjesa e teksteve në Prishtinë përcillej nga tele-faxi i zotit Astrit Shabani i cili e kishte një pikë grumbullimi të kërpudhave në Podujevë të destinuara për ndërmarrjet sllovene.
Të nesërmen të gjitha ngjarjet Qendra për Informim e Kosovës, i përmblidhte në Informatorët e saj ditor të publikuar në Gjuhën Shqipe dhe Angleze.
Ndërkaq, KMDLNJ përgatiste Buletin Javor në shqip-dhe anglisht, i cili përcillej në qendrat vendimmarrëse të botës.
Këto informata botoheshin edhe në gazetat “Zëri i Ditës”, “Bujku” dhe “Forumi “ Rasti i z. Ali Murat Murati në Amnesty Internasional të Londrës është përcjell nga QIK-u dhe KMDLNJ.
Përfaqësues të KMDLNJ-së, kanë prezantuar në të gjitha Nënkomisionet e të Drejtave dhe Lirive të Njeriut të mbajtura dy herë brenda një viti në Gjenevë të Zvicrës.
Atyre ky prezantim u është mundësuar nga “Fédération internationale pour les droits humains” e Parisit. Edhe pse në kushte të rënda delegacionet e KMDLNJ-së, kanë bërë punë të jashtëzakonshme.
Ato të përfaqësuara nga prof.dr.Zenjullah Gruda, ekspert i të Drejtës Ndërkombëtare Publike, prof.dr.Ymer Jaka, profesor shumëvjeçar në Katedrën e Frëngjishtes së Universitetit të Kosovës, prof. Ismet Berdynaj, njohës i shkëlqyer i gjuhës angleze dhe me një përvojë prej përkthyesi në Shtëpinë e Bardhë në SHBA dhe të rejave Zinaide Kuçi e Mimoza Ahmetaj të gjitha vrasjet, keqtrajtimet dhe format e tjera të dhunës në Kosovë të ushtruara nga Serbia në këto Nënkomisione janë prezentuar ashtu siç duhet.
Në mbarëvajtjen e punëve kanë ndihmuar edhe inxh. Ibrahim Sh. Makolli i cili si njohës i programeve të shumta të informatikës me orë të tëra ka punuar në shtypjen dhe sistemimin e materialeve.
Ai një pjesë të punës sidomos në orët e vona të natës e bënte së bashku me z. Lufti Kelmendi, bloger i portaleve “Kosova.info” dhe “Trepça.net “
Po ashtu Ministria e Informatave të Kosovës në Gjenevë e udhëhequr nga zoti Xhafer Shatri, të gjitha materialet që vinin nga Kosova dhe trojet tjera shqiptare i përkthente në gjuhën frënge si dhe ato në anglisht të përgatitura në Prishtinë, porsa i pranonte i shpërndante në mijëra adresa në Evropë e SHBA.
Në anën tjetër nën përkujdesjen e prof.dr.Ymer Jaka dhe z. Arif Ejupi në qytete të ndryshme të Zvicrës dhe Francës janë prezantuar ekspozita të shumta me pamje nga tmerret në Kosovë.
Falë prezantimit të këtij gjenocidi me prova në adresë të zotit, Jaka dhe zotit, Ejupi vije edhe kjo letër falënderimi.
Pastaj, organizata të shumta dhe individë nga mbarë Franca dërgojnë kontingjente me ndihma në Shqipëri, enkas për të ikurit e luftës nga Kosova.
Përpjekjet e disa individëve për ta mohuar punën e një brezi të tërë dhe për t’i hedhur baltë punës së tyre me njëmijë sakrifica janë të ulëta dhe aspak njerëzore.
ARIF EJUPI
P.S. Autori është aktivist shumëvjeçar i KMDLNJ, dhe përfaqësues i tij më 1999 në Nënkomisionet e të Drejtave dhe Lirive të Njeriut pranë OKB-së, në Gjenevë.
