[ Libra NëLinjë ]
Foto: Z. Ramiz Lladrovci (djathtas) Kryetari i Drenasit, dhe Safet Sadiku përfaqësues i kompanisë zvicerane “Planeteconstructions.com”, për vendet e rajonit: Shqipëri, Kosovë, Maqedoni etj.
Pas vizitës në Drenas:
Nga Safet Sadiku
Gjatë një takimi pune që pata me kryetarin e Komunës së Drenasit, z. Ramiz Lladrovci, u prezantua teknologjia amerikane “Clean Water”, e implementuar (në disa vende) nga kompania zvicerane Planeteconstructions.com, si një zgjidhje e avancuar për trajtimin e ujërave të ndotura dhe kthimin e tyre në ujë të pijshëm. Kryetari Lladrovci e mirëpriti me vizion dhe angazhim këtë mundësi, duke theksuar se komuna përballet me vështirësi serioze për pastrimin e ujërave të zeza që prekin mbi 10 mijë banorë, ndërsa tashmë janë identifikuar pesë pika strategjike ku duhet të vendosen kolektorët, si projekte që kërkojnë investime moderne, teknologji bashkëkohore dhe partneritet serioz.
Bashkëpunimi nuk do të ndalet vetëm këtu, por pritet të shtrihet edhe në fusha të tjera të rëndësishme siç janë sistemimi i mbeturinave sipas standardeve të BE-së, teknologjitë moderne për ndërtimin dhe mirëmbajtjen e rrugëve, investimet në energji të gjelbër, përfshirë energjinë diellore dhe atë të erës, si dhe projekte të tjera ekonomike që do të kontribuojnë në zhvillimin e qëndrueshëm të komunës.
Të gjitha këto janë tema konkrete që tashmë kanë nisur të marrin formë dhe që pritet të fillojnë në një të ardhme të afërt, duke treguar vizionin për një Drenas modern dhe të qëndrueshëm. Në këtë kuadër, duhet theksuar se në katalogët zyrtarë të kësaj teknologjie, se udhëheqës i këtyre projekteve është z. Avni Nasufoski, i cili me përvojën dhe profesionalizmin e tij po orienton punën drejt zbatimit praktik të këtyre projekteve. Roli i tij garanton jo vetëm menaxhim të mirëfilltë teknik, por edhe besueshmëri në realizimin e projekteve madhore, duke e bërë këtë bashkëpunim më të strukturuar dhe më afatgjatë, edhe me instutucione në vendin tonë.
Edhe përjetimi im nga afër në këtë takim pune me z. Lladrovci, është vetëm një dëshmi e qasjes së tij si udhëheqës, i cili nuk e sheh zhvillimin si një fjalë të thjeshtë politike, por si një proces të përditshëm, të matshëm dhe të bazuar në realizimin e projekteve konkrete që ndikojnë drejtpërdrejt në jetën e qytetarëve. Në fakt, gjatë mandateve të tij në krye të Drenasit, z. Ramiz Lladrovci ka dëshmuar një qasje të strukturuar dhe të disiplinuar, ku të gjitha projektet e planifikuara në planin vjetor dhe katërvjeçar janë realizuar në kohë dhe me korrektësi, duke e bërë këtë komunë një shembull të qeverisjes efikase dhe të përkushtuar në Kosovë. Ndër investimet më të rëndësishme të viteve të fundit veçohen rrjetet e ujësjellësit dhe kanalizimeve, të cilat kanë përmirësuar ndjeshëm jetesën e banorëve në shumë fshatra të komunës; ndërtimi dhe rikonstruksioni i shkollave dhe objekteve arsimore, që kanë krijuar kushte më të mira për mësim dhe edukim; investimet në rrugë lokale, ndriçim publik dhe infrastrukturë urbane, të cilat kanë sjellë zhvillim të balancuar edhe në zonat rurale, si dhe mbështetja për projekte në bujqësi dhe sektorin privat, që kanë gjallëruar ekonominë lokale dhe kanë krijuar vende pune. Lladrovci njihet gjithashtu për korrektësinë e tij në marrëdhëniet me institucionet qendrore dhe me partnerët ndërkombëtarë, duke krijuar një model të bashkëpunimit ku fjala e dhënë dhe plani i paraqitur kthehen në vepra të prekshme.
Pikërisht kjo qasje ka bërë që jo vetëm qytetarët e Drenasit, por edhe ministritë dhe institucionet e nivelit shtetëror ta shohin atë si një administrator të besueshëm dhe si një lider lokal, i cili i shtyn projektet përpara pa vonesa dhe pa kompromise që cenojnë interesinr publik. Figura e tij lidhet ngushtë edhe me trashëgiminë e sakrificës kombëtare, pasi ai është vëllai i dëshmorit Fehmi Lladrovci, i rënë heroikisht në frontin e luftës për lirinë e Kosovës, çka e bën punën dhe angazhimin e tij në institucionet publike një vazhdimësi të natyrshme të ëndrrës së dëshmorëve për një Kosovë të lirë, moderne dhe me institucione funksionale. Pikërisht kjo lidhje mes sakrificës dhe zhvillimit e bën veprimtarinë e tij një shembull të modelit të udhëheqësit që jo vetëm respekton amanetin e dëshmorëve, por edhe e materializon atë përmes punës konkrete për zhvillimin ekonomik e shoqëror të vendit. Ky është modeli i politikanit vizionar, i cili në të gjitha rrethanat që nga pas lufta e gjer më tani, ka dëshmuar ruajtjen e vlerave të luftës dhe të UÇK-së.
Në këtë kuadër, gatishmëria e tij për të pranuar teknologji të reja ndërkombëtare, si ajo e Planeteconstructions.com, dëshmon se vizioni i tij nuk është thjesht lokal, por i orientuar drejt integrimit të standardeve bashkëkohore dhe drejt krijimit të një mjedisi të pastër ku banorët e Drenasit përfitojnë drejtpërdrejt nga risitë teknologjike që aplikohen në vende më të zhvilluara. Ky hap i ri, i fokusuar në pastrimin e ujërave të zeza dhe kthimin e tyre në ujë të pijshëm, është një tregues i qartë se Drenasi synon të bëhet model i zhvillimit të qëndrueshëm dhe i menaxhimit modern të resurseve natyrore. Në fund, veprimtaria e z. Ramiz Lladrovci si kryetar i Drenasit është shembull i një lidershipi që kombinon përvojën, disiplinën dhe vizionin, duke treguar se vetëm përmes punës së përditshme, seriozitetit dhe respektit ndaj qytetarëve mund të ndërtohet një administratë funksionale, e cila jo vetëm që i përmbush planet, por edhe i tejkalon pritjet.
Një përjetim i veçantë për mua ishte se takimi me z. Ramiz Lladrovci, i cili, pavarësisht angazhimeve të shumta që kishte me bordet e komunës, gjeti kohë për të më pritur me ngrohtësi dhe me një qasje tejet miqësore. Ky gjest i tij tregon jo vetëm përkushtimin ndaj detyrës, por edhe respektin e sinqertë që ai ka për njerëzit, për bashkëpunëtorët dhe për idetë e reja që lidhen me zhvillimin e komunës së Drenasit. Natyrisht se bashkëpunimi me kryetarin e Komunës së Drenasit, z. Ramiz Lladrovci, nuk do të kufizohet vetëm në projektet që lidhen me ujërat e ndotura, por do të zgjerohet edhe në fusha të tjera me rëndësi jetike për zhvillimin e qëndrueshëm, siç janë teknologjitë moderne për sistemimin e mbeturinave sipas kërkesave të Bashkimit Europian, aplikimi i teknologjive të avancuara për ndërtimin dhe mirëmbajtjen e rrugëve, mundësitë e investimeve në projekte të energjisë së gjelbër, përfshirë energjinë diellore dhe atë të erës, si dhe një sërë projektesh të tjera ekonomike që synojnë rritjen dhe modernizimin e komunës.
Të gjitha këto iniciativa nuk janë thjesht vetëm informacion në letër, por tema konkrete që tashmë kanë filluar të hapen dhe pritet të marrin formë në një të ardhme të afërt, duke dëshmuar një qasje vizionare dhe të guximshme në përballimin e sfidave të kohës. Ky bashkëpunim i trefishtë në mes institucioneve vendore, kompanisë zvicerane (ndërkombëtare), Planeteconstructions.com dhe ekspertizës së z. Avni Nasufoski, është një garanci e fortë se projektet e ardhshme nuk do të mbeten premtime, por do të kthehen në realitet, duke përmbushur përmisimin e kushteve të qytetarëve të Drenasit, për një Kosovë më të zhvilluar, më të drejtë dhe më moderne.
Duhet theksuar se, pavarësisht ngecjeve politike, vonesave në konstituimin e Kuvendit të Kosovës dhe mungesës së një qeverie funksionale, (gjatë këtyre ditëve, dhe prej disa muajsh), këto ditë kam pasur mundësinë të zhvilloj takime edhe me ekspertë aktivë në kuadër të institucioneve shtetërore, të cilët kanë shfaqur gatishmëri dhe përkushtim për të ecur përpara me projekte të shumta infrastrukturore që i ofron kompania Planeteconstructions.com, duke dëshmuar se zhvillimi i vendit nuk mund dhe nuk duhet të ndalet…! Përkundrazi, duhet të gjejmë format e duhura që përmes bashkëpunimit, profesionalizmit dhe integrimit të teknologjive bashkëkohore, edhe në vendin tonë të përfitojmë thithjen e investimeve nga fondet që i mbështesin këto teknologji.
