[ Libra NëLinjë ]
Në përkujtim të Ditës së Flamurit – Ditës së Pavarësisë së Shqipërisë të Plakut të urtë të kombit, Ismail Qemali dhe Vlora historike, në organizim të KSHA-së do të mbahet manifestimi tashmë tradicional të ngritjes së Flamurit në Qendrën e qytetit Richard J. Daley në Çikago. Po bëhet një shekull nga ardhja e diasporës shqiptare në vendin e lirë të demokracisë në Amerikë, këndej detit si thoshte De Rada për të nisur një jetë dhe një frymë të re të familjes shqiptare. Në këto vite, diaspora shqiptare nga të gjitha trevat etnike të Shqipërisë zyrtyre dhe Shqipërisë tjetër Kosovë, erdhën në Amerikën e tokës dhe të demokracisë së lirë dhe, u rreshtuan në udhët e jetës, të punës, të shkollimit, të integrimit me popullin amerikan.
Në shtetin e Ilinoisit në qytetin modern në Çikago, diaspora ndër vite ishte një zë i fuqishëm në kërkim të Lirisë dhe Pavarësisë së Kosovës si dhe përkrahja për ndryshimin e regjimit komunist në Shqipëri për të marrë drejtimin me diellin e familjes së lirë evropiane dhe në miqësi të përjetshme me Amerikën. Në Çikago në shekullin e kaluar dhe në këto vite, pati shumë veprimtari e ngjarje për të mbajtur gjallë shpirtin e shqiptarëve, ndonëse po në këtë qytet, ishte thirrja e zëshme se,ne nuk kemi tjetër atdhe pos tokës së shenjët të shqiptarizmës të Shqipërisë Etnike.
Me rastin e festës së Flamurit Kuqezi, po përkujtojmë veprimtarët të frymës kombëtare, që ndër vite e bartën lartë e më lartë Flamurin Shqipar në Amerikë dhe, me të gjitha institucionet e shtetit në Washington (Kongresit dhe Senatit) e kishin derën e hapur, kur e kur kërkohej ndihma e shtetit mik për të ndihmuar çlirimin e Kosovës, si njëra nga plagët e dhimbje së madhe të kombit shqiptar, të pushtimit e të ripushtimit serbo-jugosllav.
Në dritën e analeve të historisë, veprimtarët në Çikago, Hydajet Bregu, i cili në fund të jetës pati lënë testament 5 milionë dollar nga pasuria e tij për të hapur shkolla apo katedrën në ndonjë universitet për gjuhën shqipe për brezat e rinj dhe të interesuarit amerikanë. Në udhën e gjatë të veprimtarëve po përmendim Isuf Azemi, Qazim Ismaili, Faik Hajroja, Tefik Ashiku, Ajet Rushiti, Ilaz Dragovoja dhe të tjerë e të tjerë.
Diaspora shqiptare në Amerikë, sot feston më këngë e valle dhe të veshur kuqezi, Flamurin Shqiptar e vendosin në qendër të Çikagos në shenjë nderimi dhe respekti për shtetin mik të përjetshëm të Amerikës, që, nëpër vite të vështira i doli në mbrojtje kombit shqiptar dhe Shqipërisë.
Qoftë i përjetshëm Flamuri Shqiptar Kuqezi dhe Shqipëria Etnike, thuhet në porosinë e sotme nga diaspora shqiptare në Amerikë!
Skënder Karaçica
