[ Libra NëLinjë ]
Poezi nga Rexhep Çullhaj..
Ç’kërkoni?
Ç’kërkon ti, kohë tradhtare,
që troket sërish në portën e shpirtit tim?
Ç’kërkon ti, errësirë e egërsuar,
që vjen e mbështjell çdo dritë që ndez?
Ç’kërkoni nga unë?
Ç’kërkoni të më rrëmbeni?
Largohuni! Nuk ju dua.
Nuk ju njoh më. Nuk keni më vend në zemrën time.
Më lini në qetësinë time.
Mos ma trazoni heshtjen,
mos m’i zgjoni plagët që mezi kanë pushuar së dhemburi.
Më lini të ëndërroj,
aty ku koha nuk tradhton dhe errësira nuk gëlltit shpresën.
Ç’doni ende?
A nuk ju mjaftuan vitet, lotët dhe heshtjet?
Largohuni! Largohuni!
Sepse unë do të zgjedh dritën,
edhe kur nata të jetë e pafund.
Do të zgjedh jetën, edhe kur koha të më sfidojë.
Ju nuk më përkisni më. Largohuni.
