Gani I. Mehmeti
Nuk do doja të vinte çështja deri tek dyshimi im i shfaqur haptas. Mirëpo, kërkesat e Escobarit ndaj Kosovës tejkaluan larg atyre të mundshmeve. Ndërkaq, sa i përket Serbisë, Escobar as që e përmend, përveç shkurt ngjarjen terroriste të 24 shtatorit 2023 në Banjskë të Zveçanit.
Këtu shihet mirë se kërkesat e Escobarit nuk përkojnë me ato të Shteteve të Bashkuara të Amerikës. Ne vazhdimisht kemi falënderuar dhe u kemi qenë mirënjohës SHBA për gjithçka që bënë për Kosovën deri sot, por sot, me kërkesat e tepërta ndaj Kosovës, lë vend se Escobar është i blerë nga serbët. Krejt presioni që i bëhet Kosovës është gabim dh ky presion do duhej të ishte në palën tjetër, për Serbinë, e cila haptas është deklaruar se nuk do të zbatojë marrëveshjen e Brukselit dhe të Ohrit të vitit 2023, dhe askush asnjë fjalë!
Escobar, përveç tjerash, është vënë kundër Kosovës dhe në përkrahje të Serbisë. Vallë, deri sa ky paraqet edhe dy kushte të tjera Kosovës për t’u pranuar në KE, më lind dyshimi se është i shitur këmbë e krye tek Vuçiqi. Këtë do ta tregojë vetë koha. Në asnjë rast deri sot nuk ka qenë kusht asociacioni i komunave me shumicë serbe në Kosovë për pranim në Këshillin e Europës. Sot doli me këtë kusht Escobar. Nuk ka qenë në kushte as shpronësimi në veri të Kosovës, këto i shpiku vetë Escobar, dhe më vjen shumë keq që ky njeri ka rënë nën kthetrat dhe nën ndikimin e Serbisë në raport me Kosovën.
Escobar, një ditë më parë u nda i kënaqur me faljen e 24 hektarëve tokë Manastirit të Deçanit, ku kishte zbatuar vendimin e gabuar të Gjykatës Kushtetuese të Kosovës, porse ishte nga Gjykata. Ndërkaq, me asociacionin dhe me tokat e shpronësuara për interes të shtetit të Kosovës, Escobar del kundër Gjykatës Kushtetuese të Kosovës! Vallë, përse në mënyrë selektive të zbatohen vendimet e Gjykatës Kushtetuese të Kosovës? Aty ku dëmtohet Kosova nga kjo Gjykatë, duhet të zbatohen vendimet, e aty ku mbrohet Kosova po nga kjo Gjykatë, nuk duhet të zbatohen vendimet e sajë, pse është interesi i Serbisë që të hyjë sa më thellë në territorin dhe punët e Republikës së Kosovës.
Deri sa dhurimi i tokës Manastirit të Kishës së Deçanit qenka i mirë dhe për ta lavdëruar, “demokratik” e çka jo tjetër, atëherë edhe vendimi i Gjykatës Kushtetuese të Kosovës për asociacionin, duhet të jetë i tillë, që të zbatohet e të mos formohet fare, pse është kundër interesave shtetërore të Republikës së Kosovës, dhe në të mirë të Serbisë, jo të serbëve të Kosovës, se Serbia nuk punon dhe nuk i interesojnë serbët e Kosovës, por interesat e Serbisë, e cila e kërkon edhe krejt Kosovën, që është shkaku i mosnjohjes së Pavarësisë së Kosovës.
Zotëri Escobar, je gabim, shumë gabim! Do të ishte mirë të mendosh e të këndellesh dhe të punosh për interesat e Serbisë brenda territorit të saj, dhe jo kundër interesave të Kosovës.
