Shkruan: Florim Zeqa, 07.01.2023
Për të ardhur deri tek shteti, që e kemi sot është derdhur shumë gjak dhe janë bërë sakrifica të panumërta, andaj askush nuk e ka të drejtën të luajë me atë gjak dhe ato sakrifica, qoftë ai president apo kryeministër dhe askush tjetër.
Formimi i një qeverie të shpëtimit kombëtar
Nuk duhet të zhgënjehemi nga kushtëzimet e vëna nga ndërkombëtaret dhe as të zmbrapsemi nga kërcënimet e pushtuesit verior. Ngase e gjithë kjo mund të jetë një sprovë për t’na e matur impulsin tonë sesa jemi në të vendosur në mbrojtjen e shtetit, për arsye se është thënë në qarqe të ndryshme ndërkombëtare, se shqiptarët e Kosovës nuk janë të zotët ta mbajnë shtetin e tyre!
Që kjo të mos del e vërtetë, Parlamenti i Kosovës duhet të tubohet në një seancë të jashtëzakonshme për të shtyrë tutje Qeverinë aktuale në përmbushjen e obligimeve ndërkombëtare që ka marrë Kosova nga marrëveshjet ndërkombëtare në Bruksel për Asociacionin e komunave serbe në përputhje me Kushtetutën e vendit.
Kësisoji, Albin Kurti i kanë mbetur vetëm dy rrugë; ecjen përpara sipas rekomandimeve të miqëve ndërkombëtar ose dorëheqjen nga posti i kryeministrit. Ndryshe nuk mund të luaj “qoke” me ndërkombëtarët siq është mësuar të luajë me qytetarët e Kosovës.
Ngase, themelimi i Associazionit të Komunave Serbe (ASK) është rekomandim i prerë edhe i SHBA-ve, sponsorit dhe aleatit numër 1 të shtetit tonë, pa të cilin shtetësia jonë mund të zhduket si një “vesë mëngjesi”.
Në të kundërtën, nëse kjo qeveri nuk është në gjendje të bëjë hapa përpara, atëherë të zgjedhurit e popullit duhet të inicojnë procedurat për shkarkimin e ‘Qeverisë Kurti’ për shkak të rrezikimit të interesave shtetërore pas lëndimit të raporteve me SHBA-të dhe formimin e ‘Qeverisë së Shpëtimit Kombëtar’, të përbërë nga një spektër më i gjerë politik, nga diplomatë karriere dhe ekspert politik në Kosovë dhe mërgatë deri në përmbylljen e marrëveshjes finale me Serbinë në Bruksel.
Tek pastaj duhet t’iu vie radha mbajtjes së zgjedhjeve të përgjithshme, të lira dhe demokratike në tërë territorin e vendit.
Qytetarët duan zgjidhje, jo prolongim të problemeve me Serbinë
Protesta e paralajmëraur e serbëve në veri, përveqse enigmë, është sfidë dhe provokim i radhës për shqiptarët e jo ndarje e serbëve në raport me Kosovën.
Siq dihet, më 9 janar, tek monumenti i Car Llazarit në qendër të pjesës veriore të Mitrovicës është paralajmëruar protestë e serbëve të ‘pakënaqur’, siq thonë ata me politikën e Listës Serbe dhe presidentit serb Aleksandar Vuçiq karrshi Kosovës pas heqjes së barrikadave!
Ky përveqse një skenar i ri i Vuçiqit, është një paraljmërim i skenarëve të tjerë të dhunshëm në veri të vendit tonë dhe jo vetëm, dhe se në Serbi po përgatitet një agresion i ri ndaj Kosovës.
Ngjarja në Shtërpcë, përkatësisht plagosja e dy të rinjëve serbë në fshatin Gotovush, na kujton rastin “Panda” në Pejë, kur shërbimet sekrete serbe vet i vranë 6 të rinj serbë, që të fajësojnë shqiptarët dhe këtë ta përdorin si pretekst për sulm të zgjeruar ndaj shqiptarëve.
Andaj, përballë kësaj situate nuk guxojmë të rrijmë duarkryq, por duhet të mobilizohemi edhe ne në përmasa mbarëkombëtare, për t’u përballur me sfidat e radhës.
Në këtë rast, pozita dhe opozita duhet ta kalojnë testin për shtetin, në të kundërtën, karremi i dështimit do të bie mbi të dyja palët.
Në asnjë rrethanë nuk duhet lejuar që veriu i vendit të mbetet peng i zhvillimit të Republikës së Kosovës dhe as të kthehet në “Rrip të Gazës” në Ballkan. Një vatër e ndezur e krizës në Ballkan nuk i konvenon askujt në Gadishullin Ballkanik, e më së paku neve shqiptarëve dhe Kosovës në veqanti si shtet i ri dhe i pakonsoliduar në aspektin ekonomik dhe ushtarak.
Duam zgjidhje përfundimtare e jo stabilitet artificial dhe të përkohshëm politik, siq e duan serbët dhe një pjesë e bashkësisë ndërkombëtare. Duam liri të lëvizjes, siguri dhe mirëqenje siq e kanë qytetarët në të gjitha vendet e lira dhe demokratike të kontinentit evropian.
Në fund shtrohet pyetja logjike; ku mbeti dhe ku treti truri i kombit, ku mbeti guximi qytetar dhe mbeti vrulli rinor i kombit tonë, i cili asnjëherë dhe në asnjë periudhë historike nuk u gjunjëzua sikur është gjunjëzuar sot para kësaj klase të papërgjegjshme politike.
