E premte data 21.02.2025. Bisedova me ushtarakun Sabri Memaçi dhe e lamë të takohemi për të pirë një kafe, tek lokal “Qordja”, tek rrethrrotullimi i ri, i ish-Uzinës së Autotraktorëve. E njoftuam të vinte dhe Hasani. Ai më kishte thënë fjalët më të mira për Nënkolonelin, Sabri Memaçi. Si ushtarak korrekt, ai kishte ardhur parakohe dhe na priste aty, brenda. Pavarësisht se nuk njiheshim më parë me të, biseda qe e përzemërt dhe miqësore.
I tregoj qëllimin e takimit, ai me modesti e pranoi këtë. Kështu janë ushtarakët, të thjeshtë, të rregullt, me disiplinë të lartë dhe patriotë. Të gjitha këto cilësi u manifestuan, aty për aty, tek Sabriu. Fjala e tij e parë, pasi u prezantuam, ishte: “Kam dobësi të madhe për njerëzit e urtë dhe punëtor të krahinës sonë. Keqardhje për largimet dhe boshatisjen e një pjese të saj”…
Biseda zgjati në kohë dhe qe shumë miqësore…
Sabri Qazim Memaçi lindi në Lagjen Kutreq, të Selitës së Malit, më 09.04.1956. Lindi në një familje të thjeshtë, me tradita mikpritëse dhe me emër në krahinë. Familja e tij kishte 6 fëmijë, nga të cilët katër prej tyre kanë baruar arsimin e lartë. Gjyshi i Sabriut, Ibrahimi, ishte njeri i zgjuar, i ditur për kohën, ndante gjyqe dhe qe shumë mikpritës. Tradita vazhdon. Në këtë ambient dhe me këtë edukatë familjare u rrit dhe u edukua, Sabriu…
Arsimin fillor dhe 8-vjeçar, Sabriu e ka bërë në Babrru. E ka mbaruar klasën e 8-të në vitin 1972 me nota shumë të mira dhe fletë nderi. Duke kujtuar këtë periudhë, Ai, shprehet: “Shkolla qe shumë e mirë. Kishim mësues të shkëqyer, shumë të përgatitur dhe përcillin tek ne vlera edukative. Vlen të përmend, mësuesit: Liri Naska, Katerina Demi, Sulejman Kruja, Petrit Demi. Po kështu, edhe drejtorët e mirëpërgatitur e shumë kopetentë, Xhevdet Hyka dhe Kadri Kërçini”.
Meqenëse e mbaroi shkollën me rezultatet shumë të mira, ai mundi të fitojë një të drejtë studimi në Shkollën e Mesme të Përgjithshme “Skënderbej”. E fillon atë në vitin 1972 dhe e përfundon me nota shumë të mira në vitin 1977. Për këtë, ai shton: “Shkolla “Skënderbej” qe një shkollë elitare. Ajo pati kuadro me një nivel të lartë, shumë të përgatitur nga ana shkencore e pedagogjike. Pati një bazë materiale mësimore e didaktike për t’u pasur zili. Kishte rregull dhe disiplinë të një niveli të admirueshëm. Përmend këtu dy drejtorët e mrekullueshëm të shkollës; Fiqiri Shtepani dhe mëpas Bajram Shamku. Ato ishin mjeshtër në lëndët e tyre kimi dhe matematikë, dhe po kaq mjeshtër në drejtimin dhe administrimin e shkollës. Shkolla krahas rregullit, kishte edhe rezultateve të larta në fushën e arsimit.
Mësuesit reflektonin qytetari të lartë në fushën e sjelljes dhe edukimit. Kujtoj me nostalgji dhe respekt të veçantë, mësuesit: Samshenko Rino, vajza e Heroit të Popullit, Ndreko Rino, mësuese me cilësi të rralla shkencore e profesionale në matematikë dhe shumë komunikuese me ne; Hasan Dalti, Piro Bogdani, Skënder Shkupi, etj. Shkollën e mbarova me rezultate shumë të mira. Në shkollë krahas mësimit jam marrë edhe me sport, ku kam qenë pjesë e ekipit të të rinjëve të Partizanit në Gjimnastikë. Jam aktivizuar me rininë dhe kam marrë pjesë në veprimtaritë kulturoro-artistike të shkollës. Unë jam me fat që kam mbaruar shkollën e mesme të “begsave”. Kjo kohë qe shumë e bukur për arsimin”.
Pas mbarimit të shkollës së mesme, falë rezultateve të larta të tij, Sabriu, në vitin 1977 vazhdon Shkollën e Bashkuar të Oficerëve. E mbaron atë me rezultate të larta në vitin 1980. Për këtë, pohon: “Isha me fat që mbarova këtë shkollë. Ajo qe model në të gjitha aspektet. Si e tillë ajo ka ndikuar shumë në arsimimin tim të mëtejshëm shkencor dhe profesional. Shkolla e Bashkuar, qe e kompletuar në të gjithë treguesit e saj. Kishte rregull dhe disiplinë të një niveli të lartë, kishte një staf akademik tepër të kualifikuar, me një nivel të lartë shkencor dhe profesional. Këtu mund të përmend disa pedagogë, si: Agron Paruca, Mystret Xama, Arjana Peza, Zyber Gjoliku, Islam Tataveshi, Aleks Andoni, etj. Dua të përmend Komandantin legjendar të këtij institucioni dhe drejtuesin e nderuar, Rustem Peçi. Ai qe 10-vjet drejtues i shkollës. Ishte një specialist i shkëlqyer, një drejtues me aftësi të rralla, një njeri me zemër të madhe. Kam shumë nostalgji për shkollën dhe stafin akademik, në vitet e shkollimit tim atje!”- përfundon Sabriu.
Stazhin në prodhim e ka bërë në Babrru, dhe më pas nis kariera e tij si kuadër ushtarak.
Në vitin 1980 emërohet oficer në Mbrojtjen Kundraajrore në Shkodër. Detyrë të cilën e kryen me përkushtim deri në gusht të vitit 1983.
Në shrator 1983 emërohet Pedagog në Katedrën e Ndërlidhjes, në Shkollën e Lartë të Bashkuar, të Oficerëve në Tiranë. Punon si pedagog për një periudhë 9-vjeçare. Gjatë kohës si pedagog, Ai, u dallua për korrektësi, për nivel të lartë shkencor e profesional, për rezultate shumë të mira me studentët dhe komunikim shumë të mirë me To. Sabriu u ka dhënë mësim në Akademi, edhe studentëve nga zona jonë, si: Agim Sula, Ismet Tola, Ilmi Duhani, Dilaver Hoxha, Jemin Jamaku, Zog Lika, etj.
Duke kujtuar ato vite, ish studenti i tij, Dilaver Hoxha, pohon: “Profesor Sabriu, kishte dije të larta shkencore, nuk kënaqej me çka kishte arritur, kërkonte gjithnjë e më shumë tek vetja, dhe tek ne studentët. Vinte i përgatitur për orët e mësimit, rekomandonte e kërkonte literaturë ushtarake jasht tekstit, ishte i rregullt, sistematik, tepër komunikues e human me ne studentët”.
Në vitet 1992-1994, ai kryen detyrën e Komandantit të Brigadës së Ndërlidhjes në Tiranë.
Në vitet 1994-1997, ai emëtohet Shef i Ndërlidhjes në Brigadën e Tankeve. Detyrat e caktuara ai i kreu me përkushtim dhe korrektësi të lartë.
Në vitin 1998 bën kërkesë për lirim nga ushtria dhe emigron në Athinë. Punoj 23 vite atje dhe kthehet në Tiranë në vtin 2020. – Ka përshtypje shumë të mira për popullin grek dhe mikpritjen që ky i fundit i bëri atij.
Gjatë karierës së tij në ushtri ai ka kryer disa kualifikime pasuniversitare. Për këtë, pohon: “Në vitin 1986-1987 kam kryer një kurs 1 vjeçar në Akademinë e Mbrojtjes. Ky qe kualifikimi më i specializuar për artin ushtarak dhe degët e ndërlidhjes. U vlerësova me rezultate shumë të mira. Gjatë kohës që isha pedagog në Shkollën e Bashkuar, kam bërë disa kualifikime pasuniversitare, si në: Filozofi, gjuhë e huaj rusisht, në pedagogji, psikologji, etj. Këto kualifikime më kanë ndihmuar shumë në karierën time ushtarake”.
Sabriu është martuar me Valentinën. Ajo është shoqe shkolle dhe shoqe jete me Të. Valentina ka mbaruar arsimin e lartë në Shkollën e Bashkuar të Oficerëve me rezultate shumë të mira. Ka të njëjtin arsimim, në të njëjtën degë e profil me Sabriun. Vali, rrjedh nga një familje e fisme dhe me tradita të spikatura. Ajo ka punuar një ushtri në pozicione dhe detyra të ndryshme dhe i ka kryer me përkushtim ato. Sabriu, ka shumë arritje dhe suksese në punë, familje dhe shoqëri. Pjesë e këtij suksesi është edhe ndihma bashkëshortes së tij, Valentinës. Këto lindën dy vajza të mrekullueshme, Ilirianën dhe Irinin. Të dyja vajzat ecën në gjurmët e prindërve të tyre, mbaruan arsimin e lartë, në Financë dhe Mikrobiologji, dhe sot punojnë e jetojnë në SHBA dhe Greqi.
Sabriu u shkëput shpejt nga ushtria dhe për nevoja ekonomike emigrojë në Greqi. Ai dha kontributin e tij si ushtarak, la gjurmë në ushtri prandaj meriton respektin tonë dhe të gjithë shoqërisë…
Ibrahim Kabili
Tiranë, më 24.02.2025
