ResPublica.al, 1 korrik 2012
A duhen amplifikuar ndoca polemika ende të paqarta të ditëve të fundit mbi disa ndryshime të pretenduara në shqipen zyrtare? Rexhep Qosja, në një intervistë dhënë për gazetën javore “Java” të Prishtinës flet edhe mbi ata që e mohojnë gjuhën e përbashkët dhe predikojnë veçimin dialektor. “Numri i tyre sot është i vogël, po nesër ndoshta edhe mund të rritet një çikë ky numër.
Ata janë të frymëzuar prej qarqesh politike në Prishtinë që përvjedhin idenë sipas së cilës Kosova karshi Shqipërisë duhet të zhvillohet si Austria karshi Gjermanisë dhe harrojnë se Gjermania dhe Austria, megjithatë, kanë një gjuhë letrare, Gjuhën Letrare Gjermane. Janë të frymëzuar, ma merr mendja, njëkohësisht edhe prej qarqesh të huaja politike që tradicionalisht janë përpjekur t’i ngatërrojnë punët e shqiptarëve” – thotë Qosja
Duke i quajtur këto përpjekje “prapakthime kundërhistorike që do të kishin pasoja shumë të mëdha” ai e mbyll me Gëten: “Të gjitha janë të vdekshme, vetëm marrëzirat janë të pavdekshme”. (A.N)
