ZEF MULAJ: PËRURON LIBRIN POETIK, “LUMENJ ËNDRRASH”, ITALISHT

Nga: Murat Gecaj

Këto ditë, në sallën “Biageti” të bibliotekës së qytetit Porto Recanati, Ankona-Itali, dr. Zef Mulaj, poet e shkrimtar dhe studiues në farmaceutikë, përuroi librin me poezi “Pieni di sogni i fiumi” (Lumenj ëndrrash). Ishin të pranishëm lexues të profesioneve të ndryshme, shumica italianë, poetë e shkrimtarë dhe studiues. Morën pjesë edhe kryetarja e Bashkisë së qytetit, Av.Sabrina Montali, punonjës të administratës shtetërore e private vendore.

Nga e majta: Kryetarje e komunes, Av. Sabrina Montali, duke përshëndetur; poetja Novela Torregiani, dr. Zef Mulaj dhe prof. Lino Palanca

Rreth përmbajtjes së këtij libri foli prof. Lino Palanca, publicist, shkrimtar e studiues. Në librin e autorit shqiptar, dr. Zef Mulaj, ai evidentoi vlerat letrare, kulturore, shoqërore e politike. Në poezitë e tij trajtohen çështje me rëndësi të periudhës aktuale, që përjetojmë, të cilat janë, gjithashtu, shqetësim i politikave ndërkombëtare.

Pjesëmarrje e gjerë publike

Në përurim e mori fjalën edhe kryetarja e Komunes, znj. Sabrina Montali, e cila e vlerësoi punën e këtij autori shqiptar, si studiues e poet, që jeton e është përshtatur mirë në mjedisin italian. Ajo nënvizoi se, ndër të tjera, dr.Zef Mulaj është një krijues me vlera letrare, kulturore e shkencore.

Poeti Zef Mulaj duke autografuar librin për lexuesit

Pastaj, përurimi vazhdoi me recitimin e disa poezive të këtij vëllimi, nga poetja dhe aktorja e njohur, Aida Angjelici. Ndërsa në kitarë luajti mjeshtëri Antonia Ascolese.
Në mbyllje, dr.Z. Mulaj i falënderoi përzemërsisht, si folësit dhe gjithë pjesëmarrësit në këtë veprimtari mbresëlënëse.

Duke u përshëndetur me miqtë

Pjesë e kësaj ngjarjeje kulturore ishte shpërndarja dhe nënshkrimi nga autori i një numri të konsiderueshëm librash, për lexues të interesuar. Ata e përgëzuan atë, si për këtë botim të ri dhe për botimet e mëparshme të tij, në poezi e prozë dhe në fushën e shkencës farmaceutike.

Tiranë, 27 tetor 2014