TemA, 7 Shkurt 2013
Vrasja e 4 protestuesve në 21 janar 2011 ndodhi në sytë e publikut dhe mediat fiksuan qartë autorët e krimeve.
Pamjet që kanë bërë xhiron e botës, dëshmojnë momentin kur njëri prej protestuesve, që qëndronte me duar në xhepa përpara selisë së kryeministrisë, rrëzohet nga një plumb i dalë nga armët e gardës pak metra përballë tij.
Megjithëse viktima Ziver Veizi nuk po bënte asnjë tentativë për të hyrë brenda “vijës së kuqe”, pra rrethimit të kryeministrisë, ai u qëllua drejtpërdrejt.
Gardisti që shkreh armën mbi protestuesit është pikërisht Agim Llupo, që për gati 2 vite nën akuzë për vrasje qëndroi në qeli. Por paraditen e sotme ai fitoi lirinë, falë një vendimi gjykate, në të cilën citohej se “prokuroria nuk kishte provuar vrasjen me dashje”.
Në pamje duket qartë, gardisti Agim Llupo që nuk qëllon me armën e tij në ajër, por drejt protestuesve. Për pasojë Ziver Veizi humbi jetën.
