Kryetari i Partisë Socialiste, Edi Rama, njëherësh lider i Opozitës së Bashkuar, është kërcënuar me jetë. Megjithëse selia rozë ka kërkuar që të kalojë gjithçka në heshtje duke mos i bërë të ditura këto informacione, prania e shumtë e truprojave dhe shtrimi i masave të sigurisë ka ngacmuar dje vëmendjen e qytetarëve dhe të medias.
Ndryshe nga herët e tjera kur ishim mësuar që liderin e opozitës ta shikonim me një truprojë, i cili gjatë gjithë kohës qëndronte në distancë nga kryesocialisti, dje numri i tyre ishte shtuar dukshëm. Përgjatë gjithë kohës, nga dalja deri në shoqërimin e kryesocialistit në selinë e Partisë Socialiste, së paku 6 truproja ishin përreth tij.
Nga informacionet e para të marra nga selia rozë bëhet fjalë për një shtim të masës së sigurisë për shkak të rritjes së kërcënimeve ndaj liderit të opozitës. Një informacion i tillë është përhapur edhe dje pak përpara fillimit të protestës-homazh. Gazetarë të huaj kanë pohuar se janë në dijeni të një informacioni të tillë dhe kjo është arsyeja përse në Tiranë kishte ardhur një numër kaq i madh grupesh xhirimi.
Burime nga selia rozë bëjnë të ditur për gazetën “Shekulli” se mesazhet kërcënuese ndaj liderit të Opozitës së Bashkuar kanë ardhur prej disa ditësh. Në forma të ndryshme, përmes e-maileve apo mesazheve, kryesocialisti është vënë nën shënjestrën e kërcënimeve me jetë. Kryesisht në mesazhe kërcënuese thuhej se Rama duhet të bënte kujdes gjatë protestës- homazh pasi mund të vritej. Për këtë arsye, në selinë e Partisë Socialiste janë rritur dhe masat. Ndonëse kohë më parë në ambientet e partisë më të madhe të opozitës nuk kishte njerëz të posaçëm për të parandaluar ndonjë keqbërje ndaj kryesocialistit, tanimë persona të tillë janë të pranishëm në ambientet në hyrje të godinës.
Të njëjtat burime saktësojnë se zyrtarë të lartë të Partisë Socialiste janë vënë në dijeni nga kryesocialisti për kërcënimet që kanë ardhur në adresë të tij. Mësohet se mesazhet telefonike vijnë nga numra operatorësh telefonik jashtë Shqipërisë. Ndërsa prejardhja e e-maileve kërcënues nuk dihet ende prejardhje e tyre. Kryetari i Partisë Socialiste në bisedën që ka zhvilluar me disa deputetë ka shprehur shqetësimin e tij për situatën e krijuar, por ka theksuar se pavarësisht këtyre kërcënimeve, socialistët do të ndjekin deri në fund rrugën e tyre politike.
Mbi këto kërcënime, kryesocialisti ka preferuar që t’ia lerë në dorë organeve të drejtësisë nxjerrjen e përgjegjësve për. Disa mesazhe prekin edhe familjen e tij. Në përmbajtje të kërcënimeve përfshihet edhe fëmija. Nga selia rozë nuk ka një deklaratë zyrtare mbi këto kërcënime. Në ditët në vijim pritet që organet e drejtësisë të marrin në dorëzim çështje dhe të merren me zbulimin e prejardhjes së kërcënimeve. Pavarësisht të dhënave të ardhura, lideri i Opozitës së Bashkuar nuk do të anulojë asnjë prej aktiviteti të tij, një zgjedhje personale e kryesocialistit.
“SHEKULLI”
