Mero Baze
Kryeministri në detyrë Sali Berisha përsëriti dje sulmet e tij ndaj Prokurores së Përgjithshme, Ina Rama. Këtë radhë ishte dhe më i kujdesshëm për të hequr nga krahu i saj ambasadorin amerikan dhe për ta bërë atë pjesë të zyrës dhe fjalorit të tij. Retorika e tij kundër kryeprokurores kishte të bënte me një banalitet tjetër që s’ka përgjigje. Pak a shumë ai po pyet për dy ditë rresht kryeprokuroren se “kush të ka urdhëruar të gënjesh!?” E pyet dhe nuk kërkon përgjigje. E pyet dhe vazhdon të shpjegojë se kush e ka gënjyer… Ashtu, me gjysmë zëri, me copa fletushkash të tij dhe Komisionin Hetimor të ngritur kundër saj, është duke e dhënë vetë përgjigjen… Të ka urdhëruar Bamir Topi të gënjesh moj… puçiste!
Si për të qenë në një gjatësi vale me kryeministrin, Komisioni Hetimor i PD-PSI ka kërkuar të thërrasë si dëshmitar të parë të hetimit Presidentin e Republikës. Duan të dinë prej tij se çfarë informacionesh ka pasur ai për grushtin e shtetit dhe “përpjekjet e dështuara” për t’i marrë zyrën Berishës… Nëse nuk ka, mjerë ai. Fatin e mëtejshëm do ta vendosë Komisioni. Më tej akoma, një fletushkë sovjetike e Berishës kërcënon Presidentin se ka bisedat e tij telefonike me Ina Ramën nga ora 2.30 deri në orës 5 mbasdite. Nuk jam i sigurt nëse këta dy zyrtarë të lartë të shtetit kanë folur apo jo në telefon ndonjëherë në atë orë, por e sigurt është që ndonjë nga këto ditë Berisha do të dalë para medieve dhe do lexojë një sms që sapo i ka ardhur për të na treguar se çfarë është biseduar mes dy kryepuçistëve.
Po pse po afrohet shënjestra tek Presidenti dhe pse Berisha po përpiqet të rrisë retorikën ndaj Ina Ramës “si bashkëpunëtore në puç”?
Tronditjen e parë Berisha e mori nga SHBA. Dalja publike e ambasadorit të SHBA përkrah “kryepuçistes” e bëri qesharak Berishën dhe e detyroi të zbythet nga gjithë hakërrimet e tij. Për të mos u turpëruar deri në fund, dje u përpoq të gjente një alibi dhe ajo kishte të bënte po me ambasadorin amerikan. Sipas tij, ishte Berisha ai që i kishte rekomanduar ambasadorit amerikan kërkesën për ekspertë amerikanë dhe jo Ina Rama. Me këtë do të thotë që SHBA mbështet Berishën dhe jo Ina Ramën. Edhe pse duket shumë qesharake, dhe paksa sfiduese për kryeministrin që guxon të keqpërdorë dhe qeverinë amerikane në këtë rast, mbetet për tu admiruar guximi i tij për të mos pasur turp.
Ai nuk mund ta pranojë dot që “kryepuçistja” e tij të ketë aleate SHBA-në në këtë histori dhe po përpiqet t’ia heqë atë nga krahu dhe ta fusë në zyrën e tij. Në të vërtetë situata është më e qetë dhe më normale. Thjesht SHBA nuk e konsideron puçiste Ina Ramën, dhe nuk konsideron se ka ndodhur ndonjë puç në Shqipëri dhe për këtë arsye po bashkëpunon me të gjitha palët. Por vetëm njëra prej palëve, pra vetëm Kryeministri, po guxon t’i quajë amerikanët aleatë të tij kundër “puçistëve”.
Por ndryshe nga çfarë flet, ai e di të vërtetën dhe po merr masa të mos ngelet zbuluar. Duke qenë i qartë për mbështetjen amerikane për Prokurorinë, ai po zhvendos fokusin tek institucioni i Presidentit për ta futur dhe atë në spiralen e sulmeve si “kryepuçist”.
Ai është personi që e tmerron më shumë në këto momente pasi ka ndodhur e gjithë kjo dhe ai nuk ka asnjë implikim publik as në favor të “puçistëve”, as në favor të Berishës. Po fokusohet tek Presidenti me shprese se SHBA dhe BE nuk do të guxojnë pas kësaj të mbështeten tek ai si institucion i paanshëm mbi palët. Është thjeshtë duke u përpjekur të eliminojë çdo faktor tjetër politik në këtë vend, me të cilët Perëndimi duhet të bisedojë. Kërkon të jetë vetëm ai dhe opozita përballë.
Nuk do më president, nuk do më kryeprokuror, nuk do më SHISH. Dhe po hakërrehet kundër tyre me një gjuhë që jo më larg se dje, vuri në siklet gratë dhe fëmijët e policëve shqiptarë, para të cilave fliste për “gra kurva”, për gra të zhveshura, për terroristë, për vrasës, për kriminelë dhe mendonte se i qetësonte duke u thënë se prindërit dhe burrat e atyre që po e dëgjonin të tmerruar në atë sallë, po ja mbronin pushtetin atij burri prej asaj sëre.
E gjithë kjo histeri pa fund e Sali Berishës mos prisni të marr fund. Ai nuk qetësohet më. Atë nuk e qetëson më as qetësia dhe as revoltat e opozitës, as mbështetja ndërkombëtare dhe as shumica e heshtur e shqiptarëve që e urrejnë. Ai e di çka bërë dhe e di çfarë rrezikon. Ndaj kërkon me çdo kusht të krijoj Tokën e Djegur të Institucioneve, që askush të mos jetë i gatshëm të zgjidh krizën që po prodhon ai.
Dhe pavarësisht se shan e mallkon Ina Ramën, pavarësisht se do dhe urren ambasadorin ende të hutuar të SHBA në Tiranë, ai në të vërtetë ka vetëm një emër në mendje që ja prish gjumin dhe që i ka plasur buzën. Ai është Presidenti i Republikës, i cili po shpëton pa u bërë pis nga ky puç. Ndaj mos u çudisni kur ulëret aq shumë kundër Ina Ramës. E bën të dëgjojë dhe trembet Presidenti, pasi nuk e kupton dot se ai është ai president dhe nuk e keqpërdor pushtetin për të vënë nën urdhra Kryeprokuroren. Atë që bën vetë, ai nuk e kupton dot si nuk mund të mos e bëjnë të tjerët kundër tij.
