Mero Baze
Bashkë me fushatën elektorale, mbështetësit e kandidatit të kryeministrit Berisha për Bashkinë e Tiranës kanë ngjizur një alibi, të cilën po e forcojnë dita- ditës lidhur me humbjen e pritshme të Lulëzim Bashës. Alibia e humbjes është fushata politike e Edi Ramës. Nuk do t’ia vlente të merreshim me këtë stërhollim të arsyeve të mundshme të humbjes, nëse pas kësaj nuk do të fshihej ndëshkimi i diçkaje më tepër se sa fati politik i Lulëzim Bashës.
Është e vërtetë që fushata e opozitës është në thelb një fushatë politike për arsyet e së cilës nuk ja vlen të rindalemi. Por fushata e opozitës është politike si një fushatë kombëtare, si një kundërpërgjigje ndaj mungesës së përgjigjeve që nuk erdhën kurrë për transparencën e zgjedhjeve dhe as përgjigjeve që munguan për garancitë e reja ndaj manipulimit të mundshëm. Por fushata e opozitës në Tiranë është më pak politike se ajo e Berishës, nëse krahasojmë arsyet e kandidimit të Edi Ramës dhe Lulëzim Bashës për Bashkinë e Tiranës. Edi Rama është kryebashkiak në detyrë dhe rikandidimi i tij i pazakontë për herë të katërt, në thelb nuk është një ngjarje më e fortë politike se sa arsyeja përse kandidon Lulëzim Basha.
Ky i fundit po kandidon tri muaj pasi si Ministër i Brendshëm është përgjegjës për katër vrasje politike. Arsyeja pse ai ka hyrë në këtë betejë është shumë më politike se sa arsyeja e një kryebashkiaku në detyrë për të mos ikur nga zyra.
Lulëzim Basha, dhe në rastin konkret Sali Berisha, po detyrojnë kryeqytetin të bëjë një zgjedhje të vështirë, po e detyrojnë atë të jetë më politik se kurrë ndonjëherë për të marrë vendimin që me votën e tyre të pastrojnë një biografi të freskët kriminale.
Gjithë miliardat e tjera që Lulëzim Basha po hedh për të blerë medien, për të bërë sikur ka program, për të prodhuar kaseta sikur ka popull, për të blerë çdokënd që del në ekran e gazeta sikur ka medien me vete, janë të gjitha maskimi teknik i arsyes së fortë politike që ai ka për të kandiduar. Të gjithë kemi dëgjuar planet 1 miliard dollarëshe të Bashës për Tiranën, dhe s’është çudi që deri në fund të fushatës të bëhen 2 miliardshe apo më shumë. Në këtë fushatë ai nuk vë bast për pare, nuk i dhimbsen milionat që mund të paguajë për medie minore që i shikojnë vetëm pronarët e tyre, dhe deri për emisione që i vetëshikojnë vetëm ata që flasin.
Atij i duhet me çdo kusht një film i gjatë me ngjyra ku të flitet për projekte, program, opinion publik pozitiv, fitore në Facebook e marrëzi të tjera, vetëm e vetëm që arsyeja politike përse kandidoi të funksionojë. Ai do doemos që njerëzit për një muaj të harrojnë që kanë të bëjnë më njeriun që vrau katër vetë për arsye thellësisht politike dhe të fillojnë të ndërtojnë një imazh tjetër për këtë njeri, imazhin e njeriut që seç do të bëjë për Tiranën, por nuk e lë ky Edi Rama se po e bën betejën politike.
Në fakt arsyet pse Edi Rama rikandidon dhe arsyet pse Lulëzim Basha kandidon janë shumë larg njëra- tjetrës për nga motivimi politik. Edi Rama nuk kandidon për të pastruar ndonjë histori kriminale të partisë së tij, apo të vetën personalisht në lidhje me Tiranën e vitit 2011. Ai kandidon për të udhëhequr partinë e tij në një fitore elektorale, ç’ka është objektiv normal i çdo lideri. Lulëzim Basha po tenton të pastrojë historinë e vet kriminale dhe të partisë së tij më 21 janar dhe historitë e rënda të korrupsionit vite më parë.
Atij i duhet vota e Tiranës, siç i duhej Sali Berishës në vitin 2009 vota e një qendre votimi në Gërdec për të thënë që im bir nuk vrau 26 vetë, ndryshe s’kishin pse më votonin në Gërdec. Për ato 9 vota më shumë në një qendër votimi ku nuk votonte askush nga viktimat, Berisha pagoi miliona lek dëmshpërblime dhe ndere personale. Makthi i të ndjerit vrasës është një peshë e rëndë në qafën e çdo politikani dhe kur s’ke fuqi që këto histori t’i pastrosh me drejtësinë, ngelet t’i pastrosh politikisht.
Luëzim Basha është pikërisht në këtë rrugë, në rrugën e pastrimit politik të krimit që ka bërë. Atij i duhet doemos kjo fitore për tu ndjerë i larë dhe i pagjykuar nga shoqëria për atë që ka bërë. Atij i duhet kjo votë si një votëbesim për vrasjen e Ziverit, Hekuranit, Faikut dhe Aleksit. Atij i duhet kjo votë për të thënë më në fund, ja pse vrava, se kam mbështetjen tuaj. Kam lexuar kolegë të mi të thonë se ky është një provokim i madh ndaj Tiranës. Në të vërtetë është më shumë se kaq.
Është një fyerje direkte shumë e madhe për Tiranën dhe ata mijëra mbështetës të Partisë Demokratike, të cilët kanë mijëra arsye të votojnë PD, por s’kanë asnjë arsye që vullnetin e tyre pro PD ta keqpërdorë politikisht një njeri për hesape të veta personale me jetën e katër njerëzve. Vota e demokratëve të Tiranës nuk ka arsye të jetë leckë për të fshirë nga ndërgjegjja e Lulëzim Bashës makthin e vrasësit të katër qytetarëve. Vajzat e vogla të Aleks Nikës, edhe pse nuk kanë shtetësi holandeze, do të rriten duke parë vajzën bionde të çiftit brun Basha si vajzën e vrasësit të babait.
Djali i mbetur i Faikut do të vazhdojë ta shikojë Lulëzim Bashën si vrasësin potencial të babit, ndërsa vajza e Ziverit, që i rridhnin lot në bulevard, nuk do ta kuptojë kurrë sa herë të shikoj në ekran si ju vra babi, arsyen pse Lulëzim Basha qëlloi mbi të. Por më të rëndë do ta kenë këtë histori fëmijët e Hekuran Dedës, fëmijët e një njeriu, familja e të cilit ka votuar për PD-në. Përse mes mijëra njerëzve në PD, ata duhet të vihen në dilemë për të votuar apo jo pikërisht për njeriun që ka vrarë?
Arsyeja është thellësisht politike. Lulëzim Basha është në garë për të përdorur politikën si gjyqtare ndaj tij dhe jo drejtësinë. Ky njeri nuk ka kërkuar ndjesë për vrasjet, dhe po nxiton të fitojë pafajësinë nga kryeqyteti. Ky njeri nuk ka pranuar të shkojë para drejtësisë dhe po kërkon që me milionat që harxhon për mercenarët e tij t’i mbushë mendjen Tiranës ta marrë në mbrojtje, jo se do tu bëjë tramvaj apo do tu zgjasë Bulevardin, por se duhet t’i zgjasin jetën në politikë një njeriu që ka vrarë.
Kjo është një arsye shumë e fortë politike për të kandiduar, një arsye që e ngjyros politikisht fushatën e Tiranës, jo nga prania e një piktori si Edi Rama, por nga vendimi i një njeriu që ka urdhëruar vrasje politike për t’iu harruar ato. Të guxosh të kthesh zgjedhjet vendore në referendum pro ose kundër një njeriu që ka urdhëruar vrasje, është një akt shumë i rëndë politik.
Autori i këtij akti është Lulëzim Basha. Arsyet politike që e kanë çuar Lulëzim Bashën drejt kandidimit krahasuar me ato të Edi Ramës, janë të pakrahasueshme pikërisht se i pari do të përdorë kryeqytetin për të pastruar gjakun nga duart e tij, ndërsa i dyti do të përdorë duart e tij për të pastruar gjakun nga bulevardi përballë zyrës ku Basha qëndroi ndërsa vriteshin katër njerëz.
