Idea, 18 prill 2013
Strasburg – Parlamenti Evropian i ka bërë edhe një herë thirrje pesë vendeve anëtare që nuk e njohin Kosovën ta bëjnë një gjë të tillë, nëpërmjet miratimit të rezolutës.
Sipas agjensisë së lajmeve ‘Radio Evropa e Lirë’, rezoluta mbështet edhe një herë procesin e integrimeve evropiane për vendin.
Në këtë votim ka kaluar edhe amandamenti për të shlyer fusnotën nga teksti, ku përmendet emërtimi i Kosovës, transmeton ‘REL’. Ky tekst ishte vendosur me propozimin e disa deputetëve nga vendet që nuk e njohin Kosovën.
Kërkesa për ta shlyer këtë funsnotë ka marrë shumicën e votave në seancën e sotme të Parlamentit Evropian.
Ky institucion ka miratuar sot edhe rezolutën për Serbinë, e cila i propozon Komisionit Evropian që t’i ndajë asaj datën e negociatave për anëtarësim në BE.
