Kim Mehmeti
Publicisti Kim Mehmeti, duke e komentuar vizitën e Edi Ramës – kryeministrit të Shqipërisë – në Republikën e Serbisë, ka theksuar se shefi i qeverisë shqiptare politikanëve serbë ua ka përcjell porosinë se kanë “vdekur” politikanët inferiorë shqiptarë.
Ai ka thënë për Telegrafin se “nuk kishte si mos të ndjeheshin të ‘provokuar’ nikoqirët e kryeministrit shqiptar në Beograd, ngaqë për ata ai ishte si pasqyrë e ndritshme, ku shihen vlerat civilizuese e njerëzore të popullit që përfaqësonte, e nga e cila pasqyrë projektuesit e antishqiptarisë nuk mund ta fshihnin fytyrën e tyre të deridjeshme monstruoze”.
Ai ka thënë se Rama ishte “provokues” për nikoqirët serbë ngaqë ai kishte një argument të pamohueshëm dhe shumë civilizues, që atë e lartësonte aq sa e bënte të paarritshëm për bashkëpunëtorët e deridjeshëm të Millosheviqit: mospasjen e ngarkesës se je përfaqësues i popullit me varreza masive me nëna, fëmijë e civilë të masakruar, vetëm sepse ata nuk ishin serbë.
“Rama më së shumti i ‘provokoi’ nikoqirët serbë me porosinë më të rëndësishme që ua përcolli atyre: se kanë ‘vdekur’ politikanët e deridjeshëm inferiorë shqiptarë, ata të cilët përuleshin përpara kolegëve të tyre ballkanas”, ka deklaruar Mehmeti për Telegrafi.
Ndryshe, i pari i qeverisë shqiptare, Edi Rama, të hënën ka vizituar Beogradin, ndërsa sot Luginën e Preshevës. Dje ai ishte pritur nga kryeministri i Serbisë, Aleksandër Vuçiq, ndërsa sot ka vizituar Komunën e Preshevës, ku fillimisht është shpallur “Qytetar Nderi” i këtij qyteti, e pastaj ka mbajtur fjalim në Qendrën e Kulturës në qytet. /Telegrafi/
