Nga Beqë Cufaj
Po qe se lexohen lajmet kur hapen gazetat e botës në mesnatën dhe orët e para të mëngjesit të së hënës, shihet që për procesin zgjedhor të mbajtur me datën 12 dhjetor në Republikën e Kosovës ka vetëm fjalë të mira.
Zgjedhjet e para të organizuara me forca vetjake në shtetin më të ri të botës kaluan pa ndonjë problem të madh, ose me incidente të vogla, të cilat nuk kanë rezultuar të jenë fatale për rezultatin – është toni i raportimit për ecurinë. Në sytë e opinionit perëndimor, pra, populli dhe qytetarët e vendit edhe dje kaluan një provim, i cili për imazhin e Republikës patjetër që kishte dhe ka një rëndësi jetike.
Por, në mënyrë tashmë klasike dhe sa herë që në Kosovë mbahen zgjedhje të të gjitha niveleve, tërë dita shkon si e më mirë deri në orët e para të mbrëmjes kur fillohet me zbulimet që dalin në dritë. Pa përjashtim, kjo gjë, ngjau edhe mbrëmjen e 12 dhjetorit të vitit 2010.
Partia Demokratike e Kosovës (PDK) u “projektua” dhe më pas edhe shpalli veten fituese. Kurse krejt partitë e tjera po në mbrëmje dhe gjatë tërë natës jo vetëm që nuk e uruan atë, por u kujtuan ta zbulojnë që ka pasur blerje të votës, vjedhje të votës, manipulim të votës…
Fakti se si në dy qendrat e Drenicës – Skënderaj dhe Drenas, ka pasur dyfish më shumë votues sesa mesatarja e vendbanimeve të tjera jo vetëm që zgjon asociacione për keqpërdorime, por nuk ka si të mos ketë ngjarë diçka.
Diçka që do të mund ta quanim edhe: jashtëzakonisht normale!
Pse? Sepse PDK-ja ka luajtur me numrin e sigurt. Bastionet e saj edhe ashtu të sigurta i ka stolisur edhe me emrat e votuesve të diasporës e edhe të vdekurve, duke u siguruar kështu që nëse nuk i ecën në rajone të tjera, atëherë së paku me Drenicën e ka fitoren të sigurt.
Natyrisht që faji nuk është vetëm i PDK-së për këtë mundësi manipulimi. Fajet po aq, në mos edhe më shumë i kanë edhe partitë e tjera, të cilat po me PDK-në ishin të ulura edhe në Komisionin për hartimin e reformës zgjedhore e edhe në Komisionin Qendror Zgjedhor, që s’është gjë tjetër pos një balance mes krejt spektrit politik të Kosovës.
Ta bëjmë një pyetje të sinqertë: nëse Republika e Kosovës i paska në listat e saj zgjedhore më shumë se 1.6 milion zgjedhës, atëherë matematikisht dhe logjikisht në Kosovë u dashka të jetojnë rreth 4 milionë banorë!
Gjë kjo e cila nuk është e vërtetë, sepse shumë prej banorëve kanë vdekur e edhe më tepër janë shpërngulur në vise të ndryshme të botës qe tri dekada me radhë prejse nuk ka pasur regjistrim.
Pse, pse atëherë partitë politike të përfaqësuara në tryezat me partinë më të madhe – PDK-në, kanë pranuar të futen në zgjedhje pa u pastruar listat zgjedhore? Pa iu dhënë e drejta diasporës që të votojë në ambasada, konsullata apo edhe me sistemin postar të zgjedhjeve?
Apo të kenë menduar që PDK-ja, e cila tash për tash e ka krejt logjistikën shtetërore në dorë, nuk do të shfrytëzonte këtë dhe këso përparësish?
Zgjedhjet e 12 dhjetorit, sidomos në Drenicë, do të kontestohen nga pothuajse të gjitha partitë, por jo nga PDK-ja. Sepse ajo duket që nuk ka tentuar t’ua vjedhë votën të tjerëve. Por, ka bërë çdo gjë që vetes t’ia shtojë atë. Me çdo mjet.
Tashti, kur partitë e tjera me në krye LDK-në, VV, AAK-në, AKR-në e FER-in të fillojnë me procedura ligjore, PDK-ja do ta fillojë gjahun dhe ofensivën e sharmit. Për ta gjetur partnerin e ardhshëm për të qeverisur me vendin. Se kush do të jetë ky partner nuk e dimë sonte as sot. Por do ta marrim vesh shumë shpejt.
Gjithsesi, është koha dhe çasti i fundit që partitë të fillojnë ta kuptojnë që pa krijuar një sistem zgjedhjesh, i cili bazohet në ligj modern, komision profesionist e jo partiak zgjedhor, transparencë financiare partiake, regjistrim adekuat të popullsisë dhe para së gjithash pastrim listash të votuesve Kosova do të vazhdojë të lëngojë nga problemet si ky i 12 dhjetorit.
Ose do të vazhdojmë të jetojmë mes gjendjeve që prodhojnë zgjedhje të jashtëzakonshme.
Dhe normale!
