INTERVISTA/ Ruçi: 40 mijë votues të importuar në Tiranë. 500 mijë euro për vendimin anëtarëve të Kolegjit

Bisedoi: Alfred Peza, Vizion Plus

Kreu i Asamblesë Kombëtare të PS, Gramoz Ruçi, flet në këtë intervistë për manipulimet zgjedhore dhe qëndrimet e opozitës në të ardhmen

Tani procesi i zgjedhjeve pothuajse ka përfunduar, përveç 8 njësive ku pritet ripërsëritja. Si do ta vlerësoni ju këtë proces në tërësinë e vet?

Sigurisht që siç thoni dhe ju, procesi ka përfunduar, por zgjidhja s’ka përfunduar. Dua të them me këtë se ndodhi ajo që s’duhet të ndodhte dhe ndodhi ajo që pritej të ndodhte. Ndoshta duket si një lodër fjalësh, por po të ishte vetëm kaq, do të ishte mirë. Ndodhi ajo që s’duhet të ndodhte pasi shqiptarët, jo vetëm ata, por ndërkombëtarët, Shqipëria, priste një mesazh të qartë që këto zgjedhje të paktën të kalonin klasën e standardeve demokratike dhe të përmbushnin detyrën e parë të shtëpisë, që Shqipëria vërtetë me këtë fundvit të hidhte atë hap shumë të mirëpritur nga të gjithë shqiptarët dhe nga partnerët tanë ndërkombëtarë, për marrjen e statusit të vendit kandidat. Për herë të dytë në harkun e dy vjetëve, për herë të parë në 2009 dhe për herë të dytë në 2011, Shqipëria ngelet në klasë.

Le të presim vjeshtën…

Lajmi është i keq, por nëse do t’i referohemi të gjithë deklaratave të përfaqësuesve të Komisionit Europian, të parlamentarëve europian, të partnerëve tanë qofshin edhe ata amerikan, sigurisht që shenjat s’janë aspak premtuese. Pra, klasa politike shqiptare nuk bëri dot detyrën e saj të shtëpisë. Kur them klasa politike shqiptare, së pari mbi të gjitha kam mazhorancën ekzistuese, kam parasysh kryeministrin e vendit që me gjithë premtimet dhe ligjërimet e tij të gjata sa herë që del para publikut apo para ndërkombëtarëve merr angazhime dhe bën të kundërtën në veprimet e tij, veçanërisht për sa u përket problemit të zgjedhjeve. Pra, me pak fjalë, për ne s’ishte e papritur, s’ishte e papritur se ky njeri dhe kjo mazhorancë ka një problem të madh me marrëdhëniet me institucionet e shtetit, me tutelën që ai ushtron ndaj tyre, me votën e lirë të qytetarëve dhe mbi të gjitha me atë kauzë që ne me të drejtë prej dy vitesh rresht luftuam që edhe shqiptarët, edhe ndërkombëtarët, të kuptonin se në Shqipëri kishte ndodhur në 2009 një gjë e madhe dhe kjo gjë nuk duhej të përsëritej. Këtë kazus ne e kthyem në një kalë betejë jo për kredon tonë politike dhe morale, sigurisht për të bërë transparencën e zgjedhjeve, sigurisht për të parë nga e ardhmja, sigurisht për të bërë ndryshim në Kodin Zgjedhor dhe mbi të gjitha për të realizuar një palë zgjedhje siç ishin ato të 8 majit, vërtetë ndryshe nga ato të 2009. Por, në mes të ditës shqiptarët panë, shqiptarët dëgjuan, ndërkombëtarët asistuan dhe u deklaruan se zgjedhjet e 8 majit pavarësisht nga sjellja mjaft qytetare e qytetarëve shqiptarë evidentojnë dhe një herë qartë dhe pastër që fajin se kanë shqiptarët, fajin e kanë qeveritarët.

Ky ishte konkluzioni i procesit elektoral sipas jush. Ndërkohë që vlerësoni ju si kryeproblemin e këtij procesi, të këtyre zgjedhjeve?

Problemet janë të shumta. Ato s’janë elementare, por janë thelbësore. Kur them që janë thelbësore në radhë të parë ato fillojnë nga mendimi që ka mazhoranca aktuale e nga okupimi dhe kapja që ajo u ka bërë institucioneve të shtetit të së drejtës. Këtu kam parasysh që vërtetë Shqipëria i ka të gjitha institucionet sipas Kushtetutës së vendit, por këto institucione janë kapur. Janë kapur nga një mazhorancë nëpërmjet manipulimit dhe deformimit që ajo i ka bërë institucioneve të këtij vendi, në radhë të parë Kushtetutës së vendit, në radhë të dytë parlamentit të vendit nga prodhohen këto institucione, duke ndryshuar në mënyrë të njëanshme mënyrën e përzgjedhjes së tyre, mënyrën e votimit të tyre, duke mos qenë aspak bashkëpunuese, duke ushtruar një tutelë permanente ndaj këtyre institucioneve që në fund të fundit ato dalin jashtë funksionit të tyre kushtetues, siç vërtetoi dhe veprimet e fundit si të KQZ-së që është një institucion kushtetues, ashtu dhe Kolegji Zgjedhor me vendimet njëpasnjëshme që u ndërmorën, që ishin haptazi joligjore, jo të drejta, që në vend të jepnin drejtësi dhanë padrejtësi, në vend që të frenonin gjithë atë shkallë të lartë manipulimi që u zhvillua qysh nga herët. Kur themi qysh nga herët nuk duhet të shikojmë thjesht vetëm numërimin, apo vendimet antiligjore të komisionit Ristani, apo vendimet antiligjore të gjykatës së Tomës apo të Sashenkave. Unë kam parasysh që këtu në radhë të parë nëse opozita zhvilloji një luftë politike me mjete të forta demokratike dhe nga krahu tjetër pati një përgjigje antidemokratike deri në vrasje të qytetarëve shqiptarë në protestën e 21 janarit, nuk u bë asnjë hap për të implementuar në Shqipëri kërkesat minimale që shtroi raporti i OSBE – ODHIR në 2009. Jo vetëm që s’u bë dhe s’u hodh asnjë hap, por përkundrazi pati një përkeqësim të mëtejshëm. Kështu, ne kemi kërkuar gjatë dy viteve të kaluar problemin e listave të zgjedhësve, ne kemi kërkuar problemin e kartave falso, i kemi denoncuar këto publikisht dhe që nga ajo ditë e deri më sot asnjë hap institucional, qoftë nga prokuroria e shtetit, qoftë nga organet e drejtësisë, nuk u ndërmor për të prevenuar mospërsëritjen e këtyre fenomeneve në zgjedhjet e 8 majit. Kështu do të thosha, vetëm në Tiranë mund të them pa ekzagjeruar se në listat e zgjedhjeve janë importuar mbi 40 mijë zgjedhës.

A keni prova për këtë?

Sigurisht që prova kemi, por çështja është se provat janë për ata që kanë sy t’i shikojnë dhe veshë t’i dëgjojnë, dhe të ndërmarrin veprime konkrete për të vënë përpara përgjegjësisë ata që bëjnë këtë shkallë manipulimi. Këtu unë kam jo pak prova, në një dosje kam 10 mijë emra.

10 mijë emra të importuar?

10 mijë emra të cilat ekzistojnë në listat e zgjedhësve të Tiranës me një parje vetëm gjatë muajit të fushatës elektorale nga ekspertë të PS. Çfarë janë këto 10 mijë emra? Janë emra shqiptarësh të cilët janë regjistruar në 2 qendra votimi ose në 2 njësi bashkiake duke u ndryshuar vetëm elementë të gjeneraliteteve të tyre. Çfarë dua të them me këtë? Nëse është emri i njëjtë, atësia e mëmësia dhe mbiemri i njëjtë, vendlindja e njëjtë, në tre elementët të vitit të lindjes, të datës së lindjes apo të muajit të lindjes, ndryshon vetëm një nga këto elementë dhe programi për të kontrolluar apo për të bërë transparencën e votuesve të zgjedhësve nuk rezulton. Është dashur një kohë 1-mujore që ekspertët tanë të nxjerrin që vetëm në Tiranë, nga dublimet brenda për brenda Tiranës janë 10 mijë dublime. Ja ku janë provat, prokuroria le t’i marrë dhe le të vërë para përgjegjësisë ata që duhet vërë.

Ata janë 10 mijë emra që keni ju si provë?

Jo vetëm këto, por këto janë brenda.

Në këto lista ka marrë pjesë Bashkia e Tiranës?

Do të vij dhe aty. U fola që janë 10 mijë ato brenda njësive bashkiake të Tiranës. Këtu kam disa lista të tjera të rrethinave të Tiranës që janë vetëm pjesore, ku familje të tjera janë edhe në Paskuqan, edhe në njësitë bashkiake të Tiranës sipas parimit fshati të rrethojë qytetin. Kështu do të thosha, kam një listë të tjetër që edhe nga rrethet, pjesore përsëri sepse s’kemi arritur të përfundojmë të gjithë punën tonë, pasi s’është puna jonë në fund të fundit që të bëjmë këtë hetim, këto persona vijnë në Tiranë. Shtojmë këtu dhe kartat fallso. Deri tanimë kemi evidentuar gati 15 mijë të tillë, po shtoj këtu dhe kartat fallso.

Pra, keni 15 mijë emra të dubluar, 10 mijë nga Tirana, 5 mijë nga rrethet. Këto po thoni?

Të gjitha janë pjesore. Kaq kemi të dokumentuar deri në këtë moment.

Këto persona kanë votuar?

Kjo ngelet për t’u verifikuar. Përderisa ka një dorë që Gramoz Ruçin i ndryshon dhe regjistron në 2 minibashki, apo në 2 qendra votimi, duke i ndryshuar vetëm datën e lindjes, muajin e lindjes, vitin e lindjes, sigurisht që ka një dorë dhe kjo dorë është ajo që ka pasur skemën e manipulimit të rezultateve të zgjedhjeve. Prandaj ju shtroni pyetjen me të drejtë se cili është roli i Bashkisë së Tiranës?

Para se të shkojmë atje, sepse është shumë e rëndësishme dhe është një akuzë shumë e rëndë. Besoj se këto lista dhe këto shifra dalin për herë të parë në publik apo jo?

Po.

I keni të vërtetuara këto 15 mijë emra për këtë skemë manipulimi të zgjedhjeve në Tiranë, siç thoni, sepse bëhet fjalë për një megaskandal nëse kjo vërtetohet?

Absolutisht për mua është një megaskandal. Nëse në këtë vend duhet të fillojë korrigjesa vërtetë për zgjedhje të lira dhe demokratike duhet të fillojë nga dy elementë, nga listat dhe nga manipulatorët e këtyre listave, dhe këto manipulatorë kanë emra konkretë. Unë akuzoj drejtpërdrejtë zëvendësministrin e Brendshëm, Ferdinand Pone, akuzoj drejtpërdrejt drejtorin e Përgjithshëm të Gjendjes Civile, Armand Telitin, i cili mund të rrëfejë sa të dojë tek bashkëshortja e tij, që po s’shpëtoi nga burgu s’është për t’u dënuar kurrë.

Çfarë ishte kjo rrëfimi i gruas?

Po, gojët e liga, në Tiranë apo në Durrës thonë se Teliti i ka thënë bashkëshortes se po shpëtova kësaj radhe nga burgu, s’jam për t’u futur më në burg.

Këto janë thashetheme, s’janë prova…

Të lutëm, ku ka zë, s’është pa gjë, thotë populli. Megjithatë unë e akuzoj drejtpërdrejtë për këto lista. Le të jetë prokuroria e vendit, t’i marrë këto lista, t’i verifikojë dhe të vërë para përgjegjësisë, nëse vërtetë duam që procesi zgjedhor i ardhshëm të jetë i pastër nga ana e infrastrukturës, kjo fillon nga ndëshkueshmëria ligjore e atyre që vënë dorë mbi listat e zgjedhësve, që shpërdorojnë detyrën, që shkelin ligjin dhe deri tek votuesi i cili në mënyrë manipulative me para të korrupsionit apo me gjithçka tjetër ka votuar dy herë. Nëse nuk bën këtë gjë prokuroria e vendit të mos besojmë dhe absolutisht të mos shpresojmë se zgjedhjet e tjera do të jenë më të pastra se këto që kaluan.

Keni prova që zëvendësministri i Brendshëm dhe drejtori i Përgjithshëm i Gjendjes Civile kanë dorë në këtë që ju e konsideroni manipulim?

Prova është kjo, janë persona që ligji i ngarkon për të bërë në mënyrë të saktë, të qartë, të pastër, listat e zgjedhësve. Janë personat që ligji i ngarkon që të vënë para përgjegjësisë këdo që kërkon të manipulojë listat e zgjedhësve, janë personat të cilët duhet të paraqiten dhe të japin shpjegimet përkatëse pse dhe nëse ata dëshirojnë, unë u jap raste konkrete, por nuk jam unë që duhet të bëj hetimin, nuk jam unë që duhet të bëj gjykimin, nuk jam unë e vërteta e gjërave.

Keni emra të tjerë përveç këtyre të dyve?

Sigurisht që emrat fillojnë me Ministrinë e Brendshme që mbulon problematikën e infrastrukturës së zgjedhjeve, vazhdon me gjendjen civile ose me regjistrin kombëtar të gjendjes civile që me të drejtë kryeministri Sali Berisha është mburrur në të gjitha tam-tamet dhe qokat e tija diplomatike, dhe fjalimet propagandistike si agjitator dhe komisar i këtij vendi. Por është koha që të gjithë këta të vihen përpara përgjegjësisë. Kur them të gjithë këta kam parasysh që janë një administratë e tërë shtetërore që ligji, Kodi Zgjedhor, i ngarkon që të zbatojnë ligjin dhe jo të manipulojnë listat e zgjedhësve dhe kartat e identitetit. Pra, unë do të thosha se nëse prokuroria e vendit do të merrte këto prova, nëse prokuroria është shteti, do të bllokonte menjëherë të gjithë listat që ndodhen tek materialet zgjedhore të datës 8 maj dhe t’i verifikonte duke filluar nga dy elementë. Elementi i parë që këta njerëz që janë këtu, të dubluar, me ndryshime gjeneralitetesh të dorës së dytë, siç është data e lindjes apo viti i lindjes, kanë votuar apo s’kanë votuar dy herë dhe prej këtu të arrijnë në vënien para përgjegjësisë së ligjit këdo që ka shpërdoruar detyrën, që ka shkelur ligjin dhe ka marrë pjesë në këtë maskaradë elektorale të 8 majit dhe jo vetëm të 8 majit.

Përveç dublimit të emrave, skema që ju pretendoni e manipulimit të rezultatit në Tiranë ka elementë të tjerë dhe prova konkrete?

Elementi i dytë janë kartat e identitetit falso të cilat edhe për këto prokuroria e vendit duhet të kapë menjëherë provën dhe jo të lërë që të zhdukë provën siç zhdukën provat.

Ju vetë keni prova?

I nderuar Peza ke të bësh me një person në studio që gjatë vitit 2009 – 2010 në parlamentin shqiptar ka denoncuar kartat e identitetit dhe pikërisht me ju në një kanal tjetër televiziv ju kam treguar kartat falso. Në parlamentin shqiptar i kam bërë një sfidë Sali Berishës duke i dhënë karta falso të një personi me të njëjtën fytyrë, me gjeneralitete të ndryshme, 5 herë. I thashë që tërhiqem nga kauza ime për transparencën e zgjedhjeve nëse ti më vërteton që ky njeri, me këtë kartë falso, ka votuar 5 herë nga Korça deri në Tiranë apo jo. Ju e patë që kryeministri në sallën e parlamentit nuk e pranoi këtë sfidë, ju e patë që prokuroria e vendit bëri sikur hapi hetim duke kërkuar tek mua këto karta, kur prokuroria shumë mirë mund të bënte që atë që kërkonte opozita, hapjen e materialeve zgjedhore, pikërisht t’i bllokonte me iniciativë të vetën dhe të thoshte zotëri silli ato kartat që ke, dhe të gjithë listat kanë përbri numrin e dokumentit të kartës së identitet dhe shumë mirë me kompaninë “Sagem” mund të vërtetonte që këto numra që ndodhen në listat e zgjedhësve janë apo s’janë origjinale, ligjore, të sakta dhe sa nga këto s’janë. Një prokuror në këtë vend bëri detyrën siç ishte një prokuror në Fier, për një Qendër Votimi të Ruzhdies dhe hetoi brenda një muaji problemin, dhe dha përgjigje. Do të duheshin dy vjet të kalonin nga 2009 e deri më sot që Gjykata e Fierit gjasme të dënonte komisionerët e Ruzhdies së famshme. Por ja që u la Ruzhdia dhe nga një Ruzhdie e panjohur në Shqipëri, tani Ruzhdie u kthye kryeqyteti i vendit në sytë e të gjithë publikut, në sytë e kamerave të gazetarëve shqiptarë dhe atyre ndërkombëtare, në sytë e ambasadorëve të nderuar dhe të respektuar që në mënyrën më dinjitoze bënë atë që s’kishte ndodhur ndonjëherë në Shqipëri, që në orën 2 të natës apo të 5 mëngjesit qëndruan në mënyrë permanente deri sa u numërua vota e fundit. Pikërisht atëherë kur u numërua vota e fundit dhe u shpall fitues kryetari i opozitës, kandidati i saj Edi Rama, në atë kohë hyri në lojë kryeustai, kryeustai i gjithë këtij manipulimi dhe i gjithë kësaj maskarade që ka emër të përveçëm dhe që quhet Sali Berisha. Të gjitha këto emra që ju lançova janë thjesht zbatues të urdhrave të mbrapshta për manipulimin e zgjedhësve nga kreu i ekzekutivit shqiptar.

Për 15 mijë emrat e dubluar ju paraqitët listat dhe kjo është një provë sigurisht. Për kartat e identitetit keni prova dhe kush ishte elementi tjetër i skemës manipulative sipas jush?

Lidhur me kartat e identitet ju dini se çfarë ka ndodhur në Tiranë ku vëzhguesit tanë, komisionerët tanë, kanë kapur në mënyrë vizuale kartat falso dhe si ia kanë mbathur apo aq pak sa kapëm ne një apo dy. Çfarë rëndësie ka kjo? Ky fenomen është permanent dhe ka qenë në zgjedhjet 8 majit. Ka vetëm një mënyrë kapje, kapja dhe hapja, dhe bllokimi, dhe hetimi i listave të zgjedhësve në materialet zgjedhore nga ana e prokurorisë së vendit. Elementi i tretë që ju thoni, janë paret e korrupsionit të pushtetarëve, që nga të gjitha llogaritë e bëra janë jo të pakta, por mbi 40 milionë euro të hedhura për të kompromentuar, për të blerë, për të manipuluar, për të falsifikuar rezultatin e Tiranës.

40 milionë euro janë shumë para, janë 40 kilometra autostradë…

Sigurisht që janë shumë para, por kur dëgjon që edhe në sekondën e fundit thirret anëtari i gjykatës, e di që pas kësaj do të më thoni kush është dhe si është thirrur anëtari i gjykatës së Kolegjit dhe i thuhet se ke 500 mijë euro për një vendim, sikur të jetë e vërtetë kjo i thonë herë 5, i thonë 2 milionë e gjysmë euro vetëm për një vendim.

Për vendimin e fundit e keni fjalën?

Sigurisht jo vetëm për të fundit. Fillon që nga vendimi i parë i Tomës dhe deri tek vendimi i fundit i Sashenkës. E shkruara e zeza mbi të bardhë është Kodi Zgjedhor dhe gjyqtari bën sikur nuk e shikon, bën sikur lexon apo e lexon sëprapthi. Shifrat janë kokëforta.

Pra ju po thoni se cili nga anëtarët e Kolegjit që ka dhënë vendim për Tiranën ka marrë 500 mijë euro…

Unë ju përgjigja pyetjes suaj, që thoni se ju duken shumë 40 milionë euro, se bëjnë 40 kilometra rrugë, sigurisht që janë shumë, por janë shumë pak kur ato para s’janë para djerse, por janë para të pista, janë para të korrupsionit dhe kur për ato para bëhet lufta që me këto para krimi apo korrupsioni të padala me djersë të papastër, sigurisht që kërkohen të bëhen 160 milionë apo 260 milionë, apo miliarda me punë të pista nëpërmjet atij portofoli që u mor, u vodh në sytë e shqiptarëve, në sytë e ndërkombëtarëve, në mes të ditës.

Më sqaro 500 mijë euroshin për secilin nga anëtarët e Kolegjit se nga e keni nxjerrë këtë shifër dhe si ju ka dalë shifra 40 milionë euro që është hedhur për marrjen e mandatit në Tiranë?

Si ka dalë, nga e kemi gjetur ne? Unë nuk jam prezent kur bëhen pazaret e pista megjithëse pavarësisht nga truprojat e shumtë që i kishte vënë, ne jemi në dijeni të të gjitha lëvizjeve që kanë bërë gjyqtarët e Kolegjit Zgjedhor me të gjitha zyrat ku janë futur dhe ku kanë dalë, dhe me të gjitha pazaret e bëra nga ana e tyre. Nga ana tjetër ne si opozitar nëse ndonjërit i lejohet të bëj shurdhin apo memecin, vetëm opozita është e pafalshme që të bëjë shurdhin apo memecin. Pra, ne veshët i kemi. Ne dërgojmë dhe unë pak më lart u thashë që ku ka gjë s’është pa gjë, mbi të gjitha është prova te vendimi i padrejtë, është prova tek mungesa e drejtësisë, është prova tek ato vendime të njëpasnjëshme, jo një, por disa të dhëna nga këto gjyqtarë, të cilët në vend që të jepnin drejtësi, dhanë një padrejtësi të madhe. Në vend që publiku shqiptar të merrte një mesazh që më sëfundmi filloi dhe në këtë vend guri i themelit të ketë një provë drejtësisë, përkundrazi panë që kjo drejtësi kur ia bën opozitës, kur ia bën kreut të opozitës, kur media e dha provë të qartë, se ju po kërkoni prova. A ka provë më të qartë se ajo që u pa dhe u numërua në Tiranë nga të gjithë teleshikuesit shqiptarë? S’ka provë më të madhe. E megjithatë këta gjyqtarë të korruptuar, të dhunuar nga ky pushtet, bënë realitet atë fjali që dha kryemanipulatori i zgjedhjeve në Shqipëri, Sali Berisha. Pasi e dha ai ultimatumin i pari se si duhet të deformohet rezultati në Tiranë. Pas asaj konference shtypi që ai dha u vunë të gjitha mekanizmat e shtetit me të gjitha mjetet të presionit të vendit të punës, të bukës së gojës të kalamajve, apo të parave të korrupsionit, që nga Ristani i KQZ-së dhe deri tek Kolegji Zgjedhor.

Po na thoni dhe se KQZ-ja është e korruptuar tani?

Do të thosha se KQZ-ja jo vetëm që është e korruptuar, por është e përdhunuar. Është e përdhunuar me të gjithë atë maskaradë që ajo bëri veçanërisht për rezultatin e Tiranës. Nuk mund të bëjë asnjë KQZ në botë atë që bëri ajo KQZ me atë kryetar kukull të vendosur nga Sali Berisha, që dikur e fuste në burg, kurse tani i zbaton si qen i rrahur urdhrat e tija të padrejta. E Shqipëria nuk mund të jetë as e Ristanit dhe as e Sali Berishës, demokracia është e të gjithëve, shteti i së drejtës është i të gjithëve dhe kur ky popull nuk i mohohet e drejta e lëvizjes së pushtetarit dhe të qeveritarit me mekanizmin e votës, çfarë i ngelet tjetër? Populli ka vetëm votën. Populli i kontrollon pushtetarët dhe qeveritarët vetëm nëpërmjet këtij mekanizmi një herë në katër vjet. Kur dhe kjo i dhunohet dhe i manipulohet nëpërmjet çirakëve të tillë, jo vetëm e përdhunuar, jo vetëm të korruptuar, por është pak të thuash kaq.

Për 40 milionë euro që thatë se janë përdorur në Tiranë për mandatin e kryebashkiakut të ri mund të keni prova dhe nga del kjo shifër, se njerëzit s’kanë bukë të hanë dhe këtu flitet për 40 milionë euro.

Unë nuk thashë që njerëzit kanë të hanë, përkundrazi, njerëzit s’kanë të hajnë. Unë thashë që pushtetarët kanë jo vetëm të hanë, por edhe të paguajnë për bukën e gojës ata që s’kanë të hanë me qëllim që t’ju vjedhin derëzezëve dhe atë mikropushtet që kanë një herë në katër vjet për të hedhur një votë, pro apo kundër këtyre. Ja kjo ndodh në Shqipëri nga ata që kanë të hanë, jo nga ata që s’kanë të hanë. Ata që kanë të hanë janë shumë të pakët sa gishtat e dorës, ata që s’kanë të hanë janë të shumtë dhe mendojnë se me atë 100 mijëshe, me atë 200 mijëshe apo 300 mijëshe, për një, dy apo tre vota, do të kalojnë dhe do të mbyllin javën. Ky është realiteti, i hidhur është, por ky është realiteti shqiptar, të cilët sëbashku duhet ta kalojmë, të gjithë duhet të ngremë zërin, të gjithë duhet të luftojmë dhe jo të argumentojmë të kundërtën, të bëjmë sikur s’shikojmë, të bëjmë sikur s’dëgjojmë dhe të bëjmë pyetje që nga doli shifra 40 milionë, apo nga dolën këto emra.

Emrat kanë një listë atje, por paratë nga dolën?

Unë do të shpresoja qoftë dhe një gazetar investigues të merrte 10 emra në Tiranë dhe të shkonte t’i vëzhgonte ku banon tek njësia 6, ku banon tek njësia 5, i njëjti emër me të gjitha gjeneralitetet dhe të investigonte deri aty që votoi tek njësia 5 apo 6. Pra, e gjithë shoqëria shqiptare duhet të ngrihet në këmbë dhe të kërkojë nga instancat e shtetit, por veçanërisht nga organi i prokurorisë, që këto që unë thashë, për manipulimin e listave, për kartat fallso, për paret e korrupsionit, se s’është detyra ime të vërtetoj është 40 milionë fiks, është 45 apo 25 milionë. Korrupsioni ka organe të cilat duhet të hetojnë. Unë si opozitar kam të drejtën ta denoncoj, unë si opozitar kam detyrimin të dëgjoj, unë si opozitar kam detyrimin ta përshkallëzoj luftën time politike me këto elementë. S’jam unë as që duhet të bëjë hetimin, as që duhet të bëjë gjykimin dhe s’jam unë e vërteta e këtyre që thashë. Le të më japin një përgjigje ndryshe organet e hetimit dhe unë do të dalë përsëri publikisht, përsëri në emision përballë jush dhe të kërkoj ndjesë, dhe do të mbaj qëndrim moral dhe politik për përfaqësimin politik e institucional që përfaqësoj si forcë politike dhe si parlamentar i këtij vendi.

Po ju bëni akuza vetëm për Tiranën, ndërkohë që në qytete të tjera ku ju keni fituar, përkundrazi thoni se kanë qenë zgjedhje të mira dhe me standarde? Si është e mundur, ka dy standarde qëndrimesh në dy hapësira të ndryshme politike?

Nuk thashë pikërisht këtë. Nuk është problemi se edhe në qendra të tjera urbane apo rurale nuk qenë këto probleme. Përkundrazi, është meritë e medias që raste dhe pse sporadike, i ka bërë publike. Kam parasysh një emision që ekziston në një kanal tjetër televiziv që ka kapur dhe ka deklaruar publikisht se 20 familje nga Lazarati fjala vjen shkojnë dhe zhvendosën e regjistrohen në buzë të Tepelenës që ka gjithsej 300 votues për të fituar ai që fitoi. E pra, kështu mund të vazhdoja me plot lëvizje ambulatore të votuesve shqiptarë nga pushtetarët aktualë në të gjithë territorin e vendit. Unë do të thosha se edhe në Tiranë, që unë them me gjithë 40 milionët e hedhura, me gjithë 40 mijë votuesit ambulatorë nga një njësi në një tjetër, me gjeneralitetet e shtrembëruara, për të gjithë ata shqiptarë që kanë lëvizur nga rrethinat e Tiranës sipas parimit Mao ce Dun, fshati të rrethojë qytetin, me gjithë ato lëvizje nga të gjitha trevat e Shqipërisë për të ardhur dhe për të votuar në Tiranë, deri tek barsoletat që doktori dhe infermierja kosovare kishin në gishtin e majtë të njëjtën shenjë ditën e martë që kishte dhe pacienti shqiptar. Ky i fundit tha, për çudi paskemi të njëjtin shenjë në gishta, mirë unë që kam pasur votime po ju çfarë keni pasur? Dhe ata çfarë të bënin, vetëm buzëqeshën, se për fat të mirë kishte qenë boja e cilësisë s’kishte ikur nga e diela në të martën që pacienti nga Shqipëria vizitohej. Pra, megjithë këto karta të falsifikuara, me gjithë këtë maskaradë të madhe elektorale që u përqendrua i gjithë pushteti dhe e gjitha makina shtetërore në Tiranë, përsëri Edi Rama fitoi ngushtësisht, por me 10 vota. Atëherë kryeustai i qosheve tha kur unë vodha 40 mijë vota, si ka mundësi ta lë për 10 vota? Ka dy muaj që torri e çfarë nuk torri, me Ristan, me Tomë dhe me Sashenkë, deri sa mori atë që realizoi, që nga 10 të kalonte me 90 vota në mënyrën më të padrejtë, në mënyrën më të paligjshme, duke iu vënë një llojë turpi demokracisë, duke i shuar shpresën shqiptarëve për votime të lira dhe demokratike, duke venituar shpresën e shqiptarëve për marrjen e statusit të vendit kandidat, duke e bërë Shqipërinë një vend që tregohet me gisht nga të gjithë partnerët tanë ndërkombëtarë, brenda familjes tonë europiane, por edhe matanë europës, siç është SHBA, për të cilat ju patët nderin dhe fatin, dhe teleshikuesit tuaj që 1 javë më parë përcolli mesazhe shumë të drejtpërdrejta dhe shumë realiste për të gjithë politikën, qytetarët shqiptarët dhe partnerët tanë ndërkombëtarë.

Megjithatë, përtej kësaj pjese retorike, kjo pjesa e fundit, ju patët deklaruar se do ta kthenit zgjedhjet e 8 majit në një referendum popullor kundër Sali Berishës, gjë që s’ndodhi. E dyta, Aleanca për Qytetarin ka marrë 140 mijë vota më shumë se sa aleanca juaj. Pra duhet të pranoni që keni humbur?

Do të dëshironte Berisha dhe e trumbeton me të madhe se është kështu, por ajo që kemi deklaruar sigurisht që ne e realizuar në zgjedhjet e 8 majit, dhe të gjithë këtë predikim, apo këtë demagogji të radhës, që Berisha përdori edhe pas zgjedhjeve të 8 majit, e hedhin poshtë vetëm dy fakte. Fakti i parë është pjesëmarrja e njerëzve në votime, një pjesëmarrje e paparë në historinë e të gjitha zgjedhjeve administrative të zhvilluar në Shqipëri.

Nuk ka qenë ndonjë diferencë shumë e madhe nga herët e tjera…

Absolutisht, mjafton vetëm t’i referohesh Tiranës. Nëse në Tiranë janë vetëm vota të vlefshme 250 mijë, atëherë në zgjedhjet e kaluara nuk jam i saktë në shifër, por mund të jenë 90 mijë më pak. 90 mijë më pak për katër vjet s’është pak, është shumë.

Ka edhe rritje të numrit të votues për shkak të rritjes së qytetit…

Atëherë do të thosha se nëse do të ishte kështu që të kishte rënë në territorin tjetër të Shqipërisë, që nga Kukësi deri në Konispol, në Vermosh, në Durrës, në Elbasan, në Vlorë apo në Fier, por kjo pjesëmarrje, ky tregues i pjesëmarrjes së njerëzve është në çdo komunë të Shqipërisë, në çdo qytet të madh, të mesëm apo të vogël në Shqipëri, edhe në kryeqytet. Pra është një pjesëmarrje që është edhe më e lartë se sa në zgjedhjet politike të 2009. Pra, mjafton ky tregues për të thënë se nuk e kanë fajin shqiptarët dhe votuesit shqiptarë, përkundrazi, kauza e Partisë Socialiste 2-vjeçare dhe vështirësitë, dhe pakënaqësitë e elektoratit shqiptar për shtetin e së drejtës, për standardin e jetesës, për padrejtësitë që ekzistojnë në këtë vend, atë armë që ka në dorë shqiptari dhe shqiptarët e përdorën më së miri. Ata e përdorën më së miri me pjesëmarrjen e tyre në radhë të parë në votime. Këtë s’mund ta kundërshtojë dot absolutisht asnjë njeri dhe aq më keq të shtrohet dhe si pyetje që nuk u realizua që ju premtuat. Përkundrazi, ne u jemi mirënjohës përgjigjes së thirrjes që ne i bëmë elektoratit shqiptar. Po ju them me kompetencë, që s’ka qytet të Shqipërisë nga Konispoli deri në Velipojë që të mos ketë rritje të pjesëmarrësve në votime më shumë se sa në zgjedhjet politike të 2009, kurse me zgjedhjet administrative të 2007 as nuk mund të krahasohen. Kjo është e para. E dyta, tek rezultati elektoral. Të mos harroni që në zgjedhjet elektorale të 2007-ës ne kemi pasur një koalicion tjetër me një aleat tjetër, që tashmë ai aleat llogaritet sipas treguesve elektoral si forcë e tretë politike në Shqipëri. Atëherë ne arritëm një tregues elektoral, që e quajtëm fitore, se fituam disa qytete. Në këto zgjedhje ne s’e kishim atë aleat, përkundrazi ai aleat votat e tij i kishte kaluar në një koalicion ku ai qeveris sëbashku me zotin Berisha. Atëherë pyetja shtrohet cilën nga bashkitë që ne fituam në 2007 humbën në 2011? E para. E dyta, sa është numri i bashkive që ne nuk i kishim dhe i fitojmë qoftë edhe për herë të parë pas 20 vitesh demokraci, siç është Laçi apo Kavaja.

Por, po keni humbur dhe Cërrikun e disa të tjerë që i keni pasur gjithmonë të tuat…

Kjo është e vërtetë që ka humbur jo për arsye elektorale, për arsye të brendshme tonat. S’ka faj elektorati atje. Fajin e kemi ne në përzgjedhjet që kemi bërë, në problemet e bashkimit dhe të organizimit të forcave tona politike dhe organizative në qendra të caktuara. Po u them unë, që është humbur bashkiak e Cërrikut. Është humbur, do t’i them unë kë kemi humbur, kemi humbur Librazhdin, kemi Përrenjasin, por ama kemi fituar ato që s’i kishim fituar në 20 vjet. Kemi fituar Kavajën, kemi fituar Laçin, por unë mund të thosha se kemi fituar me një zonë të nderuar dhe të respektuar, siç është Burreli. Do të thosha jo vetëm kaq, u fitua Saranda pas 8 vitesh. U fitua e gjithë vija e detit që nga Konispoli tek Ksamili, tek Lukova, tek Himara, tek Orikumi, tek Novosela, për të vazhduar deri tek Shëngjini dhe Velipoja. Pra, dy tregues nuk mund të mohohen, e para në përgjigje të thirrjes sonë vërtetë u kthye në një referendum popullor kundër kësaj qeverisje me pjesëmarrjen në votime. Së dyti, rezultati elektoral i kësaj radhe, i PS-së në zgjedhjet e pushtetit vendor është i pakrahasueshëm me çdo parashikim që ne kishim bërë. Kështu që, në përgjigje të pyetjes suaj ne si forcë politike do të ishim shumë të ngrohtë, shumë mirënjohës kësaj mbështetje elektorale të qytetarëve shqiptarë dhe kjo na ngarkon me përgjegjshmëri, që tashmë që ne do të qeverisim 2/3 e territorit, ta justifikojnë të zgjedhurit tanë në pushtetin vendor veç me punë për të justifikuar atë besim të madh politik që i dhanë komunitetet në të gjithë territorin e vendit.

Dy argumente të tjera përveç 140 mijë votave që nuk na shpjeguat diferencën, janë kundërargumentet e tua…

Dhe ky s’është argument, është spekulim që bën Sali Berisha. Janë disa tregues elektoral. Kur bëhet fushata elektorale në zgjedhjet administrative përse bëhen? Bëhen që votoni filanin, votoni PD-në apo PS-në. Ky është lajtmotivi në daç i Edi Ramës në fushatë, apo Sali Berishës. Atëherë nëse do t’i referohemi, se Sali Berisha nuk i referohet shifrave që kanë marrë kandidatët që konkurruan për kryetar bashkie dhe komune. Pse s’u referohet ai. Se nuk i del bilanci, i del negativ.

Mund të ketë dhe mbështetje individuale, për shkak të raporteve dhe lidhjeve familjare…

Pra, ka tre rezultate. Ka një rezultat, një shifër të kandidatit për kryetar bashkie dhe komune që Sali Berisha e harron, që qoftë si numër, qoftë si territor, qoftë si votues, është koalicioni për të ardhmen para dhe përkthyer në mandate elektorale është 71 me 69 për koalicionin e drejtuar nga Edi Rama. Ky është treguesi elektoral i pari. E dyta që thoni ju, është treguesi për partinë politike, që ka bërë fushatë Sali Berisha dhe Edi Rama. Janë 130 mijë vota Partia Socialiste plus mbi Partinë Demokratike. Ka një tregues të tretë elektoral që del pyetja juaj që i referohej demagogjisë së radhës të Sali Berishës, që është koalicioni. Çfarë është koalicioni? Ju thoni që votat janë për kandidatët. Por këto kandidatë janë 380 në të gjithë Shqipërinë, për bashki dhe komuna. Këto vota për koalicionin e dini për sa kandidatë janë? Janë për mijëra kandidatë, për këshilltarë komune dhe bashkie. Që do të thotë ju nëse aspironi të bëni kryetar komune apo bashkie, e bëj për teleshikuesit këtë, nëse subjekti politik ku ju aderoni nuk ju vendos në listë, ju shkoni dhe regjistroni emrin në një parti kushdo që të jetë ajo, e djathtë dhe e majtë.

Dhe ju keni marrë kështu. Kanë qenë kandidat demokrat në darkë, në mëngjes janë gdhirë socialist…

Jo, jo. Flas për kandidatë për këshilltar që sigurojnë votat, që i referoni ju në pyetjen tuaj sipas demagogjisë së Sali Berishës. Pra, ai s’është fare fitues.

Ka një tregues tjetër që s’është referendum dhe që s’e keni fituar. Kryetari i partisë dhe kryereferendari humbet garën e vet direkte në Tiranë, qoftë edhe duke fituar me 10 vota siç thoni.

Nëse edhe ju si analist, si drejtues emisioni e quani të humbur kandidatin tonë dhe liderin e opozitës në Tiranë.

Qoftë edhe me 10 vota s’është fitore.

Edhe me një votë je i fituar, e para. Në demokraci kjo është, një votë më shumë je i fituar. Por, e dyta, të mos bëjmë se ju me pyetjen tuaj kur më thoni dhe me 10 vota, me një të fshirë të lapsit mi hoqët ato argumente që unë thashë pak më lartë. Unë thashë më lart se janë 40 mijë votues të importuar kundër këtij kandidati, kundër këtij kryetari. Unë thashë se janë 40 milionë euro të hedhur kundër këtij kandidati, kundër këtij lideri.

Mbeten për t’u verifikuar…

I kam konkrete për t’u verifikuar dhe i bëra pale organeve të këtij sistemi të hetimit që t’i marrin dhe t’i hetojnë, t’i ballafaqojnë. Këtu flasim politikisht. Pra, në planin moral dhe në planin politik, dhe në planin institucional, opozita shqiptare dhe lideri i saj Edi Rama e ka fituar betejën moralisht dhe politikisht, e ka fituar me Sali Berishën, e ka fituar me Lulzim Bashën. Nëse manipulimi i rezultatit në tavolinë u pastrua me një vendim të ashtuquajtur gjykatë apo Kolegj Zgjedhor siç është futur në terminologjinë e Kodit Zgjedhor kjo nuk do të thotë se Edi Rama ka humbur. Edi Rama ka bërë dy fushata, një fushatë përballë Sali Berishës në të gjithë territorin e vendit dhe e ka fituar. Absolutisht t’i numërojë, besoj se teleshikuesi i kanalit tuaj televiziv e ka të qartë nga Velipoja deri në Konispol, në Durrës, në Elbasan, në Vlorë, në Lushnje, në Berat, në Sarandë, në Tepelenë, në Memaliaj, në Përmet, në Këlcyrë, në Gjirokastër, ku e do, në Korçë, në Pogradec, ku ka humbur? Po kërkojmë në ndonjë pikë se ku ka humbur. Pra, ai e ka fituar betejën me Sali Berishën si lider i opozitës dhe e ka fituar dhe betejën kundër manipulimit të Sali Berishës, me kandidatin e Sali Berishës, Lul Bashën, në Tiranë. Pra, Edi Rama ka një gjë që s’e ka fituar, s’ka fituar betejën me institucionet Kushtetuese të këtij vendi që japin padrejtësi. Por kjo s’është beteja e Edi Ramës, kjo është beteja e të gjithë shqiptarëve, kjo është e juaja, kjo është e publikut që na ndjek tani në këtë orë. Këtë betejë Edi Rama e ka marrë përsipër ta çojë deri në fund. Kur them Edi Rama, kam parasysh atë si lider të PS-së, kam parasysh opozitën shqiptare. Kjo është beteja jonë, kjo është beteja e shqiptarëve, kjo betejë do të fitohet herët apo vonë. Çështja është që boll kemi humbur kohë, s’duhet të humbasim gjatë. Prandaj unë jam këtu për t’u bërë apel qytetarëve, vend për dëshpërim nuk ka, vend për panik nuk ka, vend për lodhje nuk ka, vend për dorëzim nuk ka, ka vend që të gjithë të ngrihemi dhe të gjithë të bëhemi të ndërgjegjshëm për këtë që ka ndodhur, dhe të gjithë të preokupohemi për të vendosur drejtësinë në vend, për të vendosur demokracinë në vend, për të vendosur shtetin e së drejtës në vend, për t’i dalë fateve të vendit për integrimin në BE, për stabilitetin e vendit, për reformat në vend, për standardin e jetesës në vend. Ky është misioni i opozitës, ky është detyrim patriotik dhe qytetar i çdo qytetari shqiptari.

Kolegji Zgjedhor në vendimmarrjen për Tiranën e njeh Lulzim Bashën si kryetar të Bashkisë së Tiranës. A do ta njihni apo jo rezultatin e dhënë nga Kolegji Zgjedhor për Tiranën?

Nuk bëhet fjalë për ta njohur rezultatin e Tiranës pasi pyetja juaj ka dy përgjigje nga ana jonë. Një përgjigje është përgjigje pozitive që të pranojmë vendimin e Kolegjit dhe bashkë me të të pranojmë dhe manipulimin. Për këtë jemi dakord. Kurse përgjigja jonë nuk është kjo. As misioni jonë s’është kjo dhe as e vërteta s’është kjo. E vërteta cila është dhe cila është përgjigja jonë? Përgjigja jonë është kundërshtimi, përgjigja jonë është mospranimi. Nëse ne nuk kundërshtojmë, nëse ne pranojmë pikërisht këtë të parë dhe të dëgjuar atëherë bashkë me të do të pranojmë dhe mungesën e demokracisë në Shqipëri, do të pranojmë padrejtësinë në Shqipëri. Vlerë është të pranosh drejtësinë, nuk është vlerë të pranosh padrejtësinë.

Pra s’e pranoni vendimin e Kolegjit?

As që bëhet fjalë që ne ta pranojmë. Si mund të pranojmë ne një padrejtësi, si mund të pranojmë ne një manipulim. Ne jemi një forcë politike, ne jemi e vetmja alternativë për të alternuar pushtetin në Shqipëri dhe kemi vetëm një mekanizëm për të ardhur në pushtet, mekanizmin e votës. Kur ky mekanizëm përdhunohet, kur ky mekanizëm manipulohet, kur ky mekanizëm shtrembërohet, kur këto organe drejtësie japin padrejtësi, kur të gjitha këto institucione të shtetit vihen në krye në ndihmë të këtij manipulimi si mund ta pranojmë? Nuk bëhet fjalë për ta pranuar, se ky s’do të ishte jo vetëm shfaktorizim i opozitës, por kjo do të ishte dhe një tradhti e vlerave demokratike, kjo do të ishte një tradhti për integrimin e Shqipërisë, ky do të ishte një shtrembërim i madh i europianizmit të vendit. Si mund ta pranojmë ne këtë? Pra, ju nëpërmjet pyetjes suaj kërkoni përgjigjen time. Kjo është përgjigja ime dhe s’kemi dy alternativa. Alternativa tjetër është që të bëjmë sikur kemi opozitë, të ulim kokën, të pajtohemi me faktin e kryer, të pajtohemi me padrejtësinë, të pajtohemi me manipulimin

Çfarë kuptoni me mospranimin e rezultatit në Tiranë?

Për të gjitha këto që unë u thashë dhe për të gjithë veprimet që do të pasojnë këtë çështje ne nuk do të rreshtim për të përdorur të gjitha mjetet demokratike. Ne në dy vitet e kaluara na është thënë edhe nga ju personalisht, edhe nga kolegët tuaj, edhe në studion ku ne jemi, që pse nuk u referoheni institucioneve të vendit, pse s’vini tek Kolegji, pse s’vini në prokurori, pse s’vini tek kjo gjykatë, pse s’vini në Gjykatë Kushtetuese, pse s’vini në Venecia, pse s’vini në Gjykatës e Strasburgut.

Nuk besoj se ju kemi thënë gabim…

Sigurisht keni bërë mirë, por morët përgjigje kësaj radhe. Shkuam në Kolegj Zgjedhor disa herë. Besoj se e morët përgjigjen ne dhe ju. Ne do të vazhdojmë me rrugën institucionale, do të vazhdojmë me të gjitha hallkat e gjykatave që ka në Shqipëri, deri tek Gjykata Kushtetuese.

Derisa thuhet shtet ligjor ne do t’i njohim dhe do t’i drejtohemi institucioneve, dhe të luftojmë që t’i përmirësojmë institucionet…

Shtet ligjor predikonim dhe në 50 vitet e kaluar, shtet ligjor, por ishte shtet partiak, monopartiak, diktatorial. Kështu i kemi thënë. Por cili është dallimi midis të djeshmes dhe të sotmesh? Atë që thoshte komandanti dje, atë bën dhe komandanti i sotëm. Atë që bënin gjykatat dje atë bëjnë gjykatat dhe sot, megjithëse atëherë gjykatat ishin leva të partisë, sot me Kushtetutë dhe me ligj s’janë leva të partisë, janë pjesë e sistemit demokratik të një vendi, janë organe të pavarura që varen vetëm nga Kushtetuta dhe nga ligji, dhe shkelin me të dyja këmbët në mes të ditës Kushtetutën dhe ligjin, dhe në sytë e opinionit publik i japin padrejtësinë më të madhe me gurin themelor të shtetit që është vota.

A ndihet ndonjë çikë fajtore opozita për këtë situatë?

Cila është fajtore?

Opozita…

Ku. Cila është përgjegjësia e opozitës.

Keni qenë në pushtet për 8 vjet, pse s’i forcuat institucionet?

Sigurisht që kemi qenë në pushtet dhe s’kemi bërë absolutisht të njëjtën gjë.

Keni bërë reforma në bashkëpunim me këtë mazhorancë pse i bëtë në mënyrë të tillë që të japë këto pasoja sot?

Ju lutem, t’i marrim gjërat me radhë. Kemi qenë dhe ne në pushtet. Sigurisht që nuk predikoj se gjithçka e kemi bërë mirë, në mënyrë hyjnore. Përkundrazi, edhe ne kemi bërë gabime, në ndonjë rast dhe faj, por absolutisht nuk kemi bërë të tilla. Nuk mund të krahasohet në asnjë mënyrë KQZ-ja e qeverisjes 8-vjeçare të PS-së me KQZ-në e Sali Berishës dhe të Ristanit sot. Unë kam lënë pushtetin si forcë politike në 2005 dhe kam pasur në Gjykatë, në këtë Kolegj që predikojmë ne sot, ka pasur jo pak, por 7-8 mandate në lojë, kur problemi bëhesh për 2-3 mandate dhe që unë përsëri mund të isha në pushtet, më thoni, përjashtoni një mandat me të drejtë që u hap kutia dhe u numërua, të gjitha mandatet e tjera unë i humba me vendime të Kolegjit. Ashtu e menduan ato, pra unë s’ndikova. Nuk është e njëjta gjë, s’mund të heqim të njëjtën paralele.

Keni fituar mandate në Gjykatën Kushtetuese në 2001?

Për cilën Gjykatë Kushtetuese e keni fjalën?

Në 2001…

Sigurisht që ka pas të drejtë që e ka dhënë Gjykata Kushtetuese në atë kohë. Nuk më kujtohet rasti, por mos harroni që unë kur fillova përgjigjen e pyetjes që ju më bëtë e fillova që edhe ne kemi bërë gabime, por jo faje të kësaj natyre. Nuk mund të hiqet e njëjta paralele, nuk mund të thuhet e njëjta gjë. E para. E dyta, edhe ju i keni zgjedhur thoni. Po, i kemi zgjedhur, në Gjykatë Kushtetuese, në Gjykatë të Lartë, në Kolegj, i kemi zgjedhur, në parlament, sipas Kushtetutës. Çfarë ka ndodhur? S’ka më votim në parlamentin shqiptar. U hoq votimi i fshehtë për institucionet Kushtetuese të një vendi, në daç për Gjykatën Kushtetuese, në daç për Gjykatën e Lartë, vetëm e vetëm për të vajtur militantët e partisë. Ky shtrembërim i madh i principeve demokratike, i shtetit të së drejtës, i pavarësisë së institucioneve dhe legjitimitetit të tyre. Detyrimisht edhe ato njerëz që janë sigurisht që janë bërë leva të kësaj partie në pushtet. Këtu s’është problem thjesht se kush e mori këtë parti, qoftë kjo edhe kryeqytetin. Këtu është rrëzuar komplet ngrehina e pavarësisë së institucioneve të shtetit demokratik, të shtetit të së drejtë. Kjo është shumë alarmuese, shumë shqetësuese, shumë dëshpëruese për këdo, jo thjesht për opozitën. Ne do të përmbushim u thashë, misionin tonë si opozitë se prandaj jemi si forcë politike. Por, nuk mjafton vetëm kjo pasi në ekranet televizive dalin mjaft të analizuar dhe mjaft analistë që janë shtuar që ndoshta për bukën apo me paratë e pushtetit sigurisht përgjërohen për standardet demokratike, përgjërohen për shtetin e së drejtës, përgjërohen për suksese ekonomike dhe në fund Shqipëria jashtë dyerve të integrimit në BE.

Si përfundim zoti Ruçi do ta njihni Lulzim Bashën si kryetar bashkie në Tiranë?

Tashmë ne s’do t’i marrim çelësin e Bashkisë, derën e Bashkisë e ka të hapur. Sigurisht që ai është “legjitim” sipas këtij vendimi, të kësaj gjykata. Pra ky manipulim që Lulzim Basha dhe Sali Berisha bëri pë Tiranën u “pastrua” nga ky vendim i këtij Kolegji të kastruar. Por, kjo s’do të thotë që ne nuk do të dalim dhe të bëjmë barrikadë për të mos u futur Lulzim Basha. Ai rrugën e ka, derën e bashkisë e di, le të vazhdojë, por duhet të dijë, ka vjedhur një mandat dhe është i shpallur fituesi humbës në krye të bashkisë, moralisht, politikisht dhe institucionalisht si do të funksionojë kjo. Kjo është e drejtë e tij.

Në këshillin bashkiak të Tiranës ju keni vetëm një mandat më pak se sa e djathta. Duke pasur parasysh edhe përvojën në kohën kur ishte zoti Rama kryetar bashkiake dhe dy vitet e fundit Tirana ka qenë pa buxhet për shkak të mos bashkëpunimit të këshilltarëve të majtë me ato të djathtë. A do të bashkëpunoni ju apo do ta bllokoni këshillin bashkiak dhe Bashkinë?

Këtu kur u vodh mandati i kryetarit të opozitës, i kryekandidatit për zgjedhjet vendore, i kandidatit për kryetar bashkie në sytë e opinionit publik, në prezencë të kamerave të ndërkombëtarëve, të gjithë publikut shqiptar, si u ka shpëtuar, aq shumë kanë vjedhur edhe për mandate këshilltarësh saqë diferenca ka ngelur vetëm një. Por nuk është ky problemi, se cila do të jetë sjellja. Sjellja e grupit tonë të këshilltarëve në këshillin e Bashkisë do të jetë ajo sjellje që do të ketë opozita në të gjithë aksionin e saj politik që këshilli të jetë këshilli, që parlamenti të jetë parlament, që institucionet të jenë institucione. Dhe s’ka këtu siç themi, të bashkëpunojmë me të keqen, të bashkëpunojmë me padrejtësinë, të bashkëpunojmë me ato gjëra që janë kundër interesave të vendit dhe kundër interesave të kryeqytetasve. Sigurisht që ne nuk do të jemi një opozitë, apo një grup këshilltarësh destrukitv, siç bëri grupi i këshilltarëve që e la Bashkinë pa buxhet për 2 vjet. Nëse kur të vijë puna për të diskutuar për buxhet, apo për probleme të tjera, sigurisht ekspertiza e grupit tonë të këshilltarëve do të thotë fjalën e tyre dhe do të japë votën, dhe mendimin e tyre sipas rastit, rast pas rasti.

Ky vendim i Kolegjit dhe qenia e Lulzim Bashës kryetar i Bashkisë së Tiranës çfarë do të sjellë në veprimin opozitar të PS-së dhe të majtës?

Unë pak më lart iu thashë që opozita s’ka rrugë tjetër veç rrugës së rezistencës me të gjitha mjetet që të afron demokracia. Opozita unë u thashë që do të tradhtonte jo vetëm interesat e saj, por interesat kombëtare, do të tradhtonte hapat për integrimin e Shqipërisë në BE, do të tradhtonte lirinë e qytetarëve shqiptarë, do të tradhtonte mungesën e drejtësisë në këtë vend. Rezistenca e opozitës do të jetë jo thjesht e vetëm si në të kaluarën, por do të jetë me të gjitha mjetet, në të gjitha institucionet që ka një vend dhe një shtet demokratik.

Konkretisht, si ta kuptojmë rezistencën tuaj?

Unë ju thashë se nëse fola për pjesëmarrjen e institucioneve, ne nuk do të rreshtim së shfrytëzuari dhe prokurorinë e vendit për të gjitha problemet që iu parashtrova në pjesën e parë. Ne nuk do të rreshtim edhe në Gjykatën Kushtetuese me gjithë okupimin që i ka bërë kësaj gjykate Sali Berisha me votimet e hapura për të çuar vetëm ata që ai mendon se i ka të tijët. Ne nuk do të rreshtim edhe me institucione të familjes evropiane ku ne kërkojmë të integrohemi. Pra, do t’i shfrytëzojmë që nga Brukseli, Strasburgu apo Venecia, pa përjashtim të gjitha. Sigurisht që ne do të përdorim tribunat në Shqipëri që nga daljet publike dhe deri tek institucionet legjitime të një vendi, pavarësisht nga rezervat, vërejtjet që kemi pasur dhe që vazhdojmë të kemi, dhe tashmë nëse kemi vepruar një herë me atë që ndodhi në zgjedhjet e 8 majit, kemi të drejtë shumë herë më shumë se sa dy vjet më parë ku edhe brenda nesh, edhe jashtë nesh, publiku shqiptar por edhe ndërkombëtarët që në fillesat e kauzës tonë sa hapesh problemi i zgjedhjeve thoshte boll se e ka mbyllur ODHIR dhe OSBE këtë çështje, janë të certifikuara. Do të duheshin dy vjet rezistencë, dy vjet aksion, dy vjet protestë pa u lodhur, pa u mërzitur, pa u shmangur, derisa u vranë nga ky pushtet që shqiptarët dhe ndërkombëtarët të merrnin vesh se këtu vërtetë ka ndodhur në 2009 një gjë e madhe, në Shqipëri ka një krizë, kjo krizë është e thellë dhe duhet zgjidhur. Këtu ka ngelur kryefjala e Brukselit, këtu ka ngelur kryefjala e Uashingtonit. Sigurisht që ne jemi këtu për ta zgjidhur këtë krizë.

Si? Keni ndonjë formulë?

Formula s’është magjike, këtu është, brenda në Shqipëri duhet të gjendet, por kërkohet refleksion. Çfarë do të thotë? Që ajo që s’u bë në 2009, që u mbingarkuan në 2011 të bëhen tashmë, por të bëhen prej së vërteti. Çfarë do të thotë? Nëse flasim për manipulim të listave, nëse flasim për karta identiteti falso, këto kanë emra konkretë. Le të dalë kundërshtari jonë politik dhe të jap i hapur për prokurorinë e vendit dhe të thotë i merrni provat, ja ku i keni, i hetoni, i verifikoni dhe kushdo emër i përveçëm që qëndron pas këtyre fakteve dhe argumenteve të vihet në bankën e të akuzuarve pavarësisht nga titulli që ka, ministër, zv/ministër, drejtor i përgjithshëm, kryetar i KQZ-së etj,. Këtu fillon hapi i parë. Hapi i dytë, nëse ka vërtetë ka vërtetë kuptim dhe vlerësim është shkarkimi i menjëhershëm i kryetarit të KQZ-së për këtë maskaradë që bëri në zgjedhjet e 8 majit dhe jo vetëm në ato, për të mos filluar nga 2009. Hapi i tretë për këtë padrejtësi në mes të ditës që dhanë këta gjyqtarë, që venitën dhe shpresën e më skeptikut në Shqipëri për ekzistencën e drejtësie. Unë do t’i bëja një apel KLD-së, Presidentit të vendit, zëvendëskryetarit të KLD i cili në vend, është e drejtë të tij të merret me aleanca dhe me çështje të tjera kombëtare apo jokombëtare, është punë e tij mbi të gjitha të merret, të vëzhgojë, të ngre zërin për padrejtësinë që japin gjyqtarët, t’i inspektojë, t’i marrë dhe t’i analizojë në KLD se ndryshe përse është ky këshill dhe t’i ndëshkojë. Nëse duam vërtetë të kthejmë kthesa topi është në derën e kryeministrit Berisha…

Thashë se do të thoshit se Topi është në derën e Topit…

Jo, jo. Fillon tek Sali Berisha duke mos u marrë frymën institucioneve të vendit, duke mos e lançuar nga mënyra se si e lançon Prokuroren e Përgjithshme, por t’i thotë zonjë, dokumentacioni zgjedhor është aty, ligji ty të lejon t’i bllokosh menjëherë, ligji ty të lejon dhe të ngarkon t’i verifikosh, t’i hetosh, hetim të plotë dhe të gjithanshëm dhe vënien para përgjegjësisë të kujtdo punonjësi të administratës së lartë shtetërore.

Pse ia kërkoni Sali Berishës dhe nuk ia kërkoni Ina Ramës?

Unë këtu kur fola, fola për hetimin dhe kur flas për hetimin dua të kërkoj që Sali Berisha që është pengues i funksionimit të institucioneve të pavarura kushtetuese, nëse do të fillojë, se ju më shtruat pyetjen se si do të ndryshojë situata. Situata ndryshon pikërisht kështu, që institucionet të kryejnë detyrën, por përfaqësuesi i mazhorancës, kreu i ekzekutivit t’i lënë hapësirat që u lejon ligji dhe Kushtetuta e tyre që ata të përmbushin detyrën dhe jo t’i lançojë, siç i lancon, apo siç i fut në darën e tij dhe siç kërkon që t’i shkarkojë qoftë nga detyra ata që nuk zbatojnë apo nuk hedhin vallen sipas ritmit të këngës së tij politike. Ja pra, këto janë masat që duhet të marrë kjo mazhorancë, për të cilën opozita do të thotë dhe do të rezistojë kudo në të gjitha institucionet e vendit dhe të gjitha kontaktet që ajo duhet të zhvillojë me veprimet apo aksionin e saj politik.

Ky aksion përfshin atë që ju deklaruat pas zgjedhjeve të 8 majit përpara se KQZ dhe Kolegji të jepnin vendimin, bllokimin e rrugëve, mosbindje civile, mosfunksionim të institucioneve të të zgjedhurve të PS?

Shiko se thatë shumë. Kur ju shtruat pyetjen unë ju dhashë përgjigjen se ne kemi dy rrugë, të pranojmë rezultatin dhe bashkë me të manipulimin, apo të mos pranojmë rezultatin, të mos pranojmë padrejtësinë, të rezistojmë me mjete dhe rrugë demokratike. Ne kemi zgjedhur këtë të dytën, se ky është misioni ynë, ndryshe do të shfaktorizonim dhe shqiptarët do të thoshin mirë këtë e këtë s’e kemi, po as opozitë të mos kemi. Kështu që kjo s’diskutohet në këtë plan. Për sa i përket asaj që ju shtroni, se opozita do të ushtrojë mandatet e saj apo jo, absolutisht do t’i shtojë. Ka pasur fjalë që deputetët e PS-së do t’i hedhin mandatet, që këshilltarët socialistë, apo kryekomunarët, apo kryebashkiakët, do të hedhin mandatet. Asnjë mandat nuk do të hidhet. Përkundrazi, mandatet, unë pak më parë deklarova këtu se është përgjegjësi e jonë tashmë që këtë besim të madh politik që na dha votuesi shqiptar atje ku ne kemi fituar, por edhe atje ku ne s’kemi fituar me këshilltarët tanë do të japin të gjithë arsenalin përkushtues të këtyre të zgjedhurve në institucionet ku janë zgjedhur, me qëllim që komunat vërtetë të funksionojnë dhe atje ku kemi fituar ne, edhe atje ku s’kemi fituar ne, dhe që të zgjedhur tanë të justifikojnë. Këtë s’e kemi frazeologji demagogjike partiake elektorale. Por do të thosha, me gjithë hallet dhe shqetësimet dhe preokupimet e mëdha që ka pasur PS gjatë këtyre dy muajve pas 8 majit, kryetari i PS në takimin e parë që ka bërë, e ka bërë në të gjithë territorin e vendit për herë të parë në historinë 20-vjeçare të PS me të gjithë të zgjedhurit e PS në pushtetin vendor. Pra, me të gjithë këshilltarët. Ka takuar qindra dhe mijëra këshilltarë të PS-së në të gjithë territorin e vendit, në 12 qarqet e Shqipërisë, ku ka kërkuar përkushtimin e mandatit dhe të besimit që dha elektorati shqiptar edhe atje ku kemi fituar, dhe atje ku s’kemi fituar, për të korrigjuar në masën e duhur dhe lëvizjen tonë opozitare atje ku jemi në opozitë, por edhe përgjegjshmërinë tonë atje ku jemi në pozitë. Kështu që, askush të mos ketë iluzione dhe të mos mendojë dy gjëra të paktën, dorëzimin e mandatit dhe mosfunksionimin e mandateve të të mandatuarve të PS-së. E dyta, që opozita do të ulë kokën dhe ulë rezistencën. Përkundrazi, opozita nëse ka ngritur një herë zërin e saj, nëse ka bërë disa protesta qindramijëshe, atëherë do ta shumëfishojë edhe sasinë e këtyre protestave, edhe pjesëmarrjen në këto protesta, edhe pjesëmarrjen në të gjithë territorin e vendit, me qëllim që kjo që ka ndodhur në Shqipëri është jo vetëm tragjike, jo vetëm thjesht për një bashki apo komunë, po është për fatet e sotshme dhe më keq për të ardhmen institucionale të vendit tonë.

Synimi juaj strategjik është rrëzimi i qeverisë dhe zgjedhjet e parakohshme?

Çdo opozitë edhe në kushte normale do të kërkonte çdo orë e më parë zgjedhje të parakohshme. Por, këtu ka një kauzë të madhe që ne si socialistë, që nga zgjedhjet e 2009 kemi kërkuar zgjedhje në Shqipëri, që të bëhen zgjedhje. Këtu del në plan të dytë se kur do të bëhen zgjedhje. Plani i parë, kauza jonë ka qenë do të ketë apo s’do të ketë zgjedhje në Shqipëri, do të bëhen apo s’do të bëhen zgjedhje të lira dhe demokratike në Shqipëri. Për fatin tonë të keq ndodhi ajo që s’duhet të ndodhte, që përsëri Shqipëria pas dy vitesh, përsëriti në mënyrë më qesharake, më të keqe të mundshme, atë që ndodhi përpara dy vitesh. Problemi është do të bëhen apo s’do të bëhen zgjedhje? Ka pasur shumë pyetje nga ana juaj që opozita do të marrë pjesë në zgjedhje apo do të braktisë opozita më 8 maj zgjedhje etj,. Faktikisht nuk doli asnjë nga këto. Përkundrazi, unë ua rideklaroj atë që ju thashë më parë, ne jemi opozitë dhe jemi opozitë për të ardhur në pushtet, dhe s’kemi mekanizëm tjetër për të ardhur në pushtet veçse pjesëmarrjes në votime, veçse votimi. Çështja është do të ketë votim apo s’do të ketë, ky është problemi.

Pra, nuk do të kërkoni rrëzimin e qeverisë dhe zgjedhjeve të parakohshme, por do të kërkoni reforma?

Jo, jo. S’thashë këtë. Përkundrazi, gjatë gjithë bisedës apo debatit që zhvilluam bashkë, unë kam adresuar akuzën time direkte tek kjo mazhorancë, unë kam adresuar argumente konkrete tek një njeri që ka emrin Sali Berisha dhe unë kërkova hapa konkrete dhe përsëri kërkova nga ky njeri, i cili ka dhënë prova të mjaftueshme dhe të besueshme që nuk i korrigjon këto ashtu isç parashtrova më lartë. Ka vetëm një rrugë, largimi i tij nga pushteti. Kush janë mjetet? Sigurisht vetëm pushkë jo. Ka perënduar ai sistem që pushteti merrej me pushkë dhe mbahet me pushkë. Ai njeriu që e mban me pushkë është atje, tek ne megjithëse thanë pushkë e mitrolozë, çadra, stilolapsa etj., asnjë gjë s’u vërtetua atje. Atje ishte vetëm një element nga sistemi i kaluar, sipas të cilit pushteti merret me pushkë dhe mbahet me pushkë. Ai doli dhe nxori pushkën nga frëngjia e kullës së barit të tij për të mbajtur pushtetin.

Berisha ka ik me pushkë dhe ka ardhur me votë në fakt në 2005…

Me pushkë s’e ka hequr njeri njëherë në radhë të parë.

Në 1997…

Kjo është tezë e Berishës dhe i beson gënjeshtrës së tij ai. Qe Berisha që armatosi mercenarë të tij për të mbajtur pushtetin dhe populli i doli për zot vetes për t’u mbrojtur nga pushka e Berishës. Janë dy gjëra krejt të ndryshme. Nuk qe opozita ajo që rrethoi Saliun me pushkë. Absolutisht jo, opozita kërkoi, shteti ra, s’është përgjegjësi e opozitës se ranë institucionet e shtetit, është përgjegjësi e atij që ka pushtetin. Nuk erdhi opozita me pushkë, por erdhi me votë. Një ditë opozita do të ikë përsëri me votë. Dhe përsëri opozita iku me votë dhe nuk përdori as KQZ-në që e kishte të sajën sipas Saliut, as Kolegjin që e kishte të sajën sipas Saliut, përkundrazi, i la organet në lirinë e tyre kushtetuese, në lirinë e tyre të ligjit që ato t’i jepnin verdiktin e tyre.

Të fokusohemi, do të kërkoni rrëzimin e qeverisë dhe zgjedhje të parakohshme?

Absolutisht që ne do të kërkojmë vendosjen e situatës demokratike në Shqipëri, që është sistemi i të drejtës dhe sistemi i drejtës fillon nga vota, fillon nga njerëz të përkushtuar që duan të zbatojnë kërkesat e Kushtetutës dhe të ligjit. Sigurisht që kjo qeveri tregoi më shumë se një herë që jo vetëm që nuk zbaton ligjin dhe Kushtetutën, por përkundrazi e shkel atë. Pra, ka humbur kredon e saj jo vetëm morale, por edhe politike dhe institucionale.

Pra zgjedhjet do të jenë në 2013…

Zgjedhjeve u ka kaluar afati i zgjedhjeve. 2013 është afati kushtetues të cilën duket sikur është larg, por është shumë afër, 16-17 muaj janë, Por, për hallet që ka Shqipëria sigurisht që janë shumë larg. Kështu që, nëse vërtetë qoftë ky dhe Sali Berisha i dhimbset, dhe ka qoftë minimumin e etikës për të zgjidhur këtë krizë politike, këtë krizë ekonomike, krizë të institucioneve, këtë imazh të shtrembëruar të Shqipërisë në sytë e partnerëve tanë ndërkombëtarë, këtë mungesë në fund të listës për marrjen e statusit të vendit kandidat, le t’i bënte si shqiptarë një shërbim të fundit vendit dhe atdheut të vetë, të jepte dorëheqjen dhe të krijohesh një qeveri që të bënte zgjedhje të lira e demokratike me besueshmëri reciproke të të gjitha palëve politike.

Ua jap unë përgjigjen që sot që s’ka për të ndodhur….

Absolutisht, pse ju mendoni se unë e predikoj dhe e ëndërroj, apo e besoj këtë? Aq më pak jo.

Zoti Ruçi a keni filluar të bëni analizën e 8 majit dhe a mund të na thoni për ne, dhe për teleshikuesit, por edhe për mbështetësit tuaj, a gaboi dhe ku gaboi PS më 8 maj?

Lidhur me analizat, siç u thashë, ka pasur dy mbledhje të njëpasnjëshme të Asamblesë Kombëtare, ka pasur 15 takime të kryetarit të PS-së në të gjithë territorin e vendit me të gjithë të zgjedhur në parti dhe në pushtetin vendor. Vendimet e saj janë ato që tashmë janë bërë publike që gjatë muajve korrik dhe gusht të gjitha strukturat organizative të PS-së do të bëjnë analizat politike dhe organizative të treguesve elektoralë të zgjedhjeve të 8 majit duke evidentuar si anët pozitive, ashtu sikurse duke evidentuar dhe mangësitë për çdo Qendër Votimi që nga njësia më eskteme deri tek institucionet më të larta. Kjo analizë do të kulmojë me Kongresin e partisë dhe me rifreskimin e të gjithë të zgjedhurve partiak që nga organizata pranë Qendrës së Votimit, tek Asambletë e komunave dhe të bashkive, të rretheve, deri tek Asambleja Kombëtare dhe Kryesia e Partisë. Ky është një aksion i këtyre muajve që fillon dhe ka filluar, korriku e gushti me analizat elektorale, do të vazhdojë në shtator dhe në tetor me zgjedhjet në parti, në të gjitha nivelet, do të kulmojë në datën 5 nëntor me Kongresin e partisë, i cili do të jetë fundi i këtyre analizave dhe reformimi i të gjitha strukturave, si në planin organizativ, ashtu edhe në planin ideor, me një program të ri politik të partisë. Tashmë ka startuar puna e dy komisioneve të ngritura nga Asambleja Kombëtare, ashtu edhe më një reformë të plotë, të gjerë, të thellë, organizative në strukturat e partisë.

Kjo reformë e thellë përfshin ripërtëritjen e organeve dhe a do të ketë spastrime, apo largime të atyre drejtuesve apo anëtarëve të këtyre forumeve të cilët kanë dalë hapur kundër PS?

Nuk bëhet fjalë dhe nuk dua të lançoj asnjë emër të përveçëm, se s’jam unë ai që as djelli dhe as hija që mund t’i bëj asnjë emri të përveçëm nga PS. Përkundrazi, hapësirat demokratike tek PS-ja në këto 20 vite dhe siç e përmendët ju në kohët e fundit janë të hapura për këdo, që mendon edhe ndryshe. S’do të ketë asnjë spastrim, do të ketë vetëm veprim institucional, demokratik, të kujtdo që mendon siç mendoj unë apo siç mendon ai vetë, është e drejtë e secilit. Do të jenë të gjitha hapësirat për këdo që aspiron, për këdo që mendon se është për këtë vend institucional në parti në të gjitha nivelet e saja. Është në lirinë demokratike të PS-së që të kandidojë dhe brenda strukturave të PS-së të ketë vërtetë jo zgjedhje si ato që bën Sali Berisha, as në PD dhe as në Shqipëri, por zgjedhje transparente, që kushdo që aspiron për çfarëdolloj funksioni në parti, që nga niveli më i vogël deri tek niveli më i lartë në Kongres të partisë, në Asamblesë Kombëtare, nëse do të marrë votat e kuorumit. Kjo pasi, në demokraci është normale aspirimi i kujtdo për të bërë karrierë politike, ambicie është fare normale. Vetëm në sistemin e kaluar kush kishte ambicie quhesh karrierist dhe fshihesh nga të gjitha listat e kuadorëvikëve të kuadrit. Kurse në demokraci, kushdo që aspiron, kushdo mendon ka të drejtë të propozojë, të propozohet, të votohet. Në demokraci është normale që të konkurrosh dhe absolutisht që të fitosh, apo që edhe mund të humbësh.

A do ta bëni efiçent Kryesinë e partisë se ka dy vjet që në PS s’mblidhet për shkak një pjesë e madhe janë kundër Edi Ramës…

Nuk do ta pohoja këtë që ka 2 vjet, përkundrazi, para pak ditësh është mbledhur Kryesia e partisë që ka shqyrtuar dhe ka marrë vendimet përkatëse. Sigurisht që do të pajtohesha me ju që a ka qenë efiçente institucioni i Kryesisë së partisë për të gjithë problematikën që ka pasur. Pajtohem që nuk ka qenë në ato nivele që ne pretendojmë dhe që është ky organizëm. Kjo do të jetë një pjesë e së tërës për sa i përket zhvillimeve të punimeve të Kongresit të partisë. Sigurisht që edhe kjo Kryesi dhe kjo Asamble do të japin një llogaridhënie në Kongresin e partisë, dhe do t’i nënshtrohen nga e para, të gjithë pa përjashtim, edhe këta që janë dhe ata që pretendojnë të jenë, një votimi demokratik në Kongresin e partisë.

Çfarë e ka bërë inefiçente Kryesinë e PS dhe si mund të bëhet efiçente ajo?

Të mos të futemi të bëjmë analizën se këtë analizë….

Aq sa i intereson publikut, s’po themi për gjëra teknike….

Kryesia e PS-së duhet të jetë me anëtarë të saj ku të mbulojnë një territor të caktuar, një problematikë të caktuar. Ndoshta kjo ka qenë edhe defekti i saj që ju e quajtët me terminologjinë mosfunksionim dhe që unë e thashë, kjo Kryesi mund të ishte më në krye të halleve, problemeve, problematikave që ka pasur dhe ka Partia Socialiste. Ajo që unë mendoj është se çdo njeri që do të ketë nderin, të ketë fatin të jetë në krye të kësaj partie përmes pjesëmarrjes së drejtpërdrejtë në forumin e Kryesisë së partisë duhet të mbuloj një problem dhe një territor të caktuar. Mbi bazën e një problemi të caktuar, të një drejtimi të caktuar, të një territori të caktuar, sigurisht që bashkësia e të gjitha këtyre do ta bënte më efektive dhe më kolegjiale funksionimin normal të një kryesie partie, të një partie, që pretendon dhe që është alternativa e vetme për të ardhur në pushtet.

Anëtarë të Kryesisë të PS-së, jo vetëm që nuk janë parë më në ambientet e PS-së, jo vetëm që nuk kanë marrë pjesë në mbledhjet e Kryesisë së PS-së. Por me sa dimë, një pjesë e mirë e këtyre anëtarë kanë votuar për Lulzim Bashën në këto zgjedhje…

Nuk mund të pohoj të njëjtën gjë. Është e drejta juaj ta predikoni, nuk do ta dëshiroja.

Unë kam fakte…

Unë s’kam fakte të kësaj natyre. Sigurisht që është e drejtë e kujtdo, ata janë në lirinë e tyre si qytetarë, si votues, si partiak, të votojnë për kë të duan. Kjo është jashtë mundësive të mia. Unë do t’i dëshiroja shumë ata që të ishin pjesa aktive dhe më aktive e punës agjitative, organizative, bllokuese për manipulimin e rezultatit të Tiranës. Sigurisht që për pjesën e parë mund të flas. Nëse ne do të ishim edhe më aktiv, sigurisht që rezultati jonë do të ishte edhe më i thellë, edhe për Tiranën.

Pra keni pasur dhe ju gabimet tuaja për rezultatin e Tiranës…

Për të gjitha ato që thashë unë nuk justifikoj dhe atë që kemi marrë rezultatin më të thellë. Rezultatin më të thellë dhe atje ku e kemi marrë, sigurisht ne evidentojmë si bleta nektarin, ku kemi pasur mangësi. Edhe atje ka mundësi, jo më këtu….

Besoj se më të mëdha kanë qenë në Tiranë…

Sigurisht që rezultati i ngushtë i Tiranës, veç faktorëve të tjerë objektivë, forca jonë elektorale në Tiranë është e tillë që pavarësisht nga milionat e hedhura, pavarësisht nga mijëra votues të importuar, pavarësisht nga mijëra karta të falsifikuara, përsëri PS, siç rezultoi është fituese. Por nëse do të kishim bërë ne në Tiranën punën akoma më mirë seç e bëri elektorati i Tiranës, unë po ju them që Edi Rama s’do të ishte fitues me 10 vota, por me 10 mijë vota. Kështu që, në këtë kuadër ne bëjmë analizën duke parë me sy kritik edhe veprimtarinë tonë.

A ka një fajtor për këtë?

Absolutisht jo. Nëse e keni pyetjen për kryetarin e partisë, po ka një njeri që ka e përmbushur detyrën absolutisht mirë në këto zgjedhje ka qenë ai që përballoi fushatën elektorale në të gjithë territorin e vendit dhe që u përball me të gjithë këtë maskaradë elektorale, ku e gjithë makina shtetërore, me paratë e krimit, të korrupsionit, të manipulimit elektoral, iu kundërvu vetëm që të arrinte në një pikë, në një votë më shumë se sa Edi Rama. Nuk realizoi dot.

Po, por ndërkohë që ju kujdeseshit për pemën elektorale iu pre dega që kishit hipur vetë, dega e Tiranës…

Po të kishte ndodhur kjo elektoralisht dhe në mënyrë të drejtë dhe të pastër, sigurisht do të klithe një përgjigje tjetër. Por, kjo nuk ndodhi, siç i kishte bërë llogaritë gabim Berisha me të tijët dhe përsëri Edi Rama rezultoi fitues. Në këtë kuadër do të thosha se nëse do të pyesje, por jo këtu në studio, jashtë studios, në një moment relaksi Sali Berishën dhe Lulzim Bashën do të thoshin një përgjigje: Ore sa të tmerrshëm paskeni qenë, 40 mijë i prumë, 40 milionë i harxhuam, një makinë shtetërore e përdorëm, gjithë qeverinë vetëm kundër Edi Ramës, ai prapë se prapë 10 vota doli.

Po nëse Lul Basha do të merrte dhe 11 vota të tjera, çfarë do të ndodhte me Edi Ramën?

Kjo është normale në demokraci, nëse vërtetë ka demokraci. Unë e respektoj dhe Edi Rama gjënë e parë që do të bënte do të merrte në telefon Lul Bashën dhe do t’i thoshte në momentin e fundit që u numërua vota e fundit, ta gëzosh dhe të uroj të gjithë sukseset, je i mirëpritur të dorëzoj detyrën. Kjo është kultura politike e forcës politike që ai përfaqëson dhe atij si intelektual dhe politikan.

Do të qëndronte më kryetar i PS-së?

Ky është një problem tjetër, se ai është fitues i këtyre zgjedhjeve edhe pa Tiranën sikur ta ishte humbur.

Zoti Ruçi, ditët e fundit ka pasur një platformë nga ana e zotit Arben Malajt, deputet i kësaj partie dhe një nga njerëzit që ka dhënë kontribute në PS, një platformë për PS-në. Jeni njohur për këtë platformë dhe çfarë mendimi keni për këtë?

Sigurisht që kam dëgjuar përmes medias, nuk kam ndonjë veprim institucional as si kryetari i Asamblesë Kombëtare, as si kryetar i grupit. Sigurisht që zoti Malaj është pjesë e grupit të punës të miratuar nga Asambleja për një program të ri politik të PS-së, i cili do të jetë objekt i diskutimit, i ballafaqimit dhe miratimit deri në Kongresin e partisë më 5 nëntor. Ai është i ftuar në të drejtën e tij që këto mendime që ka dhe këtë kontribut që ka ta japë në këtë grup pune. Unë s’mund të flas sot për asnjë pikë që ai ka shtruar në atë çështje përderisa s’janë pjesë e veprimit politik dhe organizativ të tijin si përfaqësues të PS dhe institucionet e PS-së. Sigurisht në kohën dhe në momentin e duhur do të japë gjykimet dhe vlerësimet e mia.

Ndërkohë që ka pasur edhe zëra të tjerë brenda PS-së, siç ka qenë zoti Erjon Braçe që ka kritika nga një pozicion tjetër i zotit Malaj, apo nga kritikët e tjerë Kastriot Islami dhe Andis Harasani, të cilët kanë thyer dhe bojkotin e grupit të PS. Pra, ka zëra siç është Braçe që kërkon kthimin e menjëhershëm në parlament…

Sigurisht që unë nuk shikoj ndonjë diferencë midis asaj që ka miratuar dhe ka vendosur grupi parlamentar Socialist, Asambleja Kombëtare dhe që ka deklaruar publikisht.

Po, por ju e keni lënë për në shtator…

Të lutëm, nuk u caktua ndonjë datë. Absolutisht nuk u caktua ndonjë datë. Besoj fjala e kryetarit të partisë dhe ajo që miratoi Asambleja Kombëtare në të dyja mbledhjet e radhës, nuk shikoj asnjë diferencë midis asaj që ju lançuat nga nënkryetari i grupit zoti Braçe dhe asaj që deklaroi kryetari në fjalën e tij dhe që miratoi Asmbleja Kombëtare. Ajo që i përbashkon të dyja këto pretendime është pikërisht që rezistenca, kauza, pjesëmarrja e të mandatuarve të PS-së do të jetë prezente në të gjitha institucionet e shtetit demokrat, siç thashë më lart, që nga këshilli më i ulët deri tek parlamenti shqiptar. E dyta është që, duke e parë me sy kritik, është që grupi të PS-së duhet të përgatitet seriozisht dhe jo të rreket pas axhendave ose pseudoaxhendave parlamentare që bëhen në zyrën e Sali Berishës. Por, opozita si opozitë për të përmbushur misionin e saj të ketë një axhendë të vetëm që me nisma për debate, me nisma mocionesh, me nisma projektligjesh, me nisma reformash të caktuara, të jetë e gatshme t’i bëjë pjesë të axhendës parlamentare dhe të luftës së saj politike në parlamentin shqiptar.

Pra do të riktheheni këto ditë në parlament, në mbyllje të këtij sezoni…

Nuk mund të përcaktoj ditë. Besoj që në këto ditë nuk ka kuptim kthimi që t’i urojmë pushime të mbara mazhorancës se është lodhur nga punët e pista që ka bërë.

Por ka një diskutim të rëndësishëm për ju, si çështje që e keni mbrojtur, që është prishja e piramidës dhe ndërtimi i kompleksit të ri parlamentar…

Pse, çfarë duhet të bëjmë ne veç asaj që kemi thënë si për piramidën dhe për kompleksin parlamentar. Mendoni për një çast në këtë kulm të krizës ekonomike në Shqipëri mazhoranca aktuale është e shqetësuar se ajo që i mungon vendit, e fundit që i mungon Shqipërisë, është parlamenti. Kurse për këtë mazhoranca e para që i mungoka Shqipërisë dhe shqiptarëve është parlamenti. Edhe unë jam parlament, kam 20 vjet në atë sallë. Salla është. Kushtet janë normale, u bë dhe një investim i ri, siç e ka parë publiku shqiptar, me 1 milionë euro dhe kusur. Gjëja e fundit që i duhet këtij vendit, në kushtet aktuale që jemi është parlamenti. Kështu që, ne fjalën tonë e kemi thënë në komisionin e përbashkët, opsionin tonë e kemi ofruar, mundësi penguese nuk ka, le të vazhdojë ta çojë deri në fund marrinë e tyre edhe për këtë fushë, si fushat e tjera.

Pra deklaruat që s’do të merrni pjesë deri në fund të këtij sezoni parlament dhe aksionin tuaj politik, përfshirë edhe pjesëmarrjen tuaj në parlament do ta nisni në shtator…

Sigurisht që nuk thashë datë as për korrikun dhe as për shtatorin. Këto nuk jam për të bërë axhendën ditore të grupit parlament, por jam këtu të bëj axhendën politike të grupit parlamentar. Mendoj, që në kuadrin e zbatimin e këtij vendimi të Asamblesë Kombëtare, grupi i PS-së është duke punuar. Sigurisht që kemi zhvilluar një takim të parë pas mbledhjes së Asamblesë me të gjithë kryetarët e komisioneve, me të gjithë Kryesinë e grupit. Këtë javë do të fillojmë një mbledhje të dytë dhe do të shikojmë, sa dhe si, dhe kur, opozita shqiptare është e gatshme që në funksion të axhendës së saj politike dhe të aksionit të saj politik do të jetë e gatshme për të marrë pjesë në axhendën e parlamentit.

Mund të mos jeni i gatshëm as në shtator…

Jo, nuk mendoj se do të kemi kohë për të humbur.

Që do të thotë se do të merrni pjesë në shtator…

Nuk thashë datë. Shtatori është vonë, korriku është shpejt.

Ditët e fundit në parlament ka pasur pretendime dhe debate në media, në lidhje me një vendimmarrje të parlamentit kur dy vota janë numëruar. Nuk është hera e parë që ka pretendime të tilla. Si funksionon në këtë rast?

Ia dhatë përgjigjen vetë. Merre me mend sallën e parlamentit, votimi i fshehtë mungon, bëhet votim pa kuorum, vidhet vota e deputetëve dhe miratohen ligje në mënyrë antikushtetuese, dhe antiligjore. Ky është parlamenti i kësaj mazhorance, ky është realiteti. Nëse do të mësojmë të themi hë se s’ka gjë në prezencën tonë.

Ne po themi ku është përgjegjësia juaj, pse s’jeni bërë barrikadë, mos e lejoni këtë gjë…

Këtë ka dashur Berisha, që opozita të jetë kontorno e pjatës së tij pushtetare për të treguar se këtu institucionet funksionojnë, që parlamenti është funksional, po që ka disa gjëra dhe ja do të rregullohen në punë e sipër. Pikërisht këtë imazh të gabuar që do të krijojë Sali Berisha në raport me publikun shqiptar dhe atë ndërkombëtar, opozita shqiptare s’do ta krijojë këtë. Për ne s’është e papritur këtë që ju thatë, dy vota të manipuluara. S’e ka për herë të parë. Është recidiviste drejtuesja e parlamentit dhe është detyrim i saj që të mos ta lejojë dhe ta parandalojë këtë. Me sa duket, është bashkautorë e këtij manipulimi institucional në sallën e parlamentit me votat e parlamentarëve, është përgjegjësia e tyre politike dhe nesër elektorale.

Do të doja një mendim tuajin personal në lidhje me regjistrimin e popullsisë mbi bazë etnike dhe feje… Cili është qëndrimi i PS-së dhe i juaji?

Sigurisht që Shqipëria herë pas here krijon probleme edhe atëherë kur s’ka problem, apo hedh një problem për të tërhequr vëmendjen nga problemet esenciale që ka vendi. Edhe ky duket një problem i sajuar, tërësisht i sajuar, për të tërhequr vëmendjen nga problematika e madhe që kanë institucionet e vendit dhe për t’u marrë e gjitha media, politikanët apo politika, opinioni publik dhe më gjerë me këtë çështje. Regjistrim popullor nuk bën dhe s’është e vetme Shqipëria. Ne s’do të bëjmë një regjistrim allashqiptarëshe. Ne duhet të unifikojmë gjithçka me standardet e legjislacionit dhe të praktikave të mira të BE-së. Të merret çdo ligj dhe çdo standard i BE-së, të aplikohet në Shqipëri, është tërësisht e pakëndshme e gjithçka kjo që ka ndodhur për interesa politike dhe meskine të mazhorancës aktuale me një kondratiktë brenda saj kësaj si mazhorancë dhe brenda institucioneve të shtetit, ku nënkryetar i KLD-së ballafaqohet me ekzekutivin shqiptar që s’merret se ku fillon misioni i tij si nënkryetar i KLD-së dhe ku mbaron si përfaqësues i mbrojtjes apo i oponencës që i bën ligjit për regjistrimin e popullatës në Shqipëri. Kjo është shumë qesharake, është shumë paradokse. Për ne është inezkzistente si problem. Sigurisht që ne në kohën dhe në momentin e duhur që sigurisht do të jemi në pushtet, ne do të bëjmë të gjithë korigjesat tona për të bërë një reformë të plotë, jo një shpikje alla socialiste, por një standardizim të të gjithë legjislacionit të Shqipërisë me atë të BE-së.

Në këtë kuadër do të zgjidhet dhe kjo çështje…

Gjithçka.

Pra, ju s’do ta njihni këtë regjistrim mbi bazë etnie dhe feje?

Nëse është në kundërshtim me këto standarde absolutisht jo. Sigurisht që do korrigjohet, ne s’do të vemi me kostum shqiptar, do të vemi me kostum evropian në BE. Gjëja e parë që kërkohet kur themi fjalën e parë, uniformitet i gjithë legjislacionit në të gjitha fushat.

Mund të shkojmë me kostum alla franga, por me qeleshe…

Sigurisht që nuk shkon as me qeleshe, as me fustanellë. Kur ke pranuar të bëhesh pjesë e kësaj familje do të lësh pjesë të sovranitetit tënd për t’u bashkuar me ta.

Në dy momente keni qenë kritik me nënkryetarin e KLD-së. E keni vënë në dijeni kryetarin e KLD-së, Bamir Topi, në lidhje me këtë?

Nuk kam asgjë nominale me zotin Kreshnik. Gjithçka që kam e kam me KLD-në.

E keni me Presidentin e Republikës?

Absolutisht, as me Presidentin, përkundrazi. Unë flas për institucione. Nga vetë fjala Këshill i Lartë i Drejtësisë emëron, analizon, ndëshkon të gjithë përfaqësuesit e sistemit të drejtësisë së gjykatave të katandisur në këtë farë terexheje. Jam shumë skeptik për emërimet e bëra, për kundërvëniet që i bëhet, se më zutë Presidentin, nga mazhoranca lidhur me kandidatura ku janë hequr kandidatë me shumë sovranitet moral dhe profesional. Por, unë s’mund të pajtohem me qëndrimin e KLD-së në shumë emërime të bëra dhe mbi të gjitha në mungesën e ndëshkueshmërisë të kujtdo gjyqtari që në vend të japë drejtë, jep padrejtësi. Unë do të thosha se që në Departamentin e Shtetit të Amerikës, që nga Parlamenti Europian dhe çdo kancelari ndërkombëtare e shqetësuar për mbarëvajtjen e zgjedhjeve në Shqipëri, në mes të Tiranës dhe në sytë dhe në vëmendjen e të gjithë ndërkombëtarë ndodhi ajo që ndodhi, KLD duhet të japë përgjigje dhe nuk duhet të lajë duart që ne s’jemi këtu. Ata janë aty, ata të KLD-së dhe përfaqësues të një institucioni kushtetues të cilët duhet të japin një përgjigje joformale, por profesionale, kushtetuese dhe ligjore. Kanë të drejtë apo s’kanë të drejtë. Po kanë të drejtë t’i marrin dhe t’i dekorojnë, e t’i gradojnë këto anëtarë të Kolegjit. Po s’kanë të drejtë t’i marrin dhe t’i ndëshkojnë se nëse vuan ky vend vuan nga fenomeni i zbatimit të ligjit dhe nga mungesa e ndëshkueshmërisë të atyre që zbatojnë ligjin.

Meqë erdhëm në këto ujëra, si gjykoni ju sjelljen dhe të gjitha veprimet politike të Presidentit të Republikës në lidhje me përgatitjen, procesin dhe zhvillimet elektorale të 8 majit?

Për mua nuk ka ndonjë rol ligjor, kushtetues, Presidenti për përgatitjen. Sigurisht që ai është munduar të jetë në rolin e tij, të jetë brenda kuadrit të tij kushtetues, në momente dhe në kohën e duhur ka bërë apelimet përkatëse, ka bërë dhe tentativat përkatëse për këtë çështje. Por, nuk është fajtor aspak dhe s’do të bëja fajtor aspak institucionin e Presidentit, zotin Bamir Topi për të gjithë këtë që ka ndodhur. Nëse unë kam një vërejtje për KLD-në, këtë e mendoj për të gjithë institucionin e KLD-së në zbatim të ligjit. S’është detyra e Presidentit as të merret me listat, as me kartat e identitetit, as me paratë e korrupsionit, as me administrimin e zgjedhjeve. Përkundrazi, Presidenti ka lëshuar ato mesazhe që duhet të lëshojë një President i paanshëm, institucional, kushtetues, në momente që ai e ka parë të arsyeshme dhe unë s’kam pse të jem skeptik për këtë veprimtari. Por, në rastin konkret, me këto ngjarje që kanë ndodhur në Shqipëri, roli tij për të parandaluar shantazhet, presionet, korrupsionin, padrejtësinë e dhënë nga Kolegji Zgjedhor, jo si President, por si kryetar i KLD, mund të kishte qenë më efektiv.

Po roli i ndërkombëtarëve në këto zgjedhje?

Absolutisht unë jam shumë i surprizuar pozitivisht nga roli i gjithë faktorit ndërkombëtar. Unë e kam pasur këtë pretendim lidhur me rolin e faktorit ndërkombëtar, por ashtu edhe sikur kam qenë skeptik me vëmendjen e qytetarëve shqiptarëve, të cilët, nëse do të bëjnë 3 pyetje në ballafaqimet që bëj me ta, njëra nga pyetjet është çfarë thonë ndërkombëtarët. Jo se kam alergji për këtë pyetje, por sigurisht vihem në vështirësi jo si politikan, por si shqiptar. Pasi, s’ka francez, anglez, grek, italian, gjerman, ku e di unë çfarë që të pyesë kur vjen puna për fatet e vendit të tij se çfarë thonë ndërkombëtarët për Francën, Greqinë, Italinë apo kështu me radhë. Megjithatë unë në të gjitha takimet që kam pasur me përfaqësuesit ndërkombëtarë, si ata të akredituar në Tiranë dhe ata që vijnë në vizitat e tyre në Shqipëri kam thënë se në datën 8 maj nuk është në provë klasa politike shqiptare, por faktori ndërkombëtar. Është faktor ndërkombëtar edhe për këto arsye që unë shtrova më lartë. Jam i surprizuar në kuptimin e mirë të fjalës, që për herë të parë ndodh në Shqipëri që si ODHIR, OSBE, por veçanërisht zotërinj ambasadorë të akredituar, që nga ai i SHBA-ve përvesh mëngët dhe ka qëndruar me orë të tëra, me net të tëra zgjedhjet, duke pasur një rol jo të vogël. Kështu që, ky dështim në Tiranë është dhe një sfidë që i bëhet faktorit ndërkombëtar duke i thënë indirekt me këto padrejtësi të dhëna nga KQZ-ja, që ishte plotësisht si KQZ partiake dhe e njëanshme, nga Kolegji duke këtë padrejtësi, është dhe një sfidë që iu bën më së fundi edhe këtij surprizimi që unë thashë, kësaj pjesëmarrje, këtij kontributi të vyer që dhanë të gjithë partnerët tanë ndërkombëtarë, që me të vërtetë Shqipëria ta kalonte me sukses këtë provë sado e vështirë që të ishte ajo, se ishte vendimtare për hapat e mëtejshme të stabilitetit politik, ekonomik dhe social, dhe mbi të gjitha për hapat e mëtejshme të integrimit të Shqipërisë në Bashkimin Europian.

Cili është roli dhe përgjegjësia e Bashkisë së Tiranës në lidhje me pretendimet tuaja për listat e zgjedhjeve….

Në radhë të parë duhet ë dini një gjë, sipas ligjit dhe Kodit s’ka asnjë rol Bashkia e Tiranës për çështjen e listave. E dyta, edhe sikur të kishte rol, të gjitha këto manipulime të listave janë bërë pasi mbaron problematika e detyrimeve që ka bërë ligji të njësive bashkiake të Tiranës, jo të Bashkisë së Tiranës, se Bashkia e Tiranës nuk ka ndonjë rol për listat. Pra të gjitha këto janë bërë nga emrat e përveçëm që nga Teliti deri tek Ponia, nga një makinë elektorale profesionale për të manipuluar listat e zgjedhësve, Kështu që nuk mund të mbaj Bashkia e Tiranës përgjegjësinë përkatëse. Nëse minimumi mund të ketë ndonjë përgjegjësi, këtu mund të ketë minibashki të cilat i ngarkon ligji që kur X-i shkon për t’u regjistruar janë disa kërkesa që duhet të plotësojë deri tek verifikimi i banesës se ku është i strehuar ai që kërkon të bëhet rezident i njësisë tënde bashkiake. Kurse, nga informacionet që ne kemi, siç e kemi deklaruar dhe herë të tjera, janë mjaft votues të cilët kanë si qira banesë garazhde makinash, që në një banesë janë 18 familje më të njëjtën kontratë etj., etj,. Kështu që, nuk është përgjegjësi e Bashkisë, përkundrazi, të kërkosh përgjegjësinë tek bashkiak do të thotë që të fshehësh përgjegjësinë që kanë ata që kanë realizuar këtë maskaradë me listat e zgjedhësve.

Cilat janë vizionet e PS për dy vitet e ardhshme? Jemi në një situatë ku Lulzim Basha është kryetar i ri Bashkisë së Tiranës, zoti Rama pas tre mandatesh e lë këtë detyrë. PS ka shumë pretendime në lidhje me standardin e zgjedhjeve në tërësi, jo vetëm të këtyre zgjedhjeve. A i ka të gjitha resurset dhe si pretendon PS që në 2013 të rikthehet në pushtet?

Ju thashë pak më parë se jemi parti për të ardhur në pushtet dhe kemi të vetmin mekanizëm që është vota. Ju thoni pretendim, po të ishte thjesht pretendim i joni do të ishte gjysma e së keqës apo 5% e së keqës. Unë mendoj që tashmë s’ka demokrat në Shqipëri. Kur themi s’ka demokrat kam parasysh demokratët e vërtetë që kërkojnë vota të jetë votë, demokracia të jetë demokraci, që shteti i së drejtës të jetë shtet i së drejtës, që të pranojë këtë që ka ndodhur. Unë kam mjaft miq, siç ka të majtë, kam edhe të djathtë, nuk më mungojnë këto komunikime. Absolutisht janë në shumicë ata anëtarë të PD-së funksionarë të lartë të cilët me këto vendime të marra, përkundrazi jo vetëm që s’janë krenar, por janë shumë të dëshpëruar. Ata janë shumë të dëshpëruar, se si do që mund të ishte, vetëm kjo thonë s’duhet të kishte ndodhur, nuk duhet të ishte bërë. Prandaj lufta për Tiranën nuk ka qenë thjesht për një karrige të kryetarit të bashkisë. Lufta për Tiranën ka qenë me pikësynim më të largët, nga ajo që theksuat pak në pyetjen tuaj, me 2013. Pra, kundërshtari jonë politik nuk e ka parë këtë luftë si luftë të pjesshme për Tiranën me qëllim për ta marrë këtë si kryeqytet, por e ka parë më thellë se sa kaq. E ka parë më thellë se sa kaq për të krijuar një problem të madh tek PS-ja, për ta dobësuar, për ta defaktorizuar këtë si forcë politike duke shkatërruar nga pikëpamja morale dhe politike liderin e PS-së Edi Rama, gjë që s’e arriti dot.

Herët jemi…

Sigurisht që është herët. E di që janë bërë shumë plane, e di që sirtarët janë plot.

Hanxharët janë duke u mprehur…

Sigurisht që e di se këto që ishin në sirtarë duhen djegur, se s’i dolën. E di që po mprihen hanxharët, le t’i mprehin, por s’e realizuan dot atë që kishin menduar më 8 maj.

Çfarë kishin menduar më 8 maj?

Kishin menduar që PS-ja jo vetëm të humbiste, por mbi të gjitha të humbiste në të gjithë territorin, por mbi të gjitha të humbiste në Tiranë dhe pas kësaj humbje PS-ja të bëhesh një pështjellim politik të liderit të PS-së dhe strukturave, që jo në 2013-ën, por as në 2020 të mos ishte konkurrente për alternim në pushtet. Prandaj, hanxharët le të vazhdojnë. Përfundimisht nuk do të presin dot tek mishi i opozitës. Opozita është në misionin e saj, opozita do të shikojë mangësitë e saj ku i ka, do të bëjë analizat e saj, do të zgjedhë institucionet e saj dhe sigurisht do të jetë më vepruese se kurrë, qoftë në shtator, qoftë në aksionin e saj politik, qoftë në zgjedhje të parakohshme, qoftë edhe në zgjedhje të kobshme nëse do të bëhen në afatin kushtetues.

A duhet të hapet PS përveç prurjeve të reja? A duhen rikthyer të ikurit ose ato që nuk janë angazhuar vitet e fundit?

Unë jam këtu që dera e PS-së është e hapur pa diskutim për këdo që është pjesëtar i familjes politike, anëtarë, simpatizantë dhe votues të PS-së, ashtu sikurse dhe për këdo shqiptar që shpreson dhe beson tek alternativa e PS-së, tek lidershipi tek vendimet e marra prej tij.