Nga Mero Baze
Kryeministri Berisha i dha fund pritshmërisë për të zëvendësuar Ministrin e Brendshëm Lulëzim Basha, me një ministër të cilin ka kohë që e shëtit atje ku dëshiron të jetë vetë ministër. Bujar Nishani, ish Ministër i Drejtësisë, do të rikthehet në zyrën e Ministrit të Brendshëm, për të mos pasur realisht ministër. Për shkak të një problemi të njohur shëndetësor, ai është fizikisht i paaftë të punojë dhe të jetojë normalisht dhe jo më të drejtojë një super-ministri si ajo e Brendshmja.
Por shpjegimin më të mirë përse Nishani është kthyer në ministër shëtitës atje ku Berisha nuk dëshiron të ketë ministër, e ka dhënë vetë Berisha kur formoi këtë qeveri pas zgjedhjeve të vitit 2009. Të gjithë e kujtojmë se Berisha i shpjegoi gjatë gazetarit në emisionin “Opinion” se “zoti Nishani është i sëmurë, por unë po e çoj tek Ministria e Drejtësisë se ai e njeh mirë policinë e burgjeve…” Një shpjegim që nuk kishte nevojë për komente. Thjesht dua të mos ketë ministër Drejtësie.
Dy vjet më pas, kur Berisha u vu para presionit në rritje për të zëvendësuar Lulëzim Bashën në Ministrinë e Brendshme, Berisha duket se u kujtua sërish për ministrin e vet shëtitës dhe e ktheu aty mbi karrocën e invalidit, për të mos pasur ministër të Brendshëm.
Edhe pse është jo njerëzore të përmendësh sëmundjen e një qytetari publikisht, në rastin konkret je i detyruar pikësëpari se me sëmundjen e tij po luan një mjek që e kemi kryeministër. I pari që duhet të kishte etikën e duhur të mos ekspozonte sëmundjen e tij publikisht duhet të ishte mjeku Sali Berisha, dhe natyrisht më pas dhe kryeministri Sali Berisha. Por për të përdorur deri ën fund çdo skutë të pushtetit të tij personalisht, Berisha nuk ndalet as nga Urdhri i Mjekut dhe as nga etika e kryeministrit. Për të Bujar Nishani i sotëm plotëson të gjitha kushtet për të tamposur zyrën e Ministrit të Brendshëm me dyllë dhe për ta drejtuar atë vetë në rrugë informale.
Edhe pse në PD ka dhjetëra njerëz që mund ta kryejnë më së miri atë detyrë, edhe pse të gjithë janë të gatshëm të jenë aq të bindur dhe të përulur sa zoti Nishani, edhe pse të gjithë janë të gatshëm të përgjigjen “si urdhëron” në telefon, sërish Sali Berisha ka kërkuar dhe një cilësi më tepër. Të jenë dhe fizikisht të pamundur për ta bërë atë detyrë që të mos u shkojë mendja asnjë sekondë që janë ministra. Kjo është shumë poshtëruese për konceptin që ka kryeministri për figurinat që duhet të përdorë në këtë taktikë të lodhshme për t’i mbajtur një derë hapur në qeveri Lulëzim Bashës pas 8 Majit.
Shihet qartë se atij i ka lënë të hapur postin e Ministrit të Drejtësisë, një cinizëm i ri ky i pakufinj, po të kesh parasysh se pas 8 majit Lulëzim Basha si një politikan pa imunitet do të ketë punë me drejtësinë për vrasjen e 4 qytetarëve dhe ndoshta për ndonjë rihapje të mundshme të dosjes kriminale të abuzimit në rrugën Rrëshen- Kalimash. Ashtu si Bujar Nishani që shëtit atje ku nuk duhet të ketë ministër, Basha është një ministër shëtitës, atje ku nuk duhet të ketë shtet. Ai ishte Ministër i Transporteve kur duhej që të vidhte, ishte Ministër i Brendshëm kur duhej që të vriste dhe do të jetë Ministër Drejtësie kur do të duhet të mos jepet drejtësi për vjedhjet dhe vrasjet.
Ky parim kriminal që po aplikon Berisha me rokadat formale në qeveri, në të vërtetë tradhton koshiencën e tij për humbjen e Lulëzim Bashës dhe rreziqet që e presin atë pas humbjes. Në pamundësi për t’i dhënë atij imunitet dhe për një vit, ai po përpiqet t’i mbajë hapur derën e pallatit të drejtësisë, nga ku kapet sistemi i drejtësisë në këtë vend dhe largohet pa fund shansi për tu ndarë nga politika e pandëshkueshmërisë, për të cilën po na penalizon Evropa. I gjithë ky angazhim i Berishës për të keqpërdorur një qytetar të sëmurë të Shqipërisë, që paguhet si ministër, dhe për ta mbajtur vetë kontrollin mbi terrorin që po ushtrohet në vend, është një shenjë për tu dhënë zemër të gjithë atyre që mendojnë të dëshpëruar se ç’do të bëhet me Lulëzim Bashën pas 8 Majit. Sali Berisha është duke u thënë se do të bëhet gjithçka për ta shpëtuar, gjithçka për të mos e dënuar. Ka shans të bëhet dhe Ministër Drejtësie.
