Forca të shumta policie kanë blinduar pallatin ku jeton kryeministri
Sali Berisha, diku pranë Televizionit Publik Shqiptar. Gazeta Tema arriti të bëjë disa fotografi përkundër rrethimit të fortë policor. Rruga është bllokuar nga të dyja anët, edhe kur hyn nga Rruga e Elbasanit, edhe kur hyn nga rruga e TVSH.
Masat e rrepta të sigurisë po merren në prag të demonstratës së ditës së sotme. Pallati ku banon Berisha është ndërtuar nga një kompani e afërt me familjen e tij, por shqetësimi i qytetarëve është se tashme është bllokuar e gjithë rruga që të çon për tek pallati. Mësohet se dhe fëmijët e kryeministrit kanë lënë shtëpitë e tyre të tjera dhe janë vendosur në atë pallat ku kane tri apartamente.
Tensioni është i lartë në Tiranë, ndërkohë që familja e kryeministrit është e përfolur shumë për implikim në afera të ndryshme.
Virusi i Tunizisë ka përfshirë nga ana tjetër shumë vende, kryesisht të botës arabe. Tashmë çdo media e huaj kur flet për efektin e Tunizisë, përfshin edhe Shqipërinë në këtë mes. Sipas shumë medieve, ngjashmëritë mes regjimeve në këto vende janë të mëdha. Në Tunizi familja e presidentit u largua duke marrë shumë pasuri me vete. Por ndaj saj është lëshuar një urdhër- arresti. Interpoli po bën të pamundurën për arrestimin e tyre.
Nga ana tjetër, në Egjipt protestat po shtohen. Biri i presidentit është larguar nga vendi. Mediat britanike shkruajnë se ai ka mbërritur në Londër. Me vete ai ka pasur plot 100 valixhe.
