ResPublica.al, 29 prill 2013
Në fillim ishte shqiptarja.com që bënte me dije se kryeministri, në një takim në Elbasan me disa gra demokrate, kish përdorur termin “raca negro”. Por shqiptarja.com nuk e jepte të saktë as tekstin, as kontekstin, as nëntekstin. Më pas, lajmi u kap dhe nga agjenci të tjera informative online, dhe ngjarja u bë e qartë. Berisha po fliste për një anëtare me ngjyrë të Kongresit amerikan, e cila, sipas tij, në një moment të caktuar të garës presidenciale brendapartiake ka thënë se “Hillary do e ketë më të vështirë, më të pakapërcyeshme seksizmin sesa e pata unë racizmin”. Por e identifikoi këtë anëtare të Kongresit si një “përfaqësuese të racës negro”.
Është e qartë se termi nuk ka dalë nga goja e kryeministrit me ndonjë nëntekst të lig, por puna është se ky term e bart në vetvete këtë nëntekst. Në SHBA nuk përdoret prej dekadash, saktësisht qysh nga fundi i viteve ‘960. E prandaj, Endri Fuga ka të drejtë kur thotë me ironi, i cituar nga Rama, se “shyqyr që s’e dëgjon njeri në SHBA”.
Megjithatë, nuk ka vend për t’ia marrë për të madhe. Është thjesht një lapsus linguae. Berishës i duhen futur në lupë, jo lapsuse të tilla, por fraza të tjera të tmerrshme, që vijnë drejt e nga qendra e ndërgjegjes së vet.
M.N.
