Elton Koka, 4 Gusht 2013
Ish-i përndjekuri politik i kohës së diktaturës, Bedri Blloshmi, vëllai i Vilson Blloshmit, poetit të pushkatuar në vitin 1977, flet për zgjedhjen e Lulzim Bashës në krye të PD-së. Ja si e ka njohur ai katër vjet më parë pasardhësin e Sali Berishës, raportet e tij me ish të përndjekurit dhe ç’mendim ka për Ridvan Boden, Berishën, Topallin etj.
Zoti Blloshmi, si e pritët zgjedhjen e Lulzim Bashës në krye të Partisë Demokratike?
Duhet të bëjmë një sqarim këtu. Lulzim Basha nuk u zgjodh kryetar i PD-së, por nënkryetar i saj. Kryetar ka qenë dhe do të mbetet Sali Berisha. Kështu që nuk kam ç’të them për Bashën. Ai është një i komanduar në atë detyrë, por zgjedhja e tij tregon se Partia Demokratike është një parti enveristësh dhe e meritonte humbjen më 23 qershor.
Kjo duket si një akuzë shumë e rëndë që i bëni Partisë Demokratike. Kini fakte për këtë?
Shikoni, më 23 Qershor, për herë të parë që Partia Demokratike nuk mundi të grabisë vota, mori dhe përgjigjen e votuesve të cilët i siguruan një humbje katastrofike. Pse? Sepse ajo parti nuk ka asgjë demokratike. Tani për tani ata janë krejtësisht të çoroditur dhe nuk mund të bëjnë dot asnjë analizë për të nxjerrë pëgjegjësitë e kësaj fundosje të merituar. Sepse po të bëhet analiza do të dali se shkaktarët e vetëm të humbjes janë vetëm ata, që nga Saliu, Lulzimi, Jozefina Topalli, Ridvan Baçi e të tjerë.
Këtë Ridvan Baçin nuk e njohin shqiptarët. Kush është ky?
E njohin shqiptarët dhe e njohin shumë mirë. Ky është Ridvan Bode, por në Librazhd e njohin si Ridvan Baçi, pasi ai ka qenë dhe është fiksuar te librazhdasit si kryetar i shoqatës së Enverit.
Po Lulzim Bashën a e njihni?
E njoh aq sa të mos kem asnjë dëshirë për ta takuar kurrë. E kam njohur katër vjet më parë kur do të zgjidhej kryetari i PD-së së Librazhdit. Lulzim Basha erdhi bashkë me Ridvan Baçin. Personi që do caktohej kryetar partie i emëruar nga lart dhe më vonë z/v Prefekt, pra Aranit Leka, vinte nga një familje me lidhje të forta me sigurimin e shtetit, tradicionalisht familje hajdute, natyrisht dhe vrasëse. Në atë garë konkurronte dhe një kushëriri im. Lul Basha u vu në dijeni se Aranit Leka dhe familja e tij kishte probleme me familjen Blloshmi, se veç përgjimeve në vite, sigurimi për ta djegur si bashkëpunëtor sigurimi e nxori dëshmitar kundër kësaj familjeje. Babai i tij, Aqif Leka ka dalë dëshmitar xhaxhait të Vilson Blloshmit, poetit që u pushkatua nga diktatura në vitin 1977. Pasi i mori të gjitha informacionet se kush ishin dy kandidatët për kryetar të PD-së në Librazhd, Lul Basha i tha kushëririt tim: Ti kushëriri i Bedri Blloshmit tërhiqu nga gara për kryetar.
A janë të mjaftueshme këto që thoni për të vënë në dyshim zgjedhjen e tij në krye të PD-së, kur ai u zgjodh me 80 për qind të votave të demokratëve?
E kini gabim. Ai u zgjodh me 80 për qind të votave të atyre që morën pjesë në votim, pasi më shumë se 60 përqind e bojkotuan votimin, pasi morën vesh se do zgjidhej Lul Basha. Në PD vazhdojnë të zbatohen mësime e Enverit se komunistët asnjëherë nuk zëvendësohen, as dalin në pension. Pastaj demokratët ia dinë bëmat Bashës, si kur ishte ministër i Brendshëm dhe vrau katër veta në 21 janar; kur ishte ministër i Jashtëm ua shiti detin grekëve; kur ishte ministër i rrugëve thonë se ka vjedhur 240 milionë euro… Por ai ka edhe një raport jo të mirë me ish-të përndjekurit politikë…
Mund të na e tregoni këtë raport?
Patjetër. Para ndonjë viti u bë greva e të përndjekurve politikë. Bëhej në Tiranë. Por kryetari i Bashkisë as u interesua fare për ta. Pse u sakrifikuan Lirak Bejko dhe Gjergj Ndreca? Për bukën e gojës. Po Lul Basha, ashtu si Jozefina Topalli, kur e pyesnin për këtë grevë, përgjigjej: No koment! Dhe të burgosurit politikë i kanë mbështetur vazhdimisht këta demokratë hipokritë sa herë vinin zgjedhjet. Dhe të mendosh se ne ish-të përndjekurit nuk jemi 11.8 përqind sa thonë demokratët e Saliu, por mbi 33 përqind e votuesve. Pa përfshirë këtu ish-pronarët.
Po ata i ka qënë haka jonë. Tani ka filluar lufta brenda llojit të tyre. Unë do t’i thosha Lulzim Bashës: Ju as njëri- tjetrin nuk e doni, dua të them brënda llojit por dhe brenda llojit të llojit. Megjithatë do presim se çfarë reagimi do bëjnë ata që fituan zgjedhjet, a do ju çojnë para drejtësisë, ashtu siç kanë premtuar? Prokurori i Përgjithshëm do heshtë, apo do vëri në zbatim deklaratat që bëri kur hypi në atë karrike? Dëshiroj të mos ketë ndonjë marrëveshje të heshtur, të pa shkruar, se dhe Berisha, gjatë viteve 1997-2005 thërriste e bërtiste se do t’i fuste në burg të gjithë hajdutët e PS-së porsa të vinte në pushtet. Kjo jo që nuk ndodhi, por as që i zuri në gojë fare hajdutët socialistë me Fatosin në krye.
Kush është Bedri Blloshmi
Bedri Blloshi, nga Librazhdi, ish-i burgosur politik është një dëshmitar i krimeve të komunizmit me pasoja tragjike për familjen Blloshmi. Ai ka folur shumë herë për këtë gjë, më shumë për të mbajtur gjallë kujtimin e të vëllait të pushkatuar, Vilson Blloshmi, portreti i të cilit, përkrah të të pushkatuarve të tjerë poetë, Trifon Xhagjikan e Genc Leka, është përfshirë në një kënd të Pavijonit të Terrorit Komunist. Bedri Blloshmi ka botuar librin “Rrëfime nga ferri komunist” etj.
