NË ST. GALLEN U MBAJT TUBIMI PARAZGJEDHOR PËR KANDIDATIN ZEQIR SADRIJA
Në sallën e restorantit “ADLER”, pronar i të cilit është z. Bexhet Jakupi nga Bujanoci, u mbajt tubimi parazgjedhor i Partisë së Gjelbër të qytetit St. Gallen, ku për asamblenë komunale konkurron edhe z. Zeqir Sadrija. Salla ishte e madhe dhe e rregulluar enkas për tubime të fushatës zgjedhore ku përveç pallakateve me logon e partisë dhe me mbishkrimet si moto të partisë ishte edhe flamuri i Kantonit Sankt Gallen. Apel i të të gjithëve ishte që shqiptarët e qytetit St. Gallen me të drejt vote, më 23 shtator 2012, pa hezitim ta votojnë kandidatin shqiptar z. Zeqir Sadrija!
Teksti: Shefqet Dibrani & Fotot: Rexhep Rifati
Tubimin e shpalli të hapur Nora Asani, “Miss Kosova 2011” dhe përfaqësuese e Kosovës edhe në “Miss Universum”, me urimin më të mirë që mbarëvajtja e këtyre zgjedhjeve të shkoi në favorin e kandidatit shqiptar z. Zeqir Sadrija i cili është shqiptari i parë që po konkurron qoftë në nivelin komunal apo edhe atë kantonal, të cilit zonjusha Nora Asani i uroj fitore në këto zgjedhje. Vlenë të theksohet se gjuha elokuente e Nora Asanit, bashkë me elegancën e saj prej një bukurosheje mahnitëse bashkë me humoreskat e aty këtushme, bënë që ajo të jetë shembulli më i mirë i shqiptarkës së integruar jo vetëm në këtë qytet por edhe në nivel federal dhe më gjerë.
Nora Asani jo vetëm me bukurin e saj, por me përformancën e moderatores profesioniste, bëri që ky tubim të jetë i suksesshëm, dhe për një çast, për të harruar mungesën e interesimit, dhe pjesëmarrjen tejet të vogël të elektoratit shqiptar, ndonëse për Partinë e Gjelbër, tubimet modeste sikur janë tipar i konceptit partiak, gjë që zviceranët ishin të entuziazmuar, prandaj shprehën falënderime të shumta. Pavarësisht nga kjo që thamë, mbetet detyrë e Shtabit Zgjedhor, ku bënë pjesë edhe autori i këtij shkrimi, që të ulen dhe t’i analizojnë mirë shkaqet dhe arsyet e interesimit të paktë, nëse dëshirojnë që gabimet e tilla të mos u përsëritën edhe në fushata të tjera zgjedhore, e sidomos në afrimin e zgjedhësve të cilët krahasuar me numrin e madh të shqiptarëve në këtë qytet, tubimi dukej si më i zbehur.
As, këshilltari politik i Ministrit të Diasporës, z. Ahmet Asani, në fjalën e tij nuk e kaloi pa e theksuar këtë fenomen, megjithatë ai përshëndeti të gjitha ata që ishin angazhuar dhe kishin vepruar gjatë këtyre ditëve për të pasur një fushatë zgjedhore të suksesshme dhe me ndikim. Më pas ai falënderoi në ermin e tij, në emrin e Shtabit Zgjedhor dhe në emrin e ministrisë së Diasporës, Partinë e Gjelbër në qytetin St. Gallen, e cila ia ka mundësuar për t’u kandiduar bashkatdhetarit tonë Zeqir Sadrija, të cilit i uroi sukses duke apeluar tek të pranishmit që ta shtrijnë ndikimin e tyre tek familjet dhe të njohurit tjerë në favorin e Partisë së Gjelbër dhe të Zeqir Sadriut. Me këtë rast z. Ahmet Hasani, iu propozoi përfaqësueseve zviceran idenë e tij, nëse në këto zgjedhje fiton Zeqir Sadrija, që ky si deputet dhe sidomos Partia e Gjelbër, të bëjnë çfarë është e mundur për t’u vëllazëruar qyteti St. Gallen me një qytet në Kosovë, (dëshira ime tha z. Hasani është me Prishtinën, megjithatë kjo le të shihet më vonë).
Në tubim kishin ardhur edhe kryetarja e qytetit St. Gallen zonjusha Franziska Wenk, e cila në gjuhën shqipe i uroj shqiptarët “mirëmbrëma”, duke shpresuar për një mbrëmje të mirë, dhe apeloi për të dal në zgjedhje dhe në mënyrë sa më masive për ta votuar Zeqir Sadriun. Më pas zonjusha Wenk foli edhe për platformën politike të Partisë së Gjelbër dhe të vet komunës, përfaqësuese e së cilës ishte, duke i shpjeguar qëndrimet dhe raportet me të huajt me një theks të veçantë për komunitetin shqiptarë për të cilin shprehu fjalë miradije, por ajo i luti që sa më shumë të jenë aktiv dhe të angazhuar në shoqata kulturore, në klube sportive, në aktivitete muzikore, në mënyrë që sa më shumë t’i ndajnë të mirat dhe të bëhen pjesë e shoqërisë sonë e cila tradicionalisht ka qenë dhe është mikpritëse e popujve dhe kulturave me të cilat gjithmonë janë gërshetuar vlerat pozitive për shoqërinë dhe ambientin, të cilat i lidhte edhe me platformën politike të Partisë së Gjelbër, anëtare e së cilës ishte ajo.
Por kjo mbrëmje dhe veçmas ky tubim, shpresoj le të jetë si një motiv ku do t’i cyt të rinjtë dhe komunitetin tuaj për t’u angazhuar në politikë, tha me plot gaz zonjusha Franziska Wenk.Në këtë tubim ishte edhe konsulli i Republikës së Kosovës në Cyrih z. Sali Sefa i cili pasi përshëndeti të pranishmit dhe falënderoi Partinë e Gjelbër për mbështetjen e kandidatit shqiptar apeloi tek të gjithë të pranishmit që të ushtrojnë ndikimin e tyre tek të njohurit dhe familjarët në mënyrë që Zeqir Sadrija të fitoj në këto zgjedhje.
Më pas e mori fjalën edhe Catherine Buchmann, kryetare e Partisë së Gjelbër për qytetin St. Gallen e cila pas urimeve të shumta, dhe shpjegimit pse duhet të votohet Zeqir Sadrija, tha se platforma e partisë sonë ka qëllim t’i harmonizojë raportet në mes njerëzve dhe natyrës, raporte këto që nuk mund të ekzistojnë njëra pa tjetrën. Ndërsa Basil Oberholzer, kryetar i të rinjve të Partisë së Gjelbër në nivel kantoni, pasi i përshëndeti të pranishmit dhe falënderoi përzemërsisht për ftesën që ia bëri komuniteti shqiptar të jetë në mes të tyre, ai rrëfeu se ka një fqinjë shqiptar i cili e ka pyetur atë për formën e votimit duke i treguar se ka dëgjuar në Radio Televizioni e Kosovës (RTK), se Partia e Gjelbër e ka edhe një kandidat shqiptar për asamblenë komunale të qytetit.
Prandaj tha unë në emër të të rinjve falënderoj televizionin tuaj RTK, për këtë reklamë që i ka bërë Partisë së Gjelbër në St. Gallen, po ashtu ai tha se i falënderoj edhe gazetat dhe mediet tjera dhe të gjitha grupet e shqiptarëve që i kanë bërë fushat Partisë sonë, prandaj apeloj që ky rast të mos u shpëtoj shqiptarëve dhe pa asnjë dyshim duhet ta votojnë kandidatin e tyre z. Zeqir Sadrija. Më pas Basil Oberholzer tha se ne kemi një program të gjerë, neve na duhen njerëz e veprimtarë të mirë, prandaj apeloi që kësaj radhe ta votoni Zeqir Sadriun për të cilin kam shumë shpresa tha ai.
Poeti Isuf Sherifi, kësaj radhe i kishte lënë poezitë(?!), por kishte marrë për sipër që të angazhohej në fushatë për t’i ndihmuar Zeqir Sadriut për të cilin uroi që të fitoj, dhe më pas ai bëri edhe disa sqarime të shkurtra për formën e votimit, megjithëse jam i vetëdijshëm se fëmijët tuaj me të drejt vote këto gjëra i dinë mirë u shpreh plot humor! Veterani i njohur i kësaj ane Shefket Hasani i njohur edhe me nofkën Shefket Sangalla, i lexoi disa poezi-bejte, me të cilat shprehu falënderimet e tij për Zvicrën dhe për qytetin St. Gallen. Ndërsa pas tij.
Shoqëria Kulturore “SHARRI” interpretoi disa valle shqiptare të cilat u pritën mirë ashtu sikurse këngëtari i mirënjohur Afrim Aliu i cili interpretoi dy këngë të muzikës së lehtë për të cilat shprehen komplimente edhe përfaqësuesit e shtresave politike dhe shtetërore të qytetit. Në fjalën e tij përmbyllëse z. Seqir Sadrija falënderoi strukturat shtetërore të qytetit dhe ato të Partisë së Gjelbër të cilat ia kanë mundësuar kandidimin. Më pas ai falënderoi edhe të pranishmit për kontributin e madh duke apeluar që të dalim sa më shumë në votime, e pse jo edhe ta kurorëzojmë këtë sukses të përbashkët!
Vlen të theksohet se në fund të tubimit parazgjedhor, për mysafirët dhe aktivistët e fushatës u shtrua një darkë në të cilën në emër të Shtabit Zgjedhor, për pjesëmarrjen e tyre, veçmas zviceranët i falënderoi Ahmet Sejdiu, dhe më pas temat dhe diskutimet u bënë të shumta. Megjithatë, në këtë darkë pune u tha se duhet falënderuar angazhimi i këshilltarit të Ministrit për Diasporë z. Ahmet Hasani i cili bëri shumë, më shumë se kushdo tjetër, qoftë për këtë fushatë dhe në raste të tjera, i cili bashkë me Lazër Ukgjinin, Isuf Sherifin, Gjokë M. Gjoka, Shefket Hasani, Shaban Bajrami, Ahmet Sejdiu realizuan këtë fushatë zgjedhore, duke mos i harruar për t’i falënderuar edhe Jashar Hotin, Baftijar Rrustemin, Eduard Gjokë Gjokën, Viktor Rrustemin, Bexhet Jakupin, Anton Rrasajn, Fikrim Morinën etj.
Pastaj KF “BESA”, Shoqatën “PASHTRIKU”, kompaninë “RRUSTEMI”, me pronar Jashar Rrustemin, si dhe u shprehën falënderimet më të mira për RTK-në dhe për të përditshmet shqiptare në Zvicër, gazetat “Bota sot” e “Zëri i ditës”, si dhe për gazetarin Rexhep Rifati i cili gjendet kudo. Po ashtu u falënderuan edhe mjaftë portale interneti të cilat kanë publikuar informatat dhe materialet e shumta që kishin të bënin me këto zgjedhje, të cilat bënë që kjo fushatë të jetë mbase e suksesshme.
St. Gallen, 16 shtator 2012.
