TemA, 18 Shtator 2012
(E PERDITESUAR) – Ambasadori amerikan, Aleksandër Arvizu, ishte në qytetin e Elbasanit në kuadër të nismës së ambasadës amerikane “ACT NOW”, (Vepro tani). Nisma synon të nxisë qytetarët që të reagojnë.
Vetë ambasadori e ka nisur duke rreshtuar disa kritika ndaj klasës politike në vend.
Ai tha se politika e ka fajin që vendi ka mbetur i fundit në rajon.
“Shqipëria nuk po performon aq sa duhet, ka shumë debate për marrjen e statusit. Nuk ka arsye përse Shqipëria të mos renditet përkrah vendeve të tjera të rajonit”.
“Politika është përgjegjëse që Shqipëria ka mbetur e fundit në rajon. Politikanët merren më shumë me fushatë sesa me problemet e qytetarëve. Ky problem është edhe në Amerikë, por populli nuk e pranon këtë gjë. Atëherë që të ketë zgjidhje, do të jetë vota ajo që do të ndëshkojë”, ka theksuar Arvizu.
Ambasadori ka shprehur shqetësim edhe për gjendjen e arsimit e shëndetësisë në vendin tonë. Ai tha po ashtu se duhet reaguar edhe për gjendjen e mjedisit.
“Nisma ‘Vepro tani’ është ndër më të rëndësishmet që ka ndërmarrë ambasada amerikane”, ka deklaruar Arvizu.
