Shtefan Fyle
Komisioneri për zgjerimin e Bashkimit Evropian, Shtefan Fyle, duke folur në mbledhjen e sotme të PE-së, e cilësoi interpretimin ndryshe të votave si diçka të gabuar për demokracinë.
Fyle shprehu shqetësimin e tij për demokracinë dhe situatën në vend duke vlerësuar se reforma në kodin zgjedhor është shumë e nevojshme.
“Duhet një dialog midis palëve dhe një bashkëpunim mazhorancë-opozitë për të mirën e Shqipërisë. Procesi zgjedhor përfundoi qetësisht por interpretimet e ndryshme për votat janë një gabim.”, mësohet të ketë thënë Fyle.
Ndërkohë që sekretari i përgjithshëm i KiE-s, Thorbjorn Jagland, në një letër drejtuar kryeministrit Berisha më 10 qershor por e bërë publike vetëm sot, ka bërë të ditur se ai vetë do i drejtohet Komisionit të Venecias për të patur një ide më të qartë në lidhje me situatën në Shqipëri. Teksti i plotë i letrës mund të lexohet mëposhtë.
Thorbjorn Jagland
“Po ju shkruaj të shpreh shqetësimin tim në lidhje me situatën që pasoi zgjedhjet e fundit lokale në vendin tuaj, dhe veçanërisht përplasjet sa i përket zgjedhjeve për kryebashkiak në Tiranë. Shumë kanë shpresuar se këto zgjedhje do të vendosnin standarde të reja sa i përket mbajtjes së zgjedhjeve vetë, por edhe sjelljes dhe përgjegjësisë së forcave politike dhe funksionimit të institucioneve demokratike. Këto shpresa u forcuan për shkak të zhvillimit të qetë dhe të rregullt të votimit në ditën e ditën e zgjedhjeve. Për fat të keq, për shkak të përplasjes për zgjedhjet për kryebashkiak në Tiranë, Shqipëria po përballet tani me një situatë që do agravojë më tej ndarjet politike dhe mund të kërcënojë përpjekjet për të siguruar funksionimin e duhur të institucioneve demokratike, qeverisjes së mirë dhe progresit ekonomik të mëtejshëm. Si mik i Shqipërisë, jam i shqetësuar.
Dua t’apeloj me termat sa më të fortë të mundshëm ju, zoti kryeministër, dhe liderëve të tjerë të forcave politike në vendin tuaj të hyni menjëherë në një dialog të vërtetë se si të kaloni këtë ngërç politik, duke respektuar zbatimin e ligjit dhe principet demokratike, që priten nga çdo anëtar i Këshillit të Europës. Dua t’ju informoj ju se, përkundër sfondit të vendimit të Kolegjit Zgjedhor, kam si synim që të pyes Komisionin e Venecias për një opinion se si të shmangen situata të ngjashme në zgjedhjet e ardhshme”.
