Nga Mero Baze
U bënë tri ditë që kryeministri po ripërsërit akuzat ndaj kryeprokurores pasi sipas tij ajo ka shkelur një marrëveshje me ndërmjetës ambasadorin e SHBA në Tiranë lidhur me mënyrën se si Berisha duhet të dorzonte gjashtë gardistët që dyshohen si vrasës të tre qytetarëve shqiptarë. Akuzat po ripërsëriten përtej kufirit të pranueshëm të një marrëveshje sekrete antiligjore.
Berisha dhe fjalëfolësit e deklaratave të tij, po shpallin si të drejtë hyjnore të tyre faktin që kryeprokurorja nuk u ka respektuar një pazar, për të cilin ne ende nuk dimë gjë fare se cili është. Ana e frikshme e gjithë kësaj historie është se kryeministri nuk po flet më për ligj, por për pazare të fshehta me ndërmjetës një diplomat amerikan. Nuk kemi asnjë të drejtë të paragjykojmë derisa nuk dimë ç’është kjo marrëveshje, por shihet qartë se Berisha është më shumë i interesuar ët përfshijë në pisllëqet e tij dhe një diplomat amerikan se sa të sulmojë kryeprokuroren.
Duke hequr dorë nga referenca tek ligji dhe duke folur për pazare për dorëzim të vrasësve të dyshuar, Berisha është duke na treguar qartë se në çfarë territori po bën politikë. Duke i kërkuar si nder kryeprokurores së vendit përmes diplomatit amerikan të shkelë ligjin dhe të respektojë marrëveshjen me të, ai ka konsumuar një vepër të mirëfilltë penale që zë fill me rezistencën e tij për të mos dorëzuar vrasësit e dyshuar qysh ditën e parë në prokurori.
E parë nga një këndvështrim më i gjerë, sulmi i tij me referencë “prerjen në besë” është dhe më absurd. Derisa kjo ka qenë një marrëveshje sekrete dhe Berisha po i referohet si “Kushtetutë”, ai duhet të bëjë të ditur së paku detajet e marrëveshjes dhe atë duhet ta konfirmojë dhe “garanti” i saj, në këtë rast ambasadori i SHBA. Fakti që diplomatët perëndimorë duan të çaktivizojnë me takt lojërat- bomba që Berisha mban në duar për të frikësuar kundërshtarët, siç është dhe rasti i mosdorëzimit të gjashtë gardistëve të dyshuar për vrasje, nuk do të thotë doemos se ata janë të përfshirë në skemën e ofruar nga Berisha për mos respektimin e ligjit.
Duke parë se ai i shpalli luftë shtetit shqiptar dhe institucioneve të tij, ata natyrisht preferojnë një zgjidhje më të butë për ta qetësuar dhe për ta ballafaquar me drejtësinë. Por në këtë rast absurdi ka arritur kulmin pasi asnjë aktor i Marrëveshjes nuk po flet cila është Marrëveshja, por vetëm një prej tyre po ulëret se ajo u shkel dhe ai nuk do ta respektojë më. Ky është një komunikim tërësisht mafioz dhe primitiv, që nuk ka lidhje fare me shtetin ligjor dhe detyrimet kushtetuese të kryeministrit.
Këtë e bën i njëjti kryeministër, i cili për një vit e gjysëm refuzoi të gjitha marrëveshjet politike me opozitën me një arsyetim të shpikur se shkelnin ligjin. Ai nuk pranoi të hapte kutitë e votimit dhe të hetonte materialet zgjedhore me pretendimin se ato shkelnin ligjet ekzistuese. Nuk pranoi as marrëveshje politike për këtë pikë. Dhe pikërisht ky njeri që e çoi vendin në prag të luftës civile në emër të mos shkeljes së ligjeve që nuk ekzistonin, tani po çon vendin në luftë në emër të marrëveshjeve që duhet të shkelin ligjin.
Kryeprokurorja e Përgjithshme Ina Rama nuk ka folur për këtë Marrëveshje. Nuk ka folur as ambasadori amerikan. I vetmi që ka folur jo për Marrëveshjen, por për mos respektimin e saj është Sali Berisha. Ai nuk ka pranuar të dorëzojë gjashtë të dyshuarit për vrasje, por dhe kur i ka çuar para prokurorëve, i ka çuar të armatosur sikur të ishin duke shkuar në luftë.
Përfundimi i gjithë kësaj është sabotimi i hetimit dhe të fituarit kohë për prishjen e provave, duke fshehur armët e krimit dhe gjurmët e tyre. Për gjithë komunitetin ndërkombëtar që po mban sytë nga Shqipëria debati publik i dy ditëve të fundit ngjall frikë dhe dëshpërim. Të gjithë po dëgjojnë që kryeministri është tërbuar, jo se ka vrarë tre qytetarë, por se prokuroria e ka prerë në besë dhe kërkon të zbatojë ligjin dhe jo pazarin që ai ka bërë me të.
Për këtë shkak ai e ka etiketuar kryeprokuroren si “puçiste”, “lavire bulevardi”, “ndrikull”, “gënjeshtare” dhe po mendon se si ta shkarkojë atë, që tenton të zbatojë ligjin dhe jo pazarin që i ka dhënë ai. Kaq mjafton për të kuptuar se kryeministri ka zëvendësuar gjuhën ligjore të komunikimit mes institucioneve me Kodin e Mafies, i cili parasheh pazarin mbi ligjin dhe heshtjen për krimet. Sali Berisha ndjehet i prerë në besë se ja kanë prishë këtë pazar dhe po i hakërrehet gjithkujt që i përmend ligjin. Si çdo mafioz.
