Nga Korresp. 24-ore.com
Kryetari i opozitës Edi Rama gjatë emisionit Top Story
Kryetari i PS, Edi Rama ka deklaruar se aktualisht Shqipëria ndodhet në buzë të humnerës, duke qenë se sistemet kyce të saj nuk funksionojnë për faj, sipas tij, të qeverisë.
Duke folur në emisionin “Top Story” në Top Channel, Rama është shprehur se pas djegies së fletëve të votimit, opozita është e vetmja alternativë për zgjidhjen e kësaj situate të degraduar.
“Kam shprehur një shqetësim që kam ndarë hapur me gjithë opinionin publik sepse besoj se Shqipëria sot po përjeton një moment shumë dramatik. Të gjitha institucionet kanë rënë, duke filluar nga zgjedhjet dhe duke mbaruar tek drejtësia dhe opozita ka mbetur e fundit gjë që ekziston mes një regjimi kusarësh dhe popullit”, ka pohuar Rama.
Sipas tij, protesta e opozitës është rruga e vetme për të zgjidhur këtë situatë, duke qenë se të gjitha opsionet politike janë konsumuar nga “matrapazllëku” i qeverisë.
“Jemi në kufijtë fundorë të politikës për të zgjidhur problemet, pasi gjithcka është asgjesuar nga kapja e pushtetit për interesa private nga qeveria e matrapazllëkut. Opozita mbetet mburoja e fundit dhe është alternativa e qeverisë dhe instrumenti i opinionint publik për të kontrolluar qeverinë në Parlament dhe në jetën e përditshme publike. Dhe nëse këtë herë opozita s’bën atë që duhet le të pranojmë që s’kemi më as opozitë”, ka deklaruar Rama.
Rama ka përjashtuar në mënyrë kategorike opsionin e përdorimit të dhunës nga ana e PS, por nuk e ka përjashtuar një reagim të mundshëm të ashpër nga ana e qytetarëve, të cilët sipas tij janë më të indinjuar se kurrë.
“Duke mos e pasur dhunën pjesë se si ne e shohim botën, përballë kemi pushtetin që nuk do t’ia dijë për asgjë dhe që nuk i jep arsye për ta zgjidhur situatën me mjet politik, rrezikojmë të kalohemi nga populli. Të defaktorizohemi si barriera e fundit që ka populli për t’u mbrojtur nga kapja e pushtetit”, ka nënvizuar Rama.
“Dhuna është pa asnjë lidhje me atë që ne përfaqësojmë. Dhuna është tërësisht e përjashtuar. Cështja është a do ta japë apo jo dorëheqjen Saliu, a do qëndrojë në këmbë koalicioni i turpit dhe a do të ketë zgjidhje një krizë politike, që mund të zgjidhet me mjete politike”, ka theksuar ai.
Kryetari i PS, Edi Rama ka deklaruar se ka qenë në dijeni të nismës së ish-ministrit të METE Dritan Prifti për të denoncuar Ilir Metën, ndonëse jo me detaje përse bëhej fjalë.
Duke folur në emisionin “Top Story” në Top Channel, Rama ka bërë të ditur se ka qenë vetë Prifti që ia ka komunikuar atij nismën gjatë një takimi kokë më kokë.
“Prifti ka kërkuar para pak kohësh një takim me mua dhe kreun e grupit parlamentar socialist ku na ka informuar për, sipas tij, arsyet përse nuk e shihte më veten në kampin e qeverisë dhe njëkohësisht për vullnetin që të nisë një betejë për të bërë transparente atë cka ai na tha se dispononte, pa na dhënë detaje”, ka deklaruar Rama.
Sipas tij, ish-ministri Prifti, pavarësisht se ishte i vendosur për të bërë betejën e tij, druhej për sigurinë e tij dhe të familjes.
“Ai na e tha këtë duke na vënë në dukje vendosmërinë në një betejë që e konsideronte shumë të rrezikshme për familjen dhe sigurinë e jetës së tij”, është shprehur Rama.
Ai ka shtuar më tej se nga ana e tij e ka inkurajuar Priftin të ecte përpara me mjetet e tij, duke i ofruar mbështetjen e Partisë Socialiste.
“Ne e kemi dëgjuar dhe e kemi inkurajuar duke i shprehur mbështetje për një betejë të tillë, në rast se ato që na thoshte ishin të vërteta”, ka pohuar Rama.
Sipas tij, sulmet e mëparshme politike të bëra nga ai ndaj Priftit dhe anasjelltas nuk kanë më rëndësi. “Sulmet politike të mëparshme për mua s’kanë asnjë lloj rëndësie dhe jemi para një fakti të një procesi të iniciuar nga Dritan Prifti, i cili meriton përgëzim”, ka shtuar Rama.
Kryetari i PS, Edi Rama duke komentuar kthimin e opozitës në protestë pas një periudhe relativisht të gjatë, ka deklaruar se synimi i saj është mbrojtja e të drejtave që sipas tij shkelen nga qeveria. “Fakti që ne bëjmë të njëjtën gjë pas dy vjetësh do të thotë se ne këmbëngulim për të drejtën tonë, duke parë që të drejtat e tjera kanë humbur. Ne nuk jemi një lëvizje e armatosur, ne këmbëngulim për ato liri dhe të drejta në të cilat besojmë”, ka pohuar Rama.
Sipas tij, nuk është protesta e opozitës ajo që mund të provokojë shqiptarët, por sjellja e qeverisë që tallet në mënyrë të turpshme me ta edhe pas publikimit të videos që vërteton matrapazllëqet.
“Popullin e provokon Saliu dhe qeveria. Ai provokon të atilla kushte kur populli mund të reagojë dhe të dalë jashtë kontrollit dhe jo opozita. Po mohohet sy për sy një fakt konkret që e pa gjithë populli. Nëse videoja është montazh dhe nëse i ashtuquajturi kryeministër dhe zëvendësi i tij mendojnë se është montazh nuk do të kishte dorëheqje, por do reagohej me mënyrën më të ashpër kundër tij. Por e dha dorëheqjen sepse e di fare mirë që është e vërtetë”, është shprehur Rama.
Ai ka rikonfirmuar edhe njëherë se demonstrata e nesërme nuk ka qëllime politike, por vetëm qytetare.
Në vijim të fjalës së tij në Top Story, kreu i socialistëve, Edi Rama, ritheksoi edhe njëherë se demonstrata e ditës së nesërme nuk bëhet për marrjen e pushtetit, por për t’i rikthyer këtij vendi lirinë e të drejtat themelore.
“Ne kemi krijuar mundësinë për të gjithë. Nuk është demonstrata për të marrë pushtetin, kjo është demonstratë për t’i rikthyer këtij vendi lirinë e të drejtat themelore, zgjedhje të reja dhe zgjidhje të re politike. Ky popull nuk pranon dot qeverisjen nga kusarë e matrapazë që kapen gafil. Ky është kulmi që me këtë lloj makinacioni tregon se ka një projekt të papërputhshëm me atë të integrimit europian, atë të kthimit të këtij vendi në një mbretëri ku Sali Berisha të jetë mbret. Shqipëria sot është mbytur nga plehrat dhe ka vetëm një landfild të standarteve normale në Korcë e një në Tiranë”, tha Rama.
Më tej Rama u shpreh i vendosur për largimin e qeverisë. Ai tha se Sali Berisha do të pranojë zgjidhjen e re politike.
“Do largojmë Saliun, do ta largojë populli Saliun ose Saliu do të pranojë zgjidhjen e re, atë politike. Nuk mund të kapërcehen më gjithë këto bëma, zullume, poshtërsi, pabesi ndaj një popull të tërë, këto nuk kanë të bëjnë më me opozitën”, shtoi Rama.
Vendi, sipas Ramës, është kapur nën kthetrat e krizës ekonomike, kriminalitetit e papunësisë. Rama refuzoi të përdorë termin “rrëzim të qeverisë”, pasi siç theksoi ai në këtë sistem që kemi zgjedhur, qeveria nuk rrëzohet, por largohet e i bëri thirrje kreut të mazhorancës e kryeministrit Berisha që të vërë në dispozicion vullnetin e tij për një zgjidhje të re që do të pasohet me një qeveri të re.
“Qeveria në një sistem si ky që kemi zgjedhur, nuk rrëzohet, largohet e detyruar nga pamundësia për të manaxhuar gjithcka. Kjo qeveri është një bandë kusarësh e matrapazësh që nuk kanë lidhje me qeverisjen. Saliu të vërë në dispozicion vullnetin për një zgjidhje të re e me ardhjen e një qeverie sido ta quajë ai. Rruga e forcës se ku të con, Saliu e ka provuar, por mesa duket nuk paska mësuar asgjë. E pa vetë se sa e hidhur është të shkosh në kundërshtim me vullnetin e popullit tënd. Jemi këtu për të cuar përpara vendin përmes një qeverie që qeveris me sensin e drejtësisë. Zgjedhjet e reja duhen përcaktuar si pika që përcakton të gjitha palët, të gjitha vullnetet”, deklaroi Rama.
Rama tha se me demonstratën popullore të ditës së nesërme, nuk përjashtohet pala tjetër nga gjetja e një zgjidhje dhe ftoi, që sipas tij, pala tjetër të futë politikën në proces, për arritjen e një zgjidhjeje.
Kryesocialisti Rama, vlerësoi se demonstrata e ditës së nesërme do të jetë paqësore dhe se i vetmi rrezik vjen nga keqpërdorimi i policisë prej disa individëve. Rama vlerësoi se nuk ka nevojë për masa të jashtëzakonshme sigurie nëse nuk ka infiltrime e provokime nga ana e qeverisë.
