TemA Online, 17 Shtator 2012
Nuk është më sekret, që mediat qeveritare marrin qindra mijëra, deri në milionë dollarë nga reklamat shtetërore. Dhe, për këtë arsye, Partia Socialiste ka vendosur që gjatë kësaj jave, të denoncojë se si kryeministri Berisha ka harxhuar milionë dollarë për reklama, duke ua dhënë mediave që i bëjnë fresk.
Sipas deputetit socialist, Erion Braçe, vëllai i Aleksandër Frangajt, Eduard Frangaj, kë përfituar vetëm nga Ministria e Brendshme, e drejtuar në kohë nga Lulzim Basha dhe Bujar Nishani, plot 4.6 milionë dollarë.
Eduard Frangaj i ka marrë këto para në kuadër të kompanisë së reklamave që zotëron, “Promo SHPK”.
Kohë më parë, gazeta TemA publikoi një skandal pikërisht me vëllain e Aleksandër Frangajt, në lidhje me një reklamë të Ministrisë së Punës.
Sipas deputetit socialist, çdo ministri ka harxhuar miliona dollarë nga paratë e qytetarëve, pikërisht për reklama qeveritare, të cilat kanë përfunduar në xhepat e pronarëve të mediave pro qeveritare.
Deputeti tjetër socialist, Eduard Shalsi, gjatë një konference shtypi, u shpreh se, “në këtë situatë të rëndë ekonomike, ku çdo qeveri e përgjegjshme do të kontrollonte dhe ulte shpenzimet e kota, Qeveria e Sali Berishës jo vetëm nuk do të marrë asnjë masë por përkundrazi do të rrisë shpenzimet për të reklamuar vetveten. Sot ne do të fillojmë të bëjmë publike shpenzimet për reklama të disa Ministrive për t’i dhënë mundësi shqiptarëve të shohin se si shpenzohen dhe ku shkojnë paratë publike dhe të kuptojnë më mirë se si shpërdorohen paratë e tyre.
Do ta fillojmë me Ministrinë e Brendshme në vite, e cila në vitin 2006 shpenzoi 7500 dollarë, në vitin 2007 shpenzoi 100 000 dollarë, në vitin 2008, 219 000 dollarë, në vitin 2009, 765 000 dollarë, viti 2010, 1 930 000 dollarë, në vitin 2011, 1 000 000 dollarë, ndërsa në 2012 vetëm për 5 mujorin e parë 714 000 $“, tha Shalsi.
Shalsi, krahas shifrave të siguruara nga dokumentet zyrtare tregoi edhe kompaninë, e cila ka përfituar këto para.
“Siç e shihni shifrat flasin qartë për nivelin e shpenzimeve reklamuese të Ministrisë së Brendshme, ku bie në sy fakti se është një kompani që menaxhon pjesën më të madhe: quhet Promo sh.p.k siç edhe e dëshmojne këto letra. Pra dhjetëra, qindra, miliona euro për reklama nga njëra anë dhe nga ana tjetër janë të njohura kushtet e vështira të punës dhe pagat e ulta të punonjësve të policisë, është fakt i njohur mospagesa e orëve të punës shtesë të policëve, mungesa e karburantit për makinat e policisë dhe gjithkush sjell në kujtesë pamjet e policëve që shtyjne makinat se s’kanë naftë, dhe për të vazhduar me mungesën e pranuar tashmë të logjistikës adekuate. Kjo është fytyra e vërtetë e qeverisë së Sali Berishës të cilën shqiptarët e dinë por që ne do t’ja u bëjmë edhe më të kuptueshme dhe më të qartë përditë“, tha Shalsi.
