Ç’fshihet në kutitë?

Eduard Zaloshnja, 22.11.2009

Sipas raportit të OSBE/ODHIR-it rreth zgjedhjeve të 28 Qershorit, dhe sipas qeverisë shqiptare, numërimi i votave u krye keq ose shumë keq në 1/3 e qendrave të numërimit, por nuk ka prova që kjo gjë ndikoi në shpërndarjen përfundimtare të mandateve kuvendore. Ndërsa, sipas Partisë Socialiste, ky numërim i keq ose shumë i keq i votave, me shumë gjasa, ka ndikuar në rezultatin përfundimtar në të paktën tre qarqe – Berat, Tiranë, Shkodër.

Se cila palë në këtë debat ka të drejtë, kuptohet që mund të mësohet vetëm në qoftë se hapen kutitë e votimit të këtyre qarqeve. Për tuajin sinqerisht, i cili ka jetuar gjatë në një vend ku edhe një individ çfarëdo apo një gazetë lokale ka të drejtë të shohë ç’fshihet në kutitë e votimit, pavarësisht se ç’mund të ketë vendosur Gjykata e Lartë për to, është më se normale që kutitë të hapen. Por, sidoqoftë, nuk është synim i këtyre rreshtave që të argumentojnë në se duhet të hapen apo jo kutitë. Synimi i këtyre rreshtave është që të ofrojë një hamendje sa më të edukuar se ç’do të rezultonte nga një hapje e mundshme e kutive.

Hapja e kutive të qarkut të Beratit do të tregonte pothuaj me siguri që PS-së i takonte një mandat më shumë se ç’iu dha nga Komisioni Qendror i Zgjedhjeve. Sipas rezultatit përfundimtar të këtij komisioni, PS-së i duheshin vetëm 532 vota për të siguruar edhe një mandat tjetër në qarkun e Beratit. Ndërkohë, vetëm në qendrën e numërimit të Urës Vajgurore dolën mbi 1350 vota të pavlefshme, ose gjysma e gjithë votave të pavlefshme të qarkut. Kjo gjë tregon se diçka nuk është bërë siç duhet gjatë numërimit në atë qendër. Gjithashtu, është zhdukur disketa e filmimit të numërimit në qendrën e Uznovës, qendra e parë në Shqipëri ku numërimi u kontestua nga PS-ja. Të dyja këto episode janë një tregues i fuqishëm se hapja e kutive të Beratit, me shumë gjasa, e përmbys shpërndarjen zyrtare të mandateve në atë qark.

Në qarkun e Tiranës situata është disi më e komplikuar. PS-së i duheshin 4355 vota për të siguruar edhe një mandat tjetër në këtë qark. Qendrat e numërimit ku PS-ja pati më shumë kontestime ishin ato të Kamzës dhe Paskuqanit. Në Kamëz ishin tetë kuti votimi që ishin mbushur në shtëpi private dhe jo në ambiente publike, siç e kërkonte Kodi Elektoral. Dhe ato kuti rezultuan me avantazhe gjigante në favor të PD-së, krahasimisht me kutitë që vinin nga qendra votimi në ambiente publike. Ndërsa, në Paskuqan, rezultuan kuti me më shumë vota se sa figuronin në listat e njerëzve që kishin votuar. Sidoqoftë, ndryshe nga Berati, nuk është shumë e sigurt që deformimet që mund të gjenden në kutitë e Kamzës dhe Paskuqanit të jenë të mjaftueshme për të përmbysur shpërndarjen zyrtare të mandateve të Tiranës.

Ndërsa në qarkun e Shkodrës, situata është akoma më e komplikuar. Në këtë qark, PS-së i duheshin 7200 vota për të siguruar edhe një mandat tjetër. Dhe nga një investigim që emisioni Faktor Plus i bëri disketës së numërimit së një qendre numërimi rezultoi se PD-së i ishin shtuar padrejtësisht vota, por në një magnitudë më të vogël e njëjta gjë kishte ndodhur edhe me votat e PS-së. Partitë që e kishin pësuar më shumë atje ishin partitë e vogla të djathta. Në këto kushte, është e vështirë të parashikohet nëse rinumërimi mund të përmbysë rezultatin zyrtar.

Në llogari të fundit, hapja e kutive, pavarësisht se mund të përmbysë rezultatin në një apo dy qarqe, nuk mund të ndryshojë raportet e shpërndarjes së mandateve kuvendore. Kjo shpërndarje është vulosur ligjërisht me një vendim përfundimtar të KQZ-së, votuar me rezultatin 7-0 pas ankimimeve të pasuksesshme në Kolegjin Zgjedhor. Por edhe sikur PD-ja t’i dorëzojë vullnetarisht një apo dy mandate, kjo nuk do ta cenonte mazhorancën aktuale, e cila ka aktualisht 74-75 mandate.

Duke pasur parasysh të gjitha këto, natyrshëm të lind pyetja se përse Berisha mbron me stoicizëm mos’hapjen e kutive. Problemi është se ai nuk e ka garën me kundërshtarët aktualë politikë. Ai e ka garën me historinë – me Skënderbeun, Ismail Qemalin, Ahmet Zogun. Për të ka rëndësi që të hyjë në histori si udhëheqësi që, pavarësisht nga disa gabime të pranuara në fillimet e karrierës politike, e futi vendin në Evropën e Bashkuar, duke gëzuar mbështetje legjitime të popullit. Pikërisht për këtë arsye, ai më mirë pranon zgjedhje të parakohshme (po qe se s’i mbetet rrugë tjetër) se sa të hapë kutitë. Hapja e tyre do të cenonte imazhin e udhëheqësit me përkrahje popullore, që ai dëshiron t’i skalitet në faqet e historisë…