Nga Gerhard Lechner, Wiener Zeitung, 11 Gusht 2012
Cila është arsyeja kryesore për kthimin e emigrantëve shqiptarë në Greqi në Shqipëri?
Fillimisht perspektiva ekonomike. Të kthyerit kanë qenë të punësuar kryesisht në sektorin e ndërtimit, i prekur rëndë nga kriza në Greqi. Vitin e kaluar u kthyen 30 mijë shqiptarë, këtë vit janë kthyer 60 mijë e ndoshta më shumë. Klima e përkeqësuar politike në Greqi dhe sjellja raciste kanë kontribuar në rikthimin e njerëzve.
Çfarë do të thotë kjo për Shqipërinë? Më shumë të papunë, apo një efekt pozitiv për shkak se lekët e fituar do investohen në vend?
Kjo e fundit mund të jetë, por me një efekt afatshkurtër, që do zhduket shpejt. E vërteta e hidhur është se ekonomia shqiptare, e cila importon shumë dhe thuajse nuk eksporton asgjë, varet shumë nga paratë e dërguar nga emigrantët shqiptarë. Këta të fundit punojnë jo vetëm në Greqi, por edhe në Europën Qendrore. Por numri i atyre që kanë shkuar në Greqi është shumë i madh.
Sa e rëndësishme është Greqia për Shqipërinë?
Roli i Greqisë nuk mund të nënvlerësohet. Në vitin 2005, përpara krizës, 55 përqind e investimeve direkte në Shqipëri ishin nga fqinji jugor. Në vitin 2011 kjo shifër ishte 27 përqind. Megjithatë akoma Greqia është përpara Italisë dhe Austrisë me 15 dhe 14 përqind respektivisht. Nëse bankat greke falimentojnë, pasojat në Shqipëri do jenë shumë të mëdha. Edhe nëse Greqia vendos të rikthehet tek dhrahmia, do ketë pasoja. Të mos harrojnë se situata në Shqipëri aktualisht nuk është aq e mirë. Vetëm në një tremujor, industria shqiptare është zhytur me 19.3 përqind
Çfarë pasojash politike do kenë këto zhvillime në Shqipëri?
Në verën e vitit 2013 do mbahen zgjedhjet parlamentare dhe kriza do ketë ndikim tek kryeministri Sali Berisha dhe demokratët e tij. Socialistët e Edi Ramës mund të përfitojnë nga kriza. Megjithatë në Shqipëri nuk ka pasur asnjë rezultat zgjedhor që është pranuar nga palët. Humbësi pretendon se janë bërë manipulime. Por në vend ka pasur rotacion pushteti. Shqipëria është një vend ekstremisht pro- perëndimor dhe vendi nuk e pranon një manipulim zgjedhor në shkallë të gjerë.
