TemA, 10 Janar 2013
Sali Berisha ka ndryshuar qëndrim nga deklarimet e bëra në mbledhjen e qeverisë, mbajtur në Vlorë më 4 dhjetor të vitit të kaluar, ku theksoi se do të miratohet projektligji për dhënien e shtetësisë të gjithë shqiptarëve jashtë kufijve pas zgjedhjeve dhe ka deklaruar dje se shtetësia do të jepet për shqiptarët e Malit të Zi, Luginës së Preshevës dhe Maqedonisë, por edhe ata që jetojnë në vendet e BE-së, SHBA-së dhe Kanada para zgjedhjeve.
Duke folur për nënshtetësinë, kreu i qeverisë i ka dhënë një kthesë tjetër deklaratës së tij dhe tashmë pohon se projektligji do të hyjë në fuqi para zgjedhjeve, ndërkohë që e drejta e votës nuk do të implementohet pasi janë hartuar listat e zgjedhësve.
Por siç shkruhet në gazetën Shqip, kjo deklaratë është nonsens në aspektin juridik, pasi nëse jepet nënshtetësia, çdo shtetas shqiptar ka të drejtën e votës dhe këtë të drejtë, nëse i mohohet, mund ta fitojë edhe thjesht me një vendim gjykate.
Diferencat e deklarimeve të bëra më 4 dhjetor dhe atyre të djeshme janë se një muaj më parë u tha se do të hartohet një projektligj që kërkon 3/5 e votave, ndërsa dje Berisha theksoi se do të merret me vendim qeverie, që nuk ka nevojë për t’u miratuar në Kuvend.
E dyta, më 4 dhjetor Kryeministri deklaroi se ligji do të hyjë në fuqi pas zgjedhjeve, ndërsa dje në mbledhjen e qeverisë ai pohoi se shtetësia do të merret, por e drejta e votës hyn në fuqi pas zgjedhjeve.
Por, nëse shtetësia merret, asnjë qytetari nuk mund t’i mohohet e drejta e votës.
