Kryeministri Edi Rama doli në një konferencë për shtyp një ditë përpara mbylljes së vitit për të bërë bilancin e këtij viti, por edhe për të folur për perspektivën e vitit që nis.
Në këtë konferencë, bashkë me Ramën të pranishëm ishin edhe të gjitha ministrat e kabinetit.
Rama tha se viti 2013 nisi me pesimizëm, por pas 23 qershorit nisi optimizmi.
Rama tha se buxheti i vitit 2014 i ka kthyer optimizmin vendit.
Ai tha se tani mjekët, policia, ushtarakët do të marrin më shumë lekë dhe do kenë më pak taksa.
“Rivendosja e rendit dhe mbrojtja e qytetarëve dhe pronës së tyre do të jenë prioritet i vitit 2014. Prioritet do të jetë edhe reforma në drejtësi. Shqiptarët kanë nevojë për drejtësi”, ka theksuar Rama, i cili ka nënvizuar se prioritet do të jenë edhe politika e jashtme dhe ajo e integrimit.
Rama deklaroi se viti që vjen nis me një takim të përbashkët të qeverive të Kosovës dhe Shqipërisë në Prizren.
“Në mbledhjen e parë të dy qeverive do të shënohet fillimi i qeverisjes strategjike mes dy shteteve tona shqiptare”.
Rama konfirmoi lajmin se ata kanë përgatitur një paketë ndihme për Luginën e Preshevës.
I pyetur nëse Shqipëria do e marrë statusin e kandidatit në qershor, Rama tha se qeveria do mbajë përgjegjësinë e saj. Por ai shtoi se shpreson se forcat ekstremiste nuk do kenë ndikimin që patën këtë herë.
Më tej, i pyetur në lidhje me qëndrimin e Shqipërisë në radhët e Konferencës Islamike, Rama ka pranuar se kjo është një çështje që shqetëson BE-në, por ka nënvizuar se do të zgjidhet me maturi.
Rama konfirmoi se do të vazhdojë aksioni për prishjen e ndërtimeve pa leje.
Rama tha se qeveria është e vendosur që të marrë plotësisht nën kontroll territorin.
Kryeministri deklaroi se në fillim të vitit tjetër do miratohet ngritja e Agjencisë Kombëtare për Bregdetin.
“Do hapim një kapitull të ri në administrimin e kësaj pasurie kombëtare,” tha Rama.
Kryeministri tha se do merren nën kontroll të gjithë pasuritë kombëtare.
I pyetur nëse do ketë ndryshime kushtetuese, Rama tha se ndryshimet kushtetuese nuk janë qëllim në vetvete.
I pyetur nëse do ketë një nismë për shkarkimin e Presidentit Nishani, Rama tha se reforma në drejtësi nuk synon emrat, por reformimin e sistemit.
Rama tha se do të bashkëpunojë me opozitën për reformën në drejtësi.
Rama tha se qëllimi i qeverisë do të jetë certifikimi i ekonomisë informale. Por Rama e pranoi se do jetë një mision i vështirë, pasi nuk mund të deklarojë se në fund të vitit tjetër nuk do ketë më ekonomi informale.
Rama tha se dosja e Arben Imamit është e para e një zinxhiri të gjatë bëmash të paligjshme tek Ministria e Mbrojtjes.
Rama tha se në prokurori do të shkojnë dosje nga të gjithë dikasteret ku ka pasur përfitime të paligjshme.
Kryeministri premtoi nisjen e procesit të legalizimit të ndërtimeve pa leje. Rama tha se do marrë fund kalvari i vuajtjeve për ata që duan të legalizojnë banesat.
Rama tha se situata e medias në vend është më e mirë.
I pyetur për protestën ndaj armëve kimike, Rama tha se ajo nuk ka ndryshuar asgjë në marrëdhëniet me SHBA./ep
